2 Famiɛn Mun 11:1-21
11 Kɛ Atali+ m’ɔ ti Akazia i nin’n wunnin kɛ i wa’n w’a wu’n,+ ɔ kunnin be kwlaa nga be kwla di famiɛn’n i aja’n.*+
2 Sanngɛ Famiɛn Zoramun i wa bla Zoseba m’ɔ ti Akazia i niaan bla’n fali Akazia i wa Zoasi,+ ɔ wuɛli i famiɛn’n i mma ng’ɔ fata kɛ be kun be’n be nun. Kpɛkun ɔ fɛli i nin bla ng’ɔ niɛn i su’n ko fiali sua ba kun nun. Be fɛ i fiali Atali i ɲrun, ɔ maan b’a kwlá kunmɛn i.
3 Ba’n kali bla’n i wun lɛ afuɛ nsiɛn. Zoova i sua’n nun lɔ yɛ be fɛ i fiali-ɔ. Kɛ ɔ́ yó sɔ’n, nn Atali yɛ ɔ sie nvle’n niɔn.
4 I afuɛ nso su’n, Zoyada sunmannin sran kɛ be ko flɛ famiɛn’n i sasafuɛ* ya su kpɛn mun nin famiɛn sua’n i gladi difuɛ ya su kpɛn mun*+ naan be to i Zoova i sua’n nun lɔ. Ɔ nin be trali aenguɛ yɛ ɔ yoli maan be tali aenguɛ sɔ’n i su nda Zoova i sua’n nun lɔ. I sin’n, ɔ fali famiɛn’n i wa’n kleli be.+
5 Ɔ seli be kɛ: “Like ng’ɔ fata kɛ amun yo’n yɛ: Amun nga amún wá dí junman Wunmiɛn-lolɛ-cɛn’n nun’n, amun bubu amun wun nun akpasua nsan, maan akpasua kun nian famiɛn’n i sua’n su kpa.+
6 Maan akpasua kun jran Zesɔdu* Anuan’n nun lɔ, yɛ kun ekun jran anuan ng’ɔ o famiɛn sua’n i gladi difuɛ’m be sin lɔ’n nun. Amún kácikáci amun wun sua’n i su nianlɛ’n nun.
7 Amun akpasua nɲɔn nga be diman junman Wunmiɛn-lolɛ-cɛn’n nun’n, ɔ fata kɛ be nian Zoova i sua’n su kpa naan be sasa famiɛn’n.
8 Maan amun bo sin yia famiɛn’n, maan amun tinuntinun amun alɛ kunlɛ ninnge’m be tran amun sa nun. Sran kwlaa ng’ɔ wlu amun afiɛn’n, maan be kun i. Lika kwlaa nga famiɛn’n kɔ́’n,* amun su i su.”
9 Sran ya su kpɛn’m+ be niannin like nga Zoyada m’ɔ ti Ɲanmiɛn ɲrun jranfuɛ’n waan be yo’n su sɛsɛsɛ be yoli. Be tinuntinun be fali be sran nga be di junman Wunmiɛn-lolɛ-cɛn’n nun’n nin be nga be diman junman Wunmiɛn-lolɛ-cɛn’n nun’n, kpɛkun be toli Zoyada m’ɔ ti Ɲanmiɛn ɲrun jranfuɛ’n+ i lɔ.
10 I sin’n, Ɲanmiɛn ɲrun jranfuɛ’n fali Famiɛn Davidi i cua mun nin i ɲrɛn kukluuklu nga be o Zoova i sua’n nun lɔ’n fa mannin sran ya su kpɛn mun.
11 Kpɛkun famiɛn sua’n i gladi difuɛ’m+ be ko jranjrannin sua’n i fama su lele fa ju sua’n i bɛ su. Alɛ kunlɛ ninnge’m be o be tinuntinun be sa nun. Be jranjrannin tɛ yiwlɛ’n + nin famiɛn sua’n be wun lɛ, yɛ be bo sin yiali famiɛn’n.
