Sofonin 1:1-18
1 Zoova kannin ndɛ kleli Sofonin* m’ɔ ti Kusi i wa’n. Kusi ti Gedalia i wa, Gedalia ti Amaria i wa, Amaria ti Ezekiasi i wa. Amɔn+ i wa Zoziasi+ m’ɔ ti Zida famiɛn’n i blɛ su yɛ ɔ kannin ndɛ kleli Sofonin-ɔn. Ɔ seli kɛ:
2 “Ń núnnún ninnge nga be o asiɛ’n su’n be kwlaa,” ndɛ nga Zoova kan’n yɛ ɔ o lɛ-ɔ.+
3 Zoova waan: “Ń núnnún sran mun nin nnɛn mun.
Ń núnnún anunman mɔ be tu sin nglo lɔ’n nin jenvie’n nun jue mun.+
Ń núnnún ninnge nga sran’m be ja kpla be su’n*+ nin klunwifuɛ mun wie.
Kpɛkun ń núnnún klɔ sran mɔ be o asiɛ’n su’n, be kwlaa kpan.”
4 “Ń má tínngɛ min sa Zida
nin be kwlaa nga be tran Zerizalɛmun lɔ’n be wun,ń núnnún Baali i nzɔliɛ like*+ kwlaa ng’ɔ o lika nga nun’n.
Ń núnnún amuin ng’ɔ fin nvle uflɛ nun’n i ɲrun jranfuɛ’m be dunman’n,ɔ nin i ɲrun jranfuɛ mun wie.+
5 Ń núnnún be nga be fu be sua’n i ti su lɔ be ko koto ɲanmiɛn su lɔ sonja’m be kwlaa be bo’n,+ɔ nin be nga be koto Zoova bo mɔ be tɛ i nda kɛ be nin i be o nun’n,+mɔ be kunngba’n be ta Malkamun+ i nda kɛ be nin i o nun’n.
6 Ń núnnún be nga be kaci be sin si Zoova’n+
nin be nga be kunndɛman Zoova, mɔ be kloman kɛ ɔ kle be atin’n.”+
7 Amun mɔ amun o Miɛn Zoova m’ɔ Sie Like Kwlakwla’n i ɲrun’n, maan amun gua bliin, afin Zoova i cɛn’n w’a mantan koko.+
Zoova yili tɛ. Ɔ yoli be nga ɔ yiali be’n be sanwun.
8 “Cɛn nga Zoova yi tɛ’n, ń tú famiɛn’n i sran dandan’m be fɔ,ń tú famiɛn’n i mma mun+ nin be kwlaa nga be wlali nvle uflɛ nunfuɛ’m be tralɛ’n be fɔ.
9 Cɛn sɔ’n nun’n, ń tú sran ng’ɔ fu cenje’n* su’n i fɔ,ń tú be nga be yo nzaje sa mɔ be laka be wiengu mun be min’n i sua’n nun’n be fɔ.”
10 Zoova waan: “Cɛn sɔ’n nun’n,bé tí sran kun i kpanlɛ Jue Anuan’n+ i wun lɔ,bé tí awuyomo bolɛ klɔ uflɛ’n+ su lɔ,yɛ kpɔlɛ’m be su lɔ’n, bé tí like kun m’ɔ tɛ kekle kpa’n i ngan.
11 Amun mɔ amun tran Makitɛsi* lɔ’n, amun bo awuyomo,afin b’a kun aata difuɛ’m be kwlaa.
B’a nunnun be nga be sunnzun sika’n be kwlaa.
12 Blɛ sɔ’n nun’n, ń fá kannin ń níannían Zerizalɛmun klɔ’n nun kpa,kpɛkun ń tú be nga be klun titiman be kaan sa’n be fɔ. Sran sɔ’m be se be klun lɔ kɛ:
‘Zoova su yoman sa kpa, kusu ɔ su yoman sa tɛ.’+
13 Sran’m bé fɛ́n be aɲanbeun ninnge mun, yɛ bé sáci be sua mun.+
Bé kplán sua, sanngɛ be su tranman nun.
Bé tá viɲin, sanngɛ be su ɲanman duvɛn nɔnman.+
14 Zoova i cɛn dan’n w’a mantan koko!+
W’a mantan koko yɛ ɔ su ba ndɛndɛ kpa!+
Zoova i cɛn’n i tɛlɛ’n yo sro.+
Cɛn sɔ’n nun’n, safuɲrɛn bɔbɔ ɔ́ kpán.+
15 Cɛn sɔ’n ti ya ble’n i nglo yilɛ cɛn,+cɛn sɔ’n ti awlabɔɛ nin akluntitiɛ cɛn,+cɛn sɔ’n ti aunmuan m’ɔ fita kekle kpa’n nin like sacilɛ cɛn,cɛn sɔ’n nun’n, aosin’n dé lika’n,+cɛn sɔ’n nun’n, ɲanmiɛn ble’n dé lika’n kpɛkun lika’n lú tritritri,+
16 cɛn sɔ’n nun’n, bé tí awɛ’n nin alɛ kunfuɛ’mbe ngan,+awɛ’n nin alɛ kunfuɛ’m be kpanlɛ sɔ’n be ti klɔ nga be sisili be wun’n, ɔ nin be talɛ’m be cɔnjɔ su lika nga be ti nglonglo kpa’n be liɛ.+
17 Ń yó maan klɔ sran’m be wla bó be wun,yɛ bé nánti kɛ aɲinsifuɛ mun sa,+afin Zoova wun yɛ be fɔnnin-ɔn.+
Be mmoja’n trú lika’n nun kɛ ndutre sa,yɛ be wunnɛn’n* káci kɛ sewie sa.+
18 Be sika’n nin be sika ɔkwlɛ’n be su kwlá deman be Zoova i ya cɛn’n nun.+
Afin i ya m’ɔ jue kɛ sin sa’n, ɔ́ dí asiɛ wunmuan’n,+afin ɔ́ núnnún like kwlaa. Nanwlɛ, ɔ́ yó sro. Ɔ́ núnnún klɔ sran’m be kwlaa kpan.”+
