Bai na kontenido

Bai na kontenido

 KAPÍTULO 9

“Kristu, e Poder di Dios”

“Kristu, e Poder di Dios”

1-3. (a) Ki eksperensia spantoso e disipelnan a pasa aden riba Laman di Galilea, i kiko Hesus a hasi? (b) Pakiko Hesus ta ser yamá korektamente “Kristu, e poder di Dios”?

E DISIPELNAN di Kristu tabata morto spantá. Nan tabata krusando Laman di Galilea ora un tormenta a sorprendé nan. Sin duda nan a yega di mira tormenta riba e lago aki kaba—al fin i al kabo, algun di e hòmbernan aki tabata piskadó pa hopi aña. * (Mateo 4:18, 19) Pero esaki tabata “un tempestat di bientu fuerte,” i den un ratu di ora el a pone e laman bira masha brutu. E hòmbernan a traha desesperadamente pa maniobrá e boto, pero e tormenta tabata demasiado fuerte. Olanan haltu tabata “dal den e boto,” i esaki a kuminsá yena ku awa. Apesar dje konmoshon, Hesus tabata morto na soño patras den e boto, kansá despues di a pasa henter un dia ta siña e multitutnan. Mirando nan bida na peliger, e disipelnan a lant’é i rog’é: “Señor, salba nos, nos ta peresé!”—Marko 4:35-38; Mateo 8:23-25.

2 Hesus no tabatin miedu. Ku konfiansa total, el a reprendé tantu e bientu komo e laman: “Silensio, keda ketu!” Mesora e bientu i laman a obedesé—e tempestat a kaba na nada, e olanan a baha i laman “a bira kompletamente kalmu.” Awor sí e disipelnan a haña miedu! “Ta ken esaki ta anto?” nan a kuminsá flùister otro. En bèrdat, ta ken por ta kapas di reprendé bientu i laman komo si fuera ta un mala mucha e ta korigiendo?—Marko 4:39-41; Mateo 8:26, 27.

 3 Pero Hesus no tabata kualkier hende. E poder di Yehova a aktua mediante dje i na fabor di dje na un manera ekstraordinario. Bou di inspirashon apòstel Pablo por a referí korektamente na dje komo “Kristu, e poder di Dios.” (1 Korintionan 1:24) Den ki manera Dios ta manifestá su poder den Hesus? I ki influensia e manera ku Hesus ta hasi uso di poder por tin den nos bida?

E Poder di Dios Su Yu Unigénito

4, 5. (a) Ki poder i outoridat Yehova a delegá na su Yu unigénito? (b) Kon e Yu aki a ser prepará pa realisá e propósitonan relashoná ku e kreashon di su Tata?

4 Tuma por ehèmpel e poder ku Hesus tabatin durante su eksistensia prehumano. Yehova a ehersé su “poder eterno” ora el a krea su Yu unigénito, kende despues a bira konosí komo Hesukristu. (Romanonan 1:20; Kolosensenan 1:15) Despues di esei, Yehova a delegá un enorme poder i outoridat n’e Yu aki, dunand’e e tarea di realisá e propósitonan relashoná ku Su kreashon. En konekshon ku e Yu, Beibel ta bisa: “Tur kos a bin na eksistensia pa medio di dje, i fuera di dje nada di loke ta eksistí no a bin na eksistensia.”—Juan 1:3.

5 Nos no por kaba di komprondé e magnitut di e tarea ei. Imaginá e poder ku ta nesesario pa krea miónes di angel poderoso, e universo físiko ku su míles di miónes di galaksia i tera ku su variedat abundante di bida. Pa kumpli ku e tareanan aki, e Yu unigénito tabatin e forsa di mas poderoso den universo na su disposishon: spiritu santu di Dios. P’e Yu aki, tabata un gran plaser di por a fungi komo e Trahadó Eksperto ku Yehova a usa pa krea tur otro kos.—Proverbionan 8:22-31.

