Ti Maikadua a Samuel 6:1-23
6 Inummong manen ni David ti amin a kalaingan a soldado iti Israel a 30,000 ti bilangda.
2 Kalpasanna, napan ni David ken ti amin a soldadona idiay Baale-juda tapno alaenda sadiay ti Lakasa ti pudno a Dios,+ a pangawagan dagiti tattao iti nagan ni Jehova a panguluen dagiti armada,+ a nakatugaw iti trono iti ngatuen* dagiti kerubin.+
3 Ngem inluganda ti Lakasa ti pudno a Dios iti baro a kareson+ tapno mayakarda manipud iti balay ni Abinadab+ nga adda iti turod; ket da Uza ken Ahio nga annak ni Abinadab ti nangiturong iti baro a kareson.
4 Gapuna, innalada ti Lakasa ti pudno a Dios idiay balay ni Abinadab iti turod ket inyakarda dayta. Ni Ahio ti magmagna iti sango ti Lakasa.
5 Agragragsak idi ni David ken ti intero nga Israel iti sanguanan ni Jehova. Nagtoktokarda iti nadumaduma a kita ti pagtokar a naaramid iti kayo a parwa, arpa, dadduma pay a dekuerdas nga instrumento,+ pandereta,+ sistrum, ken piangpiang.+
6 Ngem idi nakadanonda iti pagirikan ni Nacon, sinarapa ken tinengngel ni Uza ti Lakasa ti pudno a Dios,+ ta dandani natnag dayta gapu kadagiti baka.
7 Gapuna, nakapungtot ti pudno a Dios a ni Jehova isu a pinatayna ni Uza+ gapu iti dina panangraem iti bilin ti Dios.+ Natay ni Uza iti abay ti Lakasa ti pudno a Dios.
8 Ngem nakaunget* ni David gapu ta nakapungtot ni Jehova ken ni Uza; ket naawagan dayta a lugar iti Perez-uza* agingga ita nga aldaw.
9 Iti kasta, nagbuteng ni David ken Jehova+ iti dayta nga aldaw ket kinunana: “Kasanok ngarud a maala ti Lakasa ni Jehova?”+
10 Saan a kayat ni David a maipan ti Lakasa ni Jehova iti ayanna iti Siudad ni David.+ Impaipanna ketdi dayta iti balay ni Obed-edom+ a Gitita.
11 Tallo a bulan a nagtalinaed ti Lakasa ni Jehova iti balay ni Obed-edom a Gitita, ket binembendisionan ni Jehova ni Obed-edom ken ti intero a sangakabbalayanna.+
12 Naipadamag ken Ari David: “Binendisionan ni Jehova ti balay ni Obed-edom ken ti amin nga adda kenkuana gapu iti Lakasa ti pudno a Dios.” Isu a napan ni David idiay balay ni Obed-edom tapno siraragsak nga alaenna ti Lakasa ti pudno a Dios ket ipanna iti Siudad ni David.+
13 Idi nakapagna iti innem nga addang dagiti agaw-awit+ iti Lakasa ni Jehova, nagidaton ni David iti maysa a baka ken maysa a nalukmeg nga animal.
14 Nakagangganaygay ni David a nagsala iti sanguanan ni Jehova; nakasuot iti lienso nga efod bayat nga agsalsala.+
15 Siraragsak nga agpukpukkaw+ ni David ken ti intero nga Israel ken mapuypuyotan ti tangguyob+ bayat nga iyaw-awidda ti Lakasa+ ni Jehova.
16 Idi maisangpet ti Lakasa ni Jehova iti Siudad ni David, timman-aw iti tawa ni Mical+ nga anak ni Saul ket nakitana ni Ari David nga aglaglagto ken agsalsala iti imatang ni Jehova; ket inuyawna iti pusona.+
17 Isu nga inserrekda ti Lakasa ni Jehova ket indissoda iti pakaikabilanna iti uneg ti tolda nga imbangon ni David para iti dayta.+ Kalpasanna, nangidaton ni David kadagiti daton a mapuoran+ ken daton a pakikappia+ iti sanguanan ni Jehova.+
18 Idi naiteden ni David dagiti daton a mapuoran ken daton a pakikappia, binendisionanna dagiti tattao iti nagan ni Jehova a panguluen dagiti armada.
19 Inikkanna met ti amin a tattao, ti intero nga Israel, ti tunggal lalaki ken babai, iti sinansingsing a tinapay, bibingka a datiles, ken bibingka a pasas. Kalpasanna, nagawidda aminen.
20 Idi nagawiden ni David tapno bendisionanna ti sangakabbalayanna, sinabat ni Mical+ nga anak ni Saul. Kinunana: “Ita nga aldaw, imbabain ti ari ti Israel ti bagina idi nagussob iti imatang dagiti babbai a tagabo dagiti adipenna, a kas iti panagussob ti maysa nga agmauyong!”+
21 Kinuna ni David ken Mical: “Ti selebrasionko ket para ken Jehova, a nangpili kaniak imbes a ni amam ken ti intero a sangakabbalayanna ken nangdutok kaniak kas lider ti Israel+ nga ili ni Jehova. Isu nga agselebrarak iti sanguanan ni Jehova,
22 ken ad-addanto pay nga agpakumbabaak ngem iti dayta ken ibilangkonto ti bagik a nanumo. Ngem kadagiti imbagam a tagabo a babbai, maipadayagakto.”
23 Isu a ni Mical+ nga anak ni Saul ket saan a pulos a naaddaan iti anak agingga a natay.
