Ti Maikadua a Samuel 4:1-12

  • Napapatay ni Is-boset (1-8)

  • Impapatay ni David dagiti nangpapatay (9-12)

4  Idi madamag ni Is-boset+ nga anak ni Saul* a natay ni Abner idiay Hebron,+ nagbuteng* ni Is-boset ken madanagan ti amin nga Israelita.  Adda dua a lallaki a mangidadaulo kadagiti grupo dagiti tulisan, a tattao ti anak ni Saul: da Baanah ken Rekab nga annak ni Rimmon a Beerotita, iti tribu ni Benjamin. (Maibilang met ngamin ti Beerot+ kas paset ti Benjamin.  Nagkamang dagiti Beerotita idiay Gitaim,+ ket ganggannaetda a residente sadiay agingga ita nga aldaw.)  Ni Jonatan+ nga anak ni Saul ket adda anakna a lalaki a pilay.*+ Lima ti tawenna idi dimteng ti damag manipud Jezreel+ a natay da Saul ken Jonatan. Binagkat ti mangaw-awir kenkuana sa intarayna nga impanaw, ngem gapu ta agdardaras, naibbatanna ti ubing isu a napilay. Mefiboset+ ti nagan ti ubing.  Dagiti annak ni Rimmon a Beerotita a da Rekab ken Baanah ket napan iti balay ni Is-boset bayat nga agin-inana iti tengnga ti aldaw.  Simrek da Rekab ken Baanah+ iti balay ni Is-boset a kasla mapanda mangala iti trigo, ngem dinuyokda ti tian ni Is-boset sada naglibas nga agkabsat.  Idi simrekda iti balay, nakaidda ni Is-boset iti katre iti kuartona, ket pinatayda, sada pinugotan. Innalada ti ulona ket agpatnag a nagnagnada a nagturong iti Araba.  Impanda ken David idiay Hebron ti ulo ni Is-boset+ ket kinunada iti ari: “Adtoy ti ulo ni Is-boset nga anak ni Saul a kabusormo+ a nagpanggep a mangpatay kenka.+ Ita nga aldaw, apo ari, pinalubosannaka ni Jehova a makaibales ken Saul ken kadagiti kaputotanna.”  Nupay kasta, kinuna ni David iti agkabsat a da Rekab ken Baanah nga annak ni Rimmon a Beerotita: “Isapatak iti nagan ti sibibiag a Dios a ni Jehova a nangisalakan kaniak* iti amin a pakarigatak,+ 10  nga idi adda nangipadamag kaniak, ‘Natayen ni Saul,’+ ken ipagarupna a nasayaat ti impadamagna, tinengngelko ket pinatayko+ idiay Ziklag. Dayta ti naganab ti nagipadamag kaniak! 11  Nakarkaro pay ti lak-amen dagiti dakes a tattao a nangpatay iti nalinteg a tao iti mismo a katrena iti uneg ti balayna! Saankonto ngata a singiren ti darana kadakayo+ ket pukawenkayo iti rabaw ti daga?” 12  Binilin ngarud ni David dagiti agtutubo a lallaki a patayenda da Rekab ken Baana.+ Pinutedda dagiti ima ken saka ti agkabsat sa imbitinda ida+ iti pagurnongan iti danum idiay Hebron. Ngem innalada ti ulo ni Is-boset ket inkalida iti nakaitabonan ni Abner idiay Hebron.

Footnotes

Lit., “ti anak ni Saul.”
Lit., “kimmapsut dagiti ima.”
Wenno “lugpi.”
Wenno “nangsubbot iti kararuak.”