6. Despues di Hesus su morto riba tera i su resurekshon, ki poder i outoridat el a haña?

6 E Yu unigénito por a risibí asta mas poder i outoridat? Despues di e morto di Hesus riba tera i su resurekshon, el a bisa: “Tur outoridat a wòrdu duná na mi den shelu i riba tera.” (Mateo 28:18) Sí, Hesus a haña e kapasidat i derecho  pa ehersé poder universalmente. Komo “Rei di Reinan i Señor di Señornan,” el a haña outorisashon pa “pone un fin na tur dominio i na tur outoridat i poder”—tantu visibel komo invisibel—ku ta oponiendo su Tata. (Revelashon 19:16; 1 Korintionan 15:24-26) Ku eksepshon di E mes, Dios ‘no a laga nada ku no ta sometí na’ Hesus.—Hebreonan 2:8; 1 Korintionan 15:27.

7. Pakiko nos por ta sigur ku Hesus hamas lo hasi mal uso di e poder ku Yehova a dun’é?

7 Nos tin ku preokupá ku Hesus ta bai hasi mal uso di su poder? Di ningun manera! Hesus tin un gran amor pa su Tata i lo no hasi nada pa desagrad’é. (Juan 8:29; 14:31) Hesus sa muchu bon ku hamas Yehova, komo e Todopoderoso, lo hasi mal uso di su poder. Hesus mes a mira kon Yehova ta buska oportunidat p’e “sostené fuertemente esnan ku nan kurason ta kompletamente di dje.” (2 Krónikanan 16:9) Sí, Hesus tin e mesun amor ku su Tata tin pa humanidat, di manera ku nos por konfia ku semper Hesus lo usa su poder pa un bon kousa. (Juan 13:1) Hesus a establesé un registro intachabel den esaki. Laga nos konsiderá e poder ku e tabatin tempu ku e tabata riba tera i kon el a ser motivá pa us’é.

“Poderoso den . . . Palabra”

8. Despues ku Hesus a ser ungí, el a risibí poder pa hasi kiko, i kon el a usa su poder?

8 Tur kos ta mustra ku Hesus no a hasi milager tempu ku el a lanta komo mucha na Názarèt. Pero kosnan a kambia despues ku el a batisá na aña 29 di nos era, tempu ku e tabatin 30 aña di edat. (Lukas 3:21-23) Beibel ta bisa: “Dios a ungié ku spiritu santu i ku poder, i . . . el a bai rònt, hasiendo bon i kurando tur ku tabata bou di poder di Diabel.” (Echonan 10:38) E echo ku Hesus tabata “hasiendo bon” no ta demostrá ku Hesus a hasi bon uso di su poder? Despues ku Yehova a ungié, el a bira “un profeta poderoso den echo i den palabra.”—Lukas 24:19.

9-11. (a) Unda Hesus a duna gran parti di su siñansa, i kiko tabata un reto p’e? (b) Pakiko e multitutnan a keda asombrá ku Hesus su manera di siña?

 9 Den ki sentido Hesus tabata poderoso den palabra? Hopi bes el a siña hende na aire liber—na oriya di laman, riba barika di seru i tambe den kaya i riba plasa. (Marko 6:53-56; Lukas 5:1-3; 13:26) Esnan ku tabata skuch’é por a simplemente kana bai si su palabranan no a kapta nan interes. Den un époka ku no tabatin buki imprimí ainda, e hendenan ku a skuch’é ku apresio tabatin ku warda su palabranan den nan mente i kurason. Pues e siñansa di Hesus mester tabata fasinante, kla pa komprondé i fásil pa kòrda. Pero e reto aki no tabata problema pa Hesus. Tuma por ehèmpel su Sermon Riba Seru.

10 Un mainta trempan na aña 31 di nos era, un multitut di hende a bini huntu riba un barika di seru banda di Laman di Galilea. Algun a bin for di Hudea i Yerusalèm, 100 pa 110 kilometer leu. Otronan a bin for di e kosta di Tiro i Sidon, den nort. Hopi hende enfermo a yega serka Hesus pa mishi kuné, i el a kura nan tur. Ora no a sobra ni sikiera un hende seriamente malu mas den e multitut, el a kuminsá siña nan. (Lukas 6:17-19) Ora el a kaba di papia un ratu despues, e multitut a keda asombrá pa loke nan a tende. Pakiko?

