Bai na kontenido

Bai na kontenido

 KAPÍTULO 8

Poder pa Restorá—Yehova “Ta Hasi Tur Kos Nobo”

Poder pa Restorá—Yehova “Ta Hasi Tur Kos Nobo”

1, 2. Ki pèrdidanan ta hasi e famia humano tristu awe, i ki efekto esakinan tin riba nos?

UN MUCHA ta pèrdè òf kibra su ko’i hunga stimá i ta kuminsá yora tristu asina. Su yorá ta kibra bo kurason! Pero bo a yega di mira kon e kara di e mucha ta bria ora su tata dun’é bèk loke el a pèrdè? P’e mayor, kisas ta djis un asuntu di haña e ko’i hunga òf drech’é. Pero e mucha sí ta masha kontentu i ta keda fasiná. El a haña bèk loke el a kere ku lo e no mira nunka mas!

2 Yehova, e Tata di tur tata, tin e poder pa rekuperá loke su yunan riba tera lo por konsiderá totalmente pèrdí. Klaru ku nos no ta referí na un simpel ko’i hunga. Den e “tempunan trabahoso” aki nos tin ku enfrentá pèrdidanan muchu mas serio. (2 Timoteo 3:1-5) Awe mas ku nunka, hende ta kore peliger di pèrdè kosnan ku nan ta duna hopi balor, manera kas, propiedat, empleo i asta nan salú. E destrukshon di medio ambiente i e eksterminashon ku esei ta kousa di hopi sorto di kosnan bibiente tambe lo tin nos bastante molestiá. Pero no tin nada ku ta dal nos mas duru ku e morto di un ser kerí. E sintimentu di pèrdida i impotensia ei por ta devastador.—2 Samuel 18:33.

3. Ki perspektiva i konsuelo Echonan 3:21 ta ofresé, i pa medio di kiko Yehova lo realisá esaki?

3 Ta un gran konsuelo anto pa siña tokante e poder ku Yehova tin pa restorá kosnan! Manera nos lo mira, e variedat di kos ku Dios por i lo rekuperá pa su yunan riba tera ta berdaderamente asombroso. De echo, Beibel ta mustra ku e propósito di Yehova ta pa ‘restorá tur kos.’ (Echonan 3:21) Pa logra esaki, Yehova lo usa e Reino Mesiániko den man di su Yu Hesukristu. Evidensia ta mustra ku e Reino aki a  kuminsá goberná den shelu na 1914. * (Mateo 24:3-14) Kiko lo ser restorá? Laga nos konsiderá algun di Yehova su aktonan grandioso di restorashon. Tin un di nan ku nos por mira i eksperensiá kaba. E otronan ta bai tuma lugá na gran eskala den futuro.

Restorashon di Adorashon Puru

4, 5. Kiko a sosodé ku e pueblo di Dios na aña 607 promé ku nos era, i ki speransa Yehova a duna nan?

4 Un di e kosnan ku Yehova a restorá kaba ta adorashon puru. Pa por kapta loke esaki ta nifiká, laga nos analisá brevemente e historia di e reino di Huda. Esei lo yuda nos komprondé algun di e maneranan emoshonante ku Yehova ta usa su poder pa restorá.—Romanonan 15:4.

5 Djis imaginá kon e hudiunan fiel a sinti nan na aña 607 promé ku nos era, ora Yerusalèm a ser destruí. Nan stat stimá tabata un ruina kompletu i su murayanan a keda tur destrosá. Pió ainda, e tèmpel glorioso ku Salomon a konstruí, e úniko sentro di adorashon puru na Yehova riba henter e tera, tabata un monton di ruina. (Salmo 79:1) A hiba e sobrebibientenan den eksilio na Babilonia, lagando nan tera natal komo un lugá bandoná frekuentá pa bestia salbahe. (Jeremias 9:11) For di un punto di bista humano, a parse manera ku tur kos a kaba pa nan. (Salmo 137:1) Pero Yehova, kende hopi tempu pasá a profetisá e destrukshon aki, a duna speransa ku un tempu di restorashon tabata aserkando.

