Karta pa e Romanonan 2:1-29
2 P’esei, Ruman, sin importá ken bo ta,+ bo no tin derecho di husga hende ku ta hasi e kosnan ku bo mes tambe ta hasi.+ Ora bo ta husga nan, bo ta kondená bo mes.
2 Nos sa ku Dios su manera di husga ta hustu,* i e ta kondená hende ku ta hasi e kosnan ei.
3 Ruman, bo ta husga hende ku ta hasi e mesun kosnan ku bo tambe ta hasi. Bo ta kere ku abo sí lo skapa e huisio di Dios?
4 Dios ta mustra bo su gran bondat,+ i e no ta ekspresá su rabia kontra bo.+ Mas bien, e ta tene pasenshi+ ku bo.* Bo no ta apresiá esei? Bo no ta realisá ku Dios, na un manera bondadoso, ta purba di yuda bo yega na arepentimentu?+
5 Pero komo ku bo ta tèrko i bo no ke arepentí, Dios ta masha rabiá ku bo. Sin falta, Dios lo ekspresá su rabia i kastigá bo riba e dia di su huisio hustu.+
6 I Dios lo rekompensá òf kastigá* kada persona pa loke nan a hasi:+
7 Dios lo duna hende ku ta sigui hasi loke ta bon bida eterno. E hendenan ei ta buska e gloria i onor ku Dios ta duna i un kurpa ku no ta kaba na nada.+
8 Sinembargo, Dios lo ekspresá su rabia i furia+ kontra hende ku ta gusta pleita, ku ta desobedesé e bèrdat i ku ta sigui hasi loke ta inhustu.
9 Tur hende* ku ta hasi loke ta malu, sea nan ta hudiu òf griego,* lo haña nan ku hopi problema* i sufrimentu.
10 Pero tur hende ku ta hasi loke ta bon lo risibí e gloria, onor i pas ku Dios ta duna. Dios lo duna e kosnan ei na hende hudiu promé+ i despues na hende griego