2 Samiɛli 11:1-27
11 Kɛ afuɛ uflɛ boli i bo’n,* mɔ blɛ nga famiɛn’m be kɔ alɛ kunlɛ’n juli’n, Davidi sunmannin Zoabu, nin i sran mun, nin Izraɛli nvle’n nun sonja’m be kwlaa naan be ko nunnun Amɔnfuɛ mun. Be kpɛ sin yiali Raba klɔ’n.+ Sanngɛ Davidi bɔbɔ kali Zerizalɛmun lɛ.+
2 Cɛn kun nnɔsua’n,* Davidi jasoli i bɛ’n su, ɔ ɔli nantinantilɛ i famiɛn sua’n i ti su gbagblagba’n su lɔ. Kɛ ɔ o nglo lɔ’n, ɔ́ nían-ɔn, bla kun su wunnzin. Bla sɔ’n ti klanman kpa.
3 Davidi sunmannin sran kun naan ɔ ko usa bla’n i su ndɛ. Yɛ sran’n wa seli i kɛ: “Eliamun+ i wa Bati-Seba-ɔ.+ Iri+ m’ɔ ti Ɛtifuɛ’n+ i yi-ɔ.”
4 I sin’n, Davidi sunmannin sran naan be ko fɛ i bla.+ Kɛ bla’n bali’n, Davidi nin i be lali.+ (Kɛ ɔ́ yó sa sɔ’n, nn bla’n su kplo i wun fiɛn.*)+ Kɛ ɔ yoli sɔ’n, yɛ bla’n sɛli i sin i awlo-ɔ.
5 Bla’n i kuɛ falɛ nun-ɔn. Ɔ maan ɔ sunmannin sran naan ɔ se Davidi kɛ w’a wunnzɛ.
6 I sɔ’n ti’n, Davidi toli Zoabu i ngaliɛ. Ɔ seli i kɛ: “Se Iri m’ɔ ti Ɛtifuɛ’n kɛ ɔ to min wa.” Zoabu mannin Iri i atin naan w’a ba Davidi sin.
7 Kɛ Iri juli i wun lɔ’n, ɔ usali Zoabu nin sonja’m be osu. Asa ekun’n, ɔ usɛli i alɛ’n i nun ndɛ.
8 I sin’n, Davidi seli Iri kɛ: “Kɔ ɔ awlo naan ko lo wunmiɛn.”* Kɛ Iri jasoli famiɛn’n i awlo lɔ’n, famiɛn’n mannin like* kɛ be fa ko cɛ i.
9 Sanngɛ Iri w’a ɔmɛn i awlo. Ɔ nin famiɛn’n i sonja onga’m be kwlaa be lali famiɛn’n i sua’n i anuan’n nun lɛ.
10 Be ko seli Davidi kɛ Iri w’a ɔmɛn i awlo. Yɛ Davidi seli Iri kɛ: “A fin lika mmua. ?Ngue ti yɛ w’a ɔman ɔ awlo-ɔ?”
11 Iri tɛli Davidi su kɛ: “Alaka’n+ nin Izraɛlifuɛ mun, nin Zidafuɛ’m be o tannin sua bo. Min min Zoabu nin i sonja’m be o blo lɔ. ? Ɔ maan sɛ n kɔ awlo n ko di like naan n nɔn nzan naan e nin min yi’n e la’n, ɔ nin i fata yɛ ɔ o lɛ-ɔ?+ Maan n di ɔ nanwlɛ, n su yoman sɔ mlɔnmlɔn.”
12 Yɛ Davidi seli Iri kɛ: “Ka wa andɛ ekun. Ainman nn m’an man ɔ atin naan w’a wɔ.” Ɔ maan Iri kali Zerizalɛmun lɛ cɛn sɔ’n nun. Kɛ lika’n cɛnnin’n, ɔ kali lɛ ekun.
13 Davidi flɛli i, ɔ nin i be dili like yɛ be nɔnnin nzan. Davidi mɛnnin i nzan lele ɔ boli. Sanngɛ nnɔsua’n, w’a ɔmɛn i awlo lɔ. Ɔ ko lali famiɛn’n i sonja onga’m be wun lɛ.