6-8. (a) Ki tema vários profeta hebreo a skirbi tokante dje, i kon e profesianan ei a kumpli inisialmente? (b) Den tempu mas resien, kon e pueblo di Dios a mira hopi profesia di restorashon kumpli?

 6 De echo, e tema di restorashon ta unu ku vários profeta hebreo a skirbi tokante dje. * Via nan, Yehova a primintí un tera restorá i habitá di nobo, fértil, protehá for di bestia feros i atake di enemigu. El a deskribí nan tera restorá komo un berdadero paradeis! (Isaias 65:25; Ezekiel 34:25; 36:35) Pero mas importante ainda, adorashon puru lo a ser restablesé i e tèmpel lo a ser rekonstruí. (Mikeas 4:1-5) E profesianan aki a duna e hudiunan eksiliá speransa, loke a yuda nan soportá nan 70 aña di koutiverio den Babilonia.

7 Por fin e tempu di restorashon a yega. Librá for di Babilonia, e hudiunan a regresá Yerusalèm i rekonstruí e tèmpel di Yehova ei. (Esdras 1:1, 2) Tanten ku nan a keda fiel na adorashon puru, Yehova a bendishoná nan i hasi nan tera fértil i próspero. El a protehá nan di enemigu i di bestia feros ku a invadí nan tera pa dékadanan. Kuantu nan mester a alegrá den Yehova su poder pa restorá! Pero e susesonan ei a representá solamente un kumplimentu inisial i limitá di e profesianan di restorashon. Lo mester a tuma lugá un kumplimentu mayor “den e último dianan,” den nos propio tempu, ora e Heredero di Rei David primintí hopi tempu pasá lo a ser entronisá.—Isaias 2:2-4; 9:6, 7.

8 Djis despues ku Hesus a wòrdu entronisá den e Reino selestial na 1914, el a atendé e nesesidatnan spiritual di e pueblo fiel di Dios riba tera. Meskos ku e konkistadó Siro di Persia a libra un restu di hudiu for di Babilonia na aña 537 promé ku nos era, Hesus a libra un restu di hudiu spiritual—su siguidónan—for di e influensia di un Babilonia moderno, e imperio mundial di religion falsu. (Romanonan 2:29; Revelashon 18:1-5) For di 1919 padilanti, adorashon  puru a rekuperá su debido lugá den bida di kristiannan berdadero. (Malakias 3:1-5) For di e tempu ei, e pueblo di Yehova a ador’é den su tèmpel spiritual ku el a hasi limpi, es desir, e areglo di Dios pa adorashon puru. Pakiko esaki ta importante pa nos awe?

Pakiko Restorashon Spiritual Ta Importante

9. Despues di e era apostóliko, kiko e iglesianan di kristiandat a hasi ku e adorashon di Dios, pero kiko Yehova a hasi den nos tempu?

9 Laga nos repasá historia. E kristiannan di promé siglo a disfrutá di hopi bendishon spiritual. Pero Hesus i e apòstelnan a profetisá ku adorashon berdadero lo degenerá i disparsé. (Mateo 13:24-30; Echonan 20:29, 30) Despues di e era apostóliko, kristiandat a lanta kabes. Miembronan di klero a adoptá siñansanan i kustumbernan pagano. Tambe nan a hasi kasi imposibel pa hende aserká Dios, dor di pint’é komo un Trinidat misterioso i dor di siña hende konfesá na pastor i resa na Maria i vários “santu” en bes di siña nan resa na Yehova. Awor, despues di hopi siglo ku siñansa kristian a ser korumpí asina, kiko Yehova a hasi? Den e mundu djawe—un mundu yen di falsedat religioso i kontaminá pa práktikanan malbado—el a intervení i restorá adorashon puru! Sin eksagerá nos por bisa ku e restorashon aki ta un dje desaroyonan mas importante den tempu moderno.

10, 11. (a) Ki dos aspekto e paradeis spiritual tin, i ki efekto esakinan tin riba bo? (b) Ki tipo di personanan Yehova a reuní den e paradeis spiritual i kiko nan lo haña e privilegio di mira?