11 Añanan despues, un di e personanan ku a tende e sermon ei a skirbi: “E multitutnan a keda asombrá di su siñansa; pasobra e tabata siña nan manera un hende ku tin outoridat.” (Mateo 7:28, 29) Nan por a sinti Hesus su poder ora el a papia. El a papia komo representante di Dios i a respaldá su siñansa ku e outoridat di e Palabra di Dios. (Juan 7:16) Hesus su deklarashonnan tabata kla, su spièrtamentunan tabata konvinsente i su argumentunan tabata irefutabel. Su palabranan a toka esensia di asuntunan i tambe kurason di esnan ku a skuch’é. El a siña nan kon pa haña felisidat, kon pa resa, kon pa buska e Reino di Dios i kon pa traha riba un futuro sigur. (Mateo 5:3–7:27) Su palabranan tabata un estímulo pa esnan ku  tabatin hamber p’e bèrdat i hustisia. E personanan ei tabata dispuesto pa “nenga” nan mes i bandoná tur kos pa por a siguié. (Mateo 16:24; Lukas 5:10, 11) Esei tabata un bon testimonio di e poder di Hesus su palabranan!

“Poderoso den Echo”

12, 13. Den ki sentido Hesus tabata “poderoso den echo,” i kua ta e vários tipo di milagernan ku el a hasi?

12 Tambe Hesus tabata “poderoso den echo.” (Lukas 24:19) E Evangelionan ta papia spesífikamente di mas ku 30 milager ku Hesus a hasi—tur ku poder di Yehova. * (Lukas 5:17) E milagernan di Hesus tabatin efekto riba bida di míles di hende. Den dos di e milagernan ei so kaba—dia el a alimentá 5.000 hòmber, i despues dia el a alimentá 4.000 hòmber “sin konta hende muhé i mucha”—lo por tabatin un total di 20.000 hende enbolbí!—Mateo 14:13-21; 15:32-38.

“Nan a mira Hesus ta kana riba laman”

13 Hesus a hasi un gran variedat di milager. E tabatin outoridat riba demoño; e tabata saka nan sin problema. (Lukas 9:37-43) E tabatin poder riba materia; el a hasi awa bira biña. (Juan 2:1-11) Pa asombro di su disipelnan, el a kana riba e laman brutu di Galilea. (Juan 6:18, 19) E por a kura tur enfermedat, manera mal funshonamentu di órgano, malesa króniko i enfermedatnan fatal. (Marko 3:1-5; Juan 4:46-54) El a efektuá e kurashonnan ei den vários manera. Hesus a kura algun hende for di un distansia, miéntras ku otronan el a mishi ku nan personalmente. (Mateo 8:2, 3, 5-13) El a kura algun instantáneamente, otronan gradualmente.—Marko 8:22-25; Lukas 8:43, 44.

14. Bou di ki sirkunstansianan Hesus a demostrá ku e tabatin poder pa deshasí efekto di morto?

14 Algu sobresaliente ta ku Hesus tabatin e kapasidat di deshasí  efekto di morto. Beibel ta papia di tres okashon ku Hesus a lanta morto: el a debolbé un mucha muhé di 12 aña na su mayornan, el a duna un mama biuda su úniko yu bèk, i a debolbé un ruman stimá na su ruman muhénan. (Lukas 7:11-15; 8:49-56; Juan 11:38-44) No tabatin niun situashon demasiado difísil p’e. El a lanta e mucha muhé di 12 aña for di su kama di morto djis despues ku el a muri. El a resusitá yu di e biuda for di e tabla ku nan tabata karg’é ariba, opviamente, riba e mesun dia ku el a muri. I el a lanta Lázaro for di graf despues ku esaki tabata morto pa kuater dia.

Uso di Poder na un Manera Inegoista, Responsabel i ku Kompashon

15, 16. Ki evidensia tin ku Hesus no a usa su poder na un manera egoista?