12 I sin’n, Zoyada fali famiɛn’n i wa’n+ fiteli. Kpɛkun ɔ fali famiɛn kle’n wlɛli i ti, ɔ fali Lalofuɛ’n*+ sieli i ti’n su. Be sieli i famiɛn, yɛ be guɛli i ti su ngo. I sin’n, be boli ndɛ, yɛ be seli kɛ: “Maan wie’n wla fi famiɛn’n nin-o!”+
13 Kɛ Atali tili sran mɔ be su wanndi’n be ngan’n, ɔ ka lɛ ɔli nvlefuɛ’m be wun lɔ, Zoova i sua’n nun lɔ.+
14 I sin’n, Atali nían-ɔn, famiɛn’n jin sua’n i ja mlomlo’n i wun lɛ, kɛ nga be fa yo i titi’n sa.+ Kpɛnngbɛn mun nin awɛ bofuɛ’m+ be o famiɛn’n i wun lɛ. Nvle’n nun sran’m be kwlaa be di aklunjɔɛ, yɛ be bo awɛ. Kɛ Atali wunnin i sɔ’n, ɔ titili i wun tralɛ’m be nun, kpɛkun ɔ kpan seli kɛ: “B’a cici min wun ndɛ-o! B’a cici min wun ndɛ-o!”
15 Sanngɛ Zoyada m’ɔ ti Ɲanmiɛn ɲrun jranfuɛ’n seli sran ya su kpɛn+ mɔ be nian sonja’m be su’n be kɛ: “Amun yi bla sɔ’n sran’m be nun fite. Sran kwlaa ng’ɔ su i su’n, amun fa tokofi be kun i!” Afin Ɲanmiɛn ɲrun jranfuɛ’n seli kɛ: “Nán amun kun i Zoova i sua’n nun.”
16 Yɛ sran’m be trali bla’n niɔn. Kɛ be juli lika nga nnɛn kpanngɔ’m be sin be wlu famiɛn’n i sua’n+ nun lɛ’n, be kunnin i lɛ.
17 I sin’n, Zoyada yoli maan Zoova nin famiɛn’n ɔ nin nvlefuɛ mun be trali aenguɛ+ naan bé yó Zoova i nvle titi. Asa ekun’n, ɔ yoli maan famiɛn’n nin nvlefuɛ’m be trali aenguɛ.+
18 I sin’n, nvle’n nun sran’m be kwlaa be ɔli Baali i sua’n nun lɔ, be bubuli i tɛ yiwlɛ mun,+ be bubuli i nzɔliɛ ninnge’m be kwlaa,+ kpɛkun be kunnin Matan m’ɔ ti Baali i ɲrun jranfuɛ’n+ tɛ yiwlɛ’m be ɲrun lɛ.
Kpɛkun Ɲanmiɛn ɲrun jranfuɛ’n sieli sran wie mun naan be nian Zoova i sua’n su.+
19 Asa ekun’n, ɔ fali sran ya su kpɛn+ mun nin famiɛn’n i sasafuɛ mun nin famiɛn sua’n i gladi difuɛ mun,+ ɔ nin nvle’n nun sran’m be kwlaa naan be fa famiɛn’n Zoova i sua’n nun lɛ be wɔ famiɛn’n i awlo lɔ. Be sinnin gladi difuɛ’m be anuan’n nun lɛ yɛ be ɔli-ɔ. Kɛ be juli lɔ’n, ɔ trannin famiɛn’m be bia’n su.+
20 I sɔ’n ti’n, nvle’n nunfuɛ’m be kwlaa be dili aklunjɔɛ, yɛ klɔ’n nun tɔli fɔuun. Afin be fali tokofi be kunnin Atali, famiɛn’n i awlo lɔ.
21 Kɛ Zoasi+ káci famiɛn’n, nn ɔ le afuɛ nso.+
Ja ngua lɔ ndɛ mun
^ Ebr., “famiɛn diwlɛ’n nun ba’m be kwlaa.”
^ Ebr., “Karifuɛ.”
^ Ebr., “wanndifuɛ mun.”
^ Ebre nun’n, “Zesɔdu’n” i bo’n yɛ: “Like Bo Ase Wlalɛ.”
^ Ebr., “kɛ ɔ́ fíte’n yɛ kɛ ɔ́ wlú’n.”
^ Atrɛkpa’n, fluwa mɔ be ɲɔnɲɔn i mɔ Ɲanmiɛn Mmla’n klɛ su’n niɔn.