10 P’esei awe kristiannan berdadero ta disfrutá di un paradeis spiritual. Kiko e paradeis aki ta enserá? Dos aspekto prinsipal. E promé ta e adorashon puru di e Dios berdadero, Yehova. El a bendishoná nos ku un forma di adorashon ku ta liber di mentira i siñansanan trosí. El a bendishoná nos ku alimento spiritual. Esaki ta permití nos siña tokante nos Tata selestial, agrad’é i hala serka dje. (Juan 4:24) E di dos aspekto di e paradeis spiritual tin di haber ku hende. Manera Isaias a profetisá, “den e último dianan,” Yehova a siña  su adoradónan e kamindanan di pas. El a abolí guera entre nos. Apesar di nos imperfekshonnan, e ta yuda nos bisti e personalidat di “e hende nobo.” E ta bendishoná nos esfuersonan ku su spiritu santu, lokual ta produsí bunita fruta den nos. (Efesionan 4:22-24; Galationan 5:22, 23) Ora bo ta obra na armonia ku e spiritu di Dios, bo ta ègt forma parti di e paradeis spiritual.

11 Yehova a trese huntu den e paradeis spiritual aki e klase di hende ku e ta stima; hende ku ta stim’é, ku ta stima pas i ku ta “konsiente di nan nesesidat spiritual.” (Mateo 5:3, NW) Hende asina lo haña e privilegio di mira un restorashon asta mas espektakular: esun di humanidat i di henter tera.

“Mira, Mi Ta Hasi Tur Kos Nobo”

12, 13. (a) Pakiko e profesianan di restorashon mester kumpli den mas manera? (b) Kiko ta e propósito di Yehova p’e tera manera el a deklará den Edén, i pakiko esaki ta duna nos speransa pa futuro?

12 No ta den sentido spiritual so hopi di e profesianan di restorashon mester kumpli. Por ehèmpel, Isaias a skirbi di un tempu ora ku e enfermonan, e kohonan, e siegunan i e surdunan lo kura, i ora ku lo traga asta morto pa semper. (Isaias 25:8; 35:1-7) E promesanan ei no a kumpli literalmente den Israel di antigwedat. I ounke e promesanan aki a kumpli den un sentido spiritual den nos tempu, tin tur motibu pa kere ku den futuro nan lo kumpli literalmente i na gran eskala. Kon nos por sa esei?

13 Den Edén Yehova a splika bon kla kiko ta su propósito pa tera: Lo e mester a keda habitá pa un famia humano felis, sano i uní. Hòmber i muhé mester a kuida tera i tur su kriaturanan, i transformá henter e planeta den un paradeis. (Génesis 1:28) E realidat aktual ta masha diferente. Pero nos por tin e siguransa ku Yehova su propósito no ta faya nunka. (Isaias 55:10, 11) Hesus, e Rei Mesiániko ku Yehova a nombra, lo trese e Paradeis mundial aki.—Lukas 23:43.

14, 15. (a) Kon Yehova lo bai hasi “tur kos nobo”? (b) Kon bida lo ta den Paradeis, i ki aspekto di dje ta atraé bo mas?

 14 Imaginá bo ta mira henter e tera transformá den un Paradeis! Yehova ta bisa di e tempu ei: “Mira, mi ta hasi tur kos nobo.” (Revelashon 21:5) Pensa riba kiko esei lo nifiká. Ora Yehova kaba di usa su poder pa destruí kontra e mundu malbado bieu aki, lo keda “shelunan nobo i un tera nobo.” Esaki ta nifiká ku un gobièrnu nobo lo reina for di shelu riba un sosiedat nobo riba tera ku ta konsistí di hende ku ta stima Yehova i ku ta hasi su boluntat. (2 Pedro 3:13) Satanas, huntu ku su demoñonan, lo ser silensiá kompletamente. (Revelashon 20:3) Pa promé bes den míles di aña, humanidat lo ta liber di e influensia korupto, vengativo i negativo ei. Sin duda, hende lo haña un gran alivio.