15 Bo por imaginá bo kuantu mal uso di poder un gobernante lo a hasi si ta e tabatin e poder di Hesus? Pero Hesus tabata un hòmber sin piká. (1 Pedro 2:22) E no a laga su mes wòrdu kontaminá pa e egoismo, e ambishon ni e golosidat ku ta impulsá hende imperfekto pa usa nan poder pa perhudiká otronan.

16 Nunka Hesus a usa su poder na un manera egoista, por ehèmpel, pa saka bentaha personal. Ora e tabatin hamber, el a nenga di hasi piedra bira pan pa su mes. (Mateo 4:1-4) E poko rekursonan ku e tabatin ta mustra ku e no a usa su poder pa finnan materialista. (Mateo 8:20) Tin mas evidensia ku su obranan poderoso a brota for di motivashonnan inegoista. Ora el a hasi milager, esei a representá sierto sakrifisio p’e. Ora e tabata kura hende enfermo, poder tabata sali for di dje. E tabata konsiente di esaki, ounke tabata trata aki di un kurashon so. (Marko 5:25-34) No opstante, el a laga henter e multitut mishi kuné, i nan a ser kurá. (Lukas 6:19) Ki un spiritu di sakrifisio propio!

17. Kon Hesus a demostrá ku el a usa su poder na un manera responsabel?

17 Hesus a usa su poder na un manera responsabel. Nunka  el a realisá obranan poderoso djis pa impreshoná otro hende òf meramente pa duna un show. (Mateo 4:5-7) El a nenga di hasi milager djis pa satisfasé e kuriosidat maligno di Herodes. (Lukas 23:8, 9) En bes di gaba tokante su poder, hopi bes el a instruí esnan ku el a kura pa no bisa niun hende. (Marko 5:43; 7:36) E no tabata kier pa hende saka konklushon tokante dje a base di informenan sensashonalista.—Mateo 12:15-19.

18-20. (a) Kiko a influensiá e manera ku Hesus a usa su poder? (b) Kiko bo ta pensa di e manera ku Hesus a kura un hòmber surdu?

18 E hòmber poderoso aki, Hesus, tabata masha diferente for di e gobernantenan ku a ehersé nan poder sin ningun sintimentu i sin tene kuenta ku e nesesidatnan i sufrimentu di otro hende. Hesus tabatin interes den hende. E solo echo ku el a mira hende afligí a konmov’é asina tantu ku el a sinti su mes motivá pa aliviá nan sufrimentu. (Mateo 14:14) E tabatin un interes profundo den nan sintimentu i nesesidatnan, i esaki a influensiá e manera ku el a usa su poder. Nos ta haña un ehèmpel konmovedor di esaki na Marko 7:31-37.

19 N’e okashon ei, un gran multitut di hende a haña Hesus i a trese hopi hende ku tabata enfermo p’e, i el a kura nan tur. (Mateo 15:29, 30) Pero Hesus a duna atenshon spesial na un sierto hòmber. E hòmber aki tabata surdu i apénas por a papia. Hesus lo a ripará ku sea e hòmber aki tabata hopi nervioso òf e tabatin bèrgwensa. Ku kompashon, Hesus a hala e hòmber un banda i hib’é leu for di e multitut na un lugá privá. E ora ei Hesus a hasi algun señal pa mustra e hòmber kiko e tabata bai hasi. El “a hinka su dede den su orea, i el a skupi i a mishi ku su lenga.” * (Marko 7:33) Despues, Hesus a wak  na shelu i a suspirá un súplika. Ku e akshonnan aki e lo a laga e hòmber komprondé: ‘Loke mi ta bai hasi pa bo ta ku poder di Dios.’ Finalmente, Hesus a bisa: “Sea habrí!” (Marko 7:34) Ku esei, e hòmber por a tende atrobe, i e por a papia normalmente.

20 E solo echo ku Hesus den su gran kompashon a tene kuenta ku sintimentu di e personanan ku el a kura ku poder di Dios, ta konmové nos! No ta un konsuelo pa sa ku Yehova a pone e Reino Mesiániko den man di un Gobernante asina kompasivo i amoroso?

Señal di Kosnan Binidero

21, 22. (a) E milagernan di Hesus ta un señal di kiko den futuro? (b) Dor ku Hesus tin dominio riba e forsanan di naturalesa, kiko nos por spera bou di su reinado?

