Ti Maikadua a Samuel 2:1-32

  • Ni David, ari ti Juda (1-7)

  • Ni Is-boset, ari ti Israel (8-11)

  • Gubat ti pamilia ni David ken ti pamilia ni Saul (12-32)

2  Kalpasanna, insaludsod ni David ken Jehova:+ “Mapanak kadi iti maysa kadagiti siudad ti Juda?” Kinuna kenkuana ni Jehova: “Wen.” Dinamag ni David: “Sadino ti papanak?” Insungbatna: “Idiay Hebron.”+  Isu a napan sadiay ni David a kaduana ti dua nga assawana a da Ahinoam+ a Jezreelita ken ni Abigail+ nga asawa daydi Nabal a Carmelita.  Inkuyog met ni David dagiti tattaona+ agraman dagiti pamiliada, ket nagnaedda kadagiti siudad iti aglawlaw ti Hebron.  Kalpasanna, immay dagiti lallaki ti Juda ket dinutokanda sadiay ni David kas ari iti balay ti Juda.+ Imbagada ken David: “Dagiti lallaki ti Jabes-gilead ti nangitabon ken Saul.”  Nangibaon ngarud ni David kadagiti mensahero a mapan kadagiti lallaki ti Jabes-gilead ket kinunana kadakuada: “Bendisionannakayo koma ni Jehova gapu iti panangitabonyo iti apoyo a ni Saul kas panangipakitayo iti napudno nga ayatyo kenkuana.+  Sapay koma ta ipakita kadakayo ni Jehova ti napudno nga ayat ken kinamatalek. Ipakitakto met kadakayo ti asik gapu iti dayta nga inaramidyo.+  Papigsaenyo koma ti pakinakemyo ket agbalinkayo a natured, ta natayen ni apoyo a Saul, ket siak ti dinutokan ti sangakabbalayan ti Juda nga agari kadakuada.”  Ngem ni Abner+ nga anak ni Ner, a pangulo ti armada ni Saul, innalana ni Is-boset+ nga anak ni Saul ket impanna idiay Mahanaim,+  ket pinagbalinna nga ari iti Gilead,+ kadagiti Asurita, iti Jezreel,+ Efraim,+ Benjamin, ken iti intero nga Israel. 10  Nagbalin nga ari ti Israel ni Is-boset nga anak ni Saul idi 40 ti tawenna, ket dua a tawen a nagturay. Ngem ni David ti sinuportaran ti balay ti Juda.+ 11  Pito a tawen ken innem a bulan ti kapaut* ti panagari ni David idiay Hebron iti balay ti Juda.+ 12  Idi agangay, ni Abner nga anak ni Ner ken dagiti adipen ni Is-boset nga anak ni Saul ket pimmanaw idiay Mahanaim+ sa napanda idiay Gibeon.+ 13  Rimmuar met ni Joab+ nga anak ni Zeruia+ ken dagiti adipen ni David ket nagsasabatda iti abay ti pagurnongan iti danum idiay Gibeon. Nagtugaw ti maysa a grupo iti maysa a bangir ti pagurnongan iti danum ket nagtugaw ti sabali a grupo iti sabali a bangir. 14  Kamaudiananna, kinuna ni Abner ken Joab: “Patakderem dagiti kakaduam nga agtutubo a lallaki ket makilabanda* kadakami.” Isu a kinuna ni Joab: “Sige.” 15  Isu a timmakderda ket nangpilida iti 12 a Benjaminita manipud iti grupo ni Is-boset nga anak ni Saul, ken 12 manipud kadagiti adipen ni David. 16  Naggiginnammatda iti ulo ket induyok ti tunggal maysa ti espadana iti bakrang ti kalabanna ket natayda amin. Isu a naawagan dayta a lugar iti Helkat-hazurim, nga adda idiay Gibeon. 17  Nakabutbuteng ti simmaruno a panaglalaban iti dayta nga aldaw agingga a ni Abner ken dagiti lallaki ti Israel ket inabak dagiti adipen ni David. 18  Adda idi sadiay ti tallo nga annak ni Zeruia+ a da Joab,+ Abisai,+ ken Asael.+ Nasiglat dagiti saka ni Asael a kas iti gasela iti tanap. 19  Kinamat ni Asael ni Abner, ket dina ininggaan a kinamat. 20  Timmaliaw ni Abner ket dinamagna: “Sika kadi dayta, Asael?” Insungbat ni Asael: “Wen.” 21  Kinuna kenkuana ni Abner: “Isardengnakon a kamaten. Mangtiliwka laengen iti maysa kadagiti agtutubo a lallaki ket alaem ti aniaman a kayatmo kenkuana.” Ngem saan latta a simmardeng ni Asael a mangkamkamat kenkuana. 22  Isu a kinuna manen ni Abner ken Asael: “Isardengnakon a kamaten ta no saan, patayenka. Anianto pay ti rupak a sumango ken Joab a kabsatmo?” 23  Ngem dina kayat ti sumardeng isu nga induyok ni Abner ti murdong ti pika iti tian ni Asael,+ ket simmalput iti bukotna. Natumba sadiay ket natay a dagus. Amin a makadanon iti disso a nakatumbaan ken nakatayan ni Asael ket sumardeng gapu iti kigtotda. 24  Ngem kinamat da Joab ken Abisai ni Abner. Idi lumlumneken ti init, nakadanonda iti turod ti Amma a sumango iti Gia iti dalan nga agturong iti let-ang ti Gibeon. 25  Sadiay a naguummong dagiti Benjaminita iti aglawlaw ni Abner, ket nagkaykaysada a nagtakder iti tapaw ti maysa a turod. 26  Impukkaw ni Abner ken Joab: “Kaanonto nga agsardeng ti panaglalabantayo? Dimo kadi ammo nga agbanag laeng daytoy iti nakaro a panaggiginnura? Kaanomto a pasardengen dagiti tattaom a mangkamkamat kadagiti kakabsatda?” 27  Kinuna ni Joab: “Isapatak iti nagan ti sibibiag ken pudno a Dios a no saanka a nagsao, agingganto pay laeng inton bigat nga isardeng dagiti soldadok ti panangkamatda kadagiti kakabsatda.” 28  Pinuyot ngarud ni Joab ti tangguyob, isu a simmardeng dagiti tattaona a mangkamat iti Israel, ket nagpatingga ti panaglalaban. 29  Nagpatpatnag a nagna ni Abner ken dagiti tattaona iti Araba.+ Binallasiwda ti Jordan ket nagnada a limmasat iti nauneg a rangkis* agingga a nakadanondan idiay Mahanaim.+ 30  Inummong ni Joab ti amin a tattaona kalpasan a simmardeng a nangkamat ken Abner. Agkurangen iti 19 dagiti adipen ni David, malaksid pay ken Asael. 31  Ngem inabak dagiti adipen ni David dagiti Benjaminita ken dagiti tattao ni Abner, ket 360 ti natay kadakuada. 32  Innalada ni Asael+ ket intabonda iti tanem ni amana idiay Betlehem.+ Kalpasanna, nagpatnag a nagnagna ni Joab ken dagiti tattaona, agingga a nakadanonda idiay Hebron+ idi aglawagen.

Footnotes

Lit., “ti bilang dagiti aldaw.”
Wenno “makikompetensiada.”
Wenno mabalin nga, “iti intero a Bitron.”