15 Por fin nos lo por kuida e bunita planeta aki manera nos lo mester a hasi originalmente. Tera tin un kapasidat natural di restorá su mes. Lagonan i riunan kontaminá por purifiká nan mes si eliminá e fuente di kontaminashon; e sikatrisnan di kamponan di bataya por kura si gueranan kaba. Lo ta un plaser pa traha na armonia ku e leinan natural di tera i yuda transform’é den un parke manera un hardin, un Edén mundial ku tur tipo di bestia i mata! En bes di eksterminá esakinan pa loko, hende lo ta na pas ku henter kreashon riba tera. Ni sikiera mucha lo no tin nodi tene miedu di bestia feros.—Isaias 9:6, 7; 11:1-9.

16. Ki restorashon tur persona fiel lo eksperensiá den Paradeis?

16 Komo persona tambe nos lo eksperensiá un restorashon. Despues di Armagedón, e sobrebibientenan lo mira kurashonnan milagroso riba eskala mundial. Meskos ku Hesus a hasi tempu ku e tabata riba tera, lo e usa e poder ku Dios a dun’é pa kura hende siegu, surdu, koho i enfermo. (Mateo 15:30) Hende di edat lo rekobrá nan salú i lo keda enkantá ku nan vigor hubenil. (Jòb 33:25) Ploi lo disparsé, brasa i pianan lo bira stret i múskulonan lo kontraé ku energia  renobá. Tur hende fiel lo sinti kon e efektonan di piká i imperfekshon ta disparsé gradualmente. Nos lo ta masha gradisidu na Yehova Dios pa e maravia di su poder pa restorá. Laga nos enfoká awor riba un aspekto spesialmente alentador di e tempu di restorashon emoshonante ei.

E Mortonan Ta Bolbe na Bida

17, 18. (a) Pakiko Hesus a reprendé e saduseonan? (b) Ki sirkunstansianan a konmové Elias p’e roga Yehova resusitá e mucha?

17 Den e promé siglo di nos era algun lider religioso, e saduseonan, no tabata kere den resurekshon. Hesus a reprendé nan bisando: “Boso ta kiboká; boso no ta komprondé e Skrituranan, ni e poder di Dios.” (Mateo 22:29) Sí, Beibel ta revelá ku Yehova tin poder pa restorá. Kon asina?

18 Visualisá un suseso di e tempu di Elias. Un biuda tabatin e kurpa sin bida di su úniko yu den su brasanan. Profeta Elias, huéspet di e biuda pa algun tempu, lo mester a keda den shòk. Mas promé, el a yuda prevení ku e mucha aki a muri di hamber. Probablemente Elias a haña hopi kariño p’e chikitin. E mama a keda hopi kibrá. E hobensitu aki tabata e úniko rekuerdo bibu di su kasá defuntu. Tal bes el a konta riba e yu aki pa kuid’é den su behes. Yen di angustia, e biuda a teme ku e tabata sufriendo kastigu pa un fayo di pasado. Elias no por a soportá di mira kon esei a hasi e doló di e muhé aki bira pió. El a tuma e kurpa di e mucha suavemente for di skochi di su mama, karg’é hiba den su kuarto i pidi Yehova Dios duna e mucha su alma, òf bida, bèk.—1 Reinan 17:8-21.

19, 20. (a) Kon Abraham a mustra ku e tabatin fe den Yehova su poder pa restorá, i kiko tabata e base pa tal fe? (b) Kon Yehova a rekompensá e fe di Elias?

19 Elias no tabata e promé persona ku a kere den resurekshon. Siglonan mas promé Abraham tambe tabatin fe ku Yehova tin poder pa restorá—i Abraham tabatin bon motibu pa kere esei. Tempu Abraham tabatin 100 aña i Sara 90,  Yehova a restorá nan fakultatnan reproduktivo ku tabata morto. E milager ei a permití Sara haña un yu. (Génesis 17:17; 21:2, 3) Mas despues, ora e mucha tabata grandi kaba, Yehova a pidi Abraham sakrifiká su yu. Abraham a mustra fe, rekonosiendo ku Yehova lo por a duna Isaak, su yu stimá, bida bèk. (Hebreonan 11:17-19) E fe firme ei por splika pakiko Abraham, promé ku el a subi e seru pa ofresé su yu, a sigurá su sirbidónan ku tantu e komo Isaak lo bolbe huntu.—Génesis 22:5.