21 E obranan poderoso ku Hesus a efektuá riba tera tabata djis un muestra di e bendishonnan asta mas grandi ku mester bini bou di su reinado. Den Dios su mundu nobo, Hesus lo bolbe hasi milager—pero e biaha aki na eskala mundial! Pensa riba algun di e perspektivanan emoshonante ei!

22 Hesus lo restorá e balansa perfekto di ekologia di tera. Kòrda ku el a demostrá su dominio riba e forsanan di naturalesa dor di kalma un tormenta. No tin duda anto ku bou di Kristu su Reinado, humanidat lo no tin nodi tene miedu ku orkan, temblor, volkan òf otro desaster natural lo hasi nan daño. En bista ku Hesus ta e Trahadó Eksperto, esun ku Yehova a usa pa krea tera i tur bida riba dje, e ta komprondé perfektamente kon tera ta hinká den otro. E sa kon pa usa su rekursonan na un manera adekuá. Bou di su gobernashon, henter tera lo ser kombertí den un paradeis.—Lukas 23:43.

23. Komo Rei, kon Hesus lo satisfasé e nesesidatnan di humanidat?

23 Ke tal di e nesesidatnan di humanidat? E echo ku Hesus por a alimentá míles di hende generosamente, hasiendo uso di masha poko medio, ta garantisá nos ku bou di su  gobernashon niun hende lo sufri di hamber. Sí, un abundansia di kuminda, repartí na un manera hustu, lo pone fin na hamber unabes pa semper. (Salmo 72:16) E echo ku e tabatin poder riba enfermedat ta indiká ku hende malu, siegu, surdu, mankaron i koho lo wòrdu kurá di un forma kompletu i permanente. (Isaias 33:24; 35:5, 6) E echo ku e por a resusitá morto ta un garantia ku komo Rei selestial e tin poder tambe pa resusitá e hopi miónes di personanan ku su Tata ta kòrda ku plaser.—Juan 5:28, 29.

24. Ora nos reflekshoná riba e poder di Hesus, kiko nos tin ku tene na mente i pakiko?

24 Segun ku nos ta reflekshoná riba e poder di Hesus, laga nos tene na mente ku e Yu aki ta imitá su Tata perfektamente. (Juan 14:9) E manera ku Hesus ta usa su poder ta duna nos un bista kla kon Yehova ta usa su poder. Por ehèmpel, pensa riba e manera tierno ku Hesus a kura un sierto leproso. Yen di kompashon, Hesus a mishi ku e hòmber i a bis’é: “Mi kier.” (Marko 1:40-42) Pa medio di e relatonan aki, ta komo si fuera Yehova ta bisa nos: ‘Asina ami ta usa mi poder!’ Bo no ta sinti bo konmoví pa alabá nos Dios todopoderoso i gradisié pa e manera tan amoroso ku e ta usa su poder?

^ par. 1 Ta masha komun pa tormentanan surgi diripiente riba Laman di Galilea. Debí ku e lago aki ta hopi bou di nivel di laman (rònt di 200 meter), e aire ta muchu mas kayente riba e lago ku den e área rònt di dje, i esaki ta krea disturbionan atmosfériko. Bientunan fuerte ta baha riba e Vaye di Hordan for di Seru Hermon, situá den nort. Di un momentu pa otro un tempu kalmu por kambia bira un tormenta fuerte.

^ par. 12 Ademas, tin biaha e Evangelionan ta agrupá hopi milager bou di un solo deskripshon general. Por ehèmpel, na un okashon “henter [un] stat” a bin serka Hesus, i el a kura “hopi” hende enfermo.—Marko 1:32-34.

^ par. 19 Tantu e hudiunan komo hende no-hudiu a konsiderá skupimentu komo un medio òf señal di kurashon, i e skrituranan rabíniko ta papia di skupi komo remedi. Tal bes Hesus a skupi djis pa mustra e hòmber ku lo e wòrdu kurá. Sea komo sea, Hesus no a usa su skupi komo remedi natural.