Fluwa nsan su nga Zan klɛli’n 1:1-14
1 Gaisi, min mɔ n ti kpɛnngbɛn’n* ń klɛ́ fluwa nga ń blɛ́ wɔ mɔ a ti min sran kpa mɔ n klo wɔ kpa’n.
2 Min sran kpa, ń srɛ́ Ɲanmiɛn naan like kwlaa nga á yó’n, ɔ yo ye ɔ sa nun kɛ nga dɔ nga su’n, ninnge nga a yo be’n, be yo ye ɔ sa nun’n sa. Asa ekun’n, ń srɛ́ Ɲanmiɛn kɛ maan ɔ wun sanndi wɔ.
3 Aniaan wie’m be bali be wa seli e kɛ a te tra ndɛ nanwlɛ’n nun naan a te nanti ndɛ nanwlɛ’n i atin’n su. Kɛ n tili i sɔ’n, ɔ yoli min fɛ kpa.+
4 Nanwlɛ, kɛ n ti i kɛ min mma’m be nanti ndɛ nanwlɛ’n i atin’n su titi’n, ɔ yo min fɛ kpa.*+
5 Min sran kpa, kannzɛ bɔbɔ a siman aniaan mun’n, a yo be ye. I sɔ’n kle kɛ a nin Ɲanmiɛn be nanti klanman.+
6 Be kannin klolɛ mɔ a yi i nglo’n i ndɛ asɔnun’n i nunfuɛ’m be ɲrun. Ń srɛ́ wɔ kpa kɛ, sɛ be kɔlɛ’n ju’n, a mian ɔ ɲin uka be* kɛ nga Ɲanmiɛn bɔbɔ klo’n sa.+
7 Afin i dunman nun ti yɛ be tuli be bo lɔ-ɔ. B’a faman like fi+ mɛn’n nunfuɛ’m be sa nun.
8 I sɔ’n ti’n, ɔ fata kɛ e sɔ be nun.+ Sɛ e yo sɔ’n, ɔ ti kɛ e nin be e su di junman likawlɛ sa naan ndɛ nanwlɛ’n tru.+
9 N klɛli ndɛ kun n ko mannin asɔnun’n i nunfuɛ mun. Sanngɛ Diotrefɛsi m’ɔ klo kɛ ɔ́ yó be su kpɛn’n,+ ɔ buman ndɛ kwlaa nga e kan’n i like fi.+
10 I sɔ’n ti’n, sɛ n ju lɔ’n, like ng’ɔ yo’n mɔ yɛle e wun ndɛ tɛtɛ kanlɛ’n, ń má kɛ́n i ndɛ.+ Sanngɛ i sɔ m’ɔ yo’n, ɔ jumɛn i. I kpa bɔbɔ’n, ɔ sɔman aniaan’m be nun.+ Yɛ be nga be waan bé sɔ́ be nun’n, ɔ tanndan be ɲrun, kpɛkun ɔ kan be bo asɔnun’n nun.
11 Min sran kpa, nán sɔnnzɔn sran ng’ɔ yo sa tɛ’n, sanngɛ sɔnnzɔn sran ng’ɔ yo sa kpa’n.+ Afin sran ng’ɔ yo sa kpa’n, ɔ ti Ɲanmiɛn wa.+ Sanngɛ sran ng’ɔ yo sa tɛ’n, ɔ nin-a siman Ɲanmiɛn.+
12 Sran’m be kwlaa be bo Demetriisi i dunman fɛ. Kpɛkun wafa ng’ɔ yo ninnge mun’n, ɔ kle kɛ ɔ nanti nanwlɛ atin’n su. E kusu e su kɛn i ndɛ kpa yɛ a si kɛ ndɛ nga e kan’n ti nanwlɛ.
13 N le ndɛ kpanngban mɔ n kunndɛ kɛ ń kán klé wɔ-ɔ. Sanngɛ n kunndɛman kɛ ń klɛ́ be fluwa su.
14 N lafi su kɛ ń wún wɔ koko nga nun naan e nin wɔ é kókó yalɛ.
Maan ɔ wun jɔ wɔ fɔuun.
Aniaan’m bé yó wɔ like. Yo aniaan’m be tinuntinun be like man min.