“Mira, bo yu ta bibu!”

20 Yehova a spar Isaak, pues e no tabatin nodi resusit’é e tempu ei. Sin embargo, den e kaso di Elias sí e yu di e biuda tabata morto kaba—pero e no a keda asina pa hopi tempu. Yehova a rekompensá e fe di e profeta dor di resusitá e mucha! Despues Elias a entregá e mucha na su mama ku e palabranan inolvidabel aki: “Mira, bo yu ta bibu!”—1 Reinan 17:22-24.

21, 22. (a) Kiko tabata e propósito di e resurekshonnan registrá den Beibel? (b) Kon ekstenso e resurekshon lo ta den Paradeis, i ken lo efektu’é?

21 Pues pa promé bes den Beibel, nos ta mira kon Yehova a usa su poder pa restorá e bida di un ser humano. Mas despues, Yehova a duna Eliseo, Hesus, Pablo i Pedro tambe poder pa lanta morto. Klaru ku esnan ku a ser resusitá, ku tempu a muri atrobe. No opstante, e relatonan di Beibel ei ta duna nos un bunita bista adelantá di loke futuro lo trese.

22 Den Paradeis, Hesus lo kumpli ku su papel komo “e resurekshon i e bida.” (Juan 11:25) Lo e resusitá miónes i miónes di hende, dunando nan un oportunidat pa biba pa semper den Paradeis riba tera. (Juan 5:28, 29) Pensa riba e goso inimaginabel ku amigu i famianan stimá lo tin di por topa otro di nobo i brasa otro despues ku morto a separá  nan pa hopi tempu! Henter humanidat lo alabá Yehova pa su poder pa restorá.

23. Kiko tabata e mayor demostrashon di Yehova su poder, i kon esaki ta garantisá nos speransa pa futuro?

23 Yehova a duna nos un garantia sólido ku e speransanan ei ta sigur. Den e mayor demostrashon di su poder, el a resusitá su Yu, Hesus, komo un kriatura spiritual poderoso i dun’é un rango ku ta dirèkt bou di E mes. Hesus resusitá a aparesé na sentenáres di testigu okular. (1 Korintionan 15:5, 6) Asta pa esnan ku ta duda, e pruebanan ei mester ta mas ku sufisiente. Yehova tin poder pa restorá bida.

24. Pakiko nos por ta sigur ku Yehova lo resusitá e mortonan, i ki speransa kada un di nos por karga?

24 Aparte di tin poder pa duna bida n’e mortonan, Yehova tin e deseo tambe pa hasi esei. E hòmber fiel Jòb a bisa bou di inspirashon ku Yehova realmente ta anhelá pa resusitá e mortonan. (Jòb 14:15) Bo no ta sinti bo atraí na nos Dios, kende ta ansioso pa usa su poder pa restorá den un manera amoroso? Pero kòrda ku e resurekshon ta djis ún aspekto di Yehova su gran akto di restorashon pa futuro. Segun ku bo ta hala mas i mas serka dje, semper balorá e speransa presioso di por t’ei pa mira Yehova “hasi tur kos nobo.”—Revelashon 21:5.

^ par. 3 “E tempunan di restorashon di tur kos” a kuminsá ora Yehova a establesé e Reino Mesiániko ku un heredero di e fiel Rei David riba trono. Yehova a primintí David ku un heredero di dje lo goberná pa semper. (Salmo 89:35-37) Pero despues ku Babilonia a destruí Yerusalèm na aña 607 promé ku nos era, niun desendiente humano di David a sinta riba e trono di Dios. Ta Hesus, kende a nase riba tera komo heredero di David, a bira e Rei primintí pa hopi tempu kaba ora el a ser koroná den shelu.

^ par. 6 Por ehèmpel, Moisés, Isaias, Jeremias, Ezekiel, Oseas, Joel, Amos, Abdias, Mikeas i Sofonias, tur a trata e tema aki.