14 Nglɛmun’n, Davidi klɛli fluwa fa wlali Iri i sa nun kɛ ɔ fa ko man Zoabu.
15 Ɔ klɛli i fluwa’n nun kɛ: “Fa Iri sie i sonja’m be ɲrun lɔ, lika nga alɛ’n yri kpa lɛ’n. Kpɛkun cuɛn ɔ wun kɔ siɛn naan i ngunmin ka lɛ naan be kun i.”+
16 Zoabu niannin klɔ’n i kpa. Kpɛkun ɔ fali Iri sieli i lika ng’ɔ si kɛ sonja yasua kpakpa’m be o lɛ’n.
17 Kɛ klɔ’n nunfuɛ’m be fiteli mɔ be nin Zoabu be kunnin’n, Davidi i sonja wie’m be wuli. Iri m’ɔ ti Ɛtifuɛ’n wuli wie.+
18 Kɛ ɔ yoli sɔ’n, Zoabu sunmannin sran kɛ ɔ ko kan alɛ’n i nun ndɛ kle Davidi.
19 Ɔ seli sran sɔ’n kɛ: “Kɛ a wie alɛ’n i nun ndɛ kwlaa kan’n,
20 atrɛkpa’n, famiɛn’n fá ya, kpɛkun ɔ́ sé wɔ kɛ: ‘?Ngue ti yɛ kɛ amun nin be kún’n, amun wunngeli klɔ’n i wun koko dan sɔ-ɔ? ?Amun siman kɛ bé jrán talɛ’n su bé tó amun wun ta?
21 ?Wan yɛ ɔ kunnin Zerubesɛti+ i wa Abimelɛki-ɔ?+ ?Bla kun w’a jranman talɛ’n su w’a toman yɔbuɛ nga be fa tin likeʼn i su yɔbuɛʼn w’a fa kunmɛn i Tebɛzi lɔ? ?Ngue ti yɛ amun wunngeli talɛ’n i wun koko lɔ-ɔ?’ Sɛ ɔ kan sɔ’n, se i kɛ: ‘Ɔ sufuɛ Iri m’ɔ ti Ɛtifuɛ’n wuli wie.’”
22 Ndɛ kwlaa nga Zoabu seli sran’n kɛ ɔ kan kle Davidi’n, ɔ ko kan kleli i.
23 Ɔ seli Davidi kɛ: “Be sran’m be wunmiɛn’n trali e liɛ’n. Be nin e ko kunnin blo lɔ. Sanngɛ e suli be su lele e juli klɔ’n i anuan’n nun lɛ.
24 Kɛ be ta tofuɛ’m be jrannin talɛ’n su be toli ɔ sonja’m be wun ta’n, ɔ sonja wie’m be wuli. Ɔ sufuɛ Iri m’ɔ ti Ɛtifuɛ’n ɔ wuli wie.”+
25 Yɛ Davidi seli ngaliɛ kanfuɛ’n kɛ: “Se Zoabu kɛ yoo: ‘Nán maan i sɔ liɛ’n ti’n, ɔ akunndan’n sanngan. Afin kɛ tokofi’n kun be sran mun’n, saan ɔ́ kún e liɛ mun wie. A nin be kun kpa tra laa liɛ’n, naan fa be klɔ’n.’+ Ɔ kusu wla Zoabu i fanngan.”
26 Kɛ Iri i yi’n tili i kɛ i wun wuli’n, ɔ sunnin i.
27 Kɛ be wieli i sɛ’n i yo cɛ’n, Davidi ko fɛ i bali i awlo lɔ. Kpɛkun ɔ kacili i yi.+ I sin’n, bla’n wuli ba yasua kun. Sanngɛ sa nga Davidi yoli’n, w’a yoman Zoova i fɛ kaan sa.*+
Ja ngua lɔ ndɛ mun
^ Ebr., “Kɛ bé wlú afuɛ’n nun’n,” atrɛkpa’n, Izraɛlifuɛ’m be anglo nga be flɛ i kɛ Abibu’n (Nizan’n) i nun-ɔn. Nian Nd. B15 nun.
^ Annzɛ “nnɔsua flɔlɔ’n.”
^ Atrɛkpa’n, i sa buli, ɔ maan ɔ o fiɛn nun.
^ Ebr., “wunnzin ɔ ja wun.”
^ Annzɛ “famiɛn’n i like liɛ’n,” yɛle kɛ, kɛ sran kun yia sran’n, like ng’ɔ fa ko cɛ i m’ɔ kle kɛ ɔ bu i sran’n.
^ Ebr., “ɔ yoli tɛ Zoova ɲrun.”
