Yona 4:1-11
4 Lakini jambo hilo lilimchukiza sana Yona, akakasirika sana.
2 Basi akasali hivi kwa Yehova: “Ee Yehova, je, sikujua utafanya jambo hili nilipokuwa katika nchi yangu? Ndiyo sababu tangu awali nilijaribu kukimbilia Tarshishi;+ kwa maana nilijua kwamba wewe ni Mungu mwenye huruma* na rehema, hukasiriki upesi, una upendo mwingi mshikamanifu,+ na unahuzunishwa na msiba.
3 Sasa, Ee Yehova, nakusihi uniue, kwa maana afadhali nife badala ya kuishi.”+
4 Yehova akamuuliza: “Je, una sababu nzuri ya kuwaka hasira?”
5 Ndipo Yona akatoka jijini, akaketi chini upande wa mashariki wa jiji. Akajenga kibanda hapo na kuketi kivulini ili aone jambo litakalolipata jiji hilo.+
6 Kisha Yehova Mungu akaotesha mmung’unye* ili Yona apate kivuli kwa ajili ya kichwa chake na ili kupunguza taabu yake. Basi Yona akaufurahia sana mmung’unye huo.
7 Lakini siku iliyofuata, wakati wa mapambazuko, Mungu wa kweli akamwamuru kiwavi aushambulie mmung’unye huo, nao ukanyauka.
8 Joto la jua lilipoanza kuongezeka, Mungu akaleta pia upepo wa mashariki wenye joto kali, na jua likamchoma Yona kichwani, karibu azimie. Akaendelea kuomba afe,* na kuendelea kusema: “Afadhali nife badala ya kuishi.”+
9 Mungu akamuuliza Yona: “Je, una sababu nzuri ya kuwaka hasira kwa sababu ya mmung’unye?”+
Ndipo Yona akasema: “Nina sababu nzuri ya kukasirika, nimekasirika sana hivi kwamba natamani kufa.”
10 Lakini Yehova akamwambia: “Uliuhurumia mmung’unye ambao hukuufanyia kazi yoyote wala kuukuza; uliota na kukua usiku mmoja na kunyauka usiku uliofuata.
11 Je, mimi pia sipaswi kulihurumia jiji kubwa la Ninawi,+ ambalo lina watu zaidi ya 120,000 ambao hata hawajui kutofautisha jema na baya,* na kuwahurumia pia wanyama wao wengi?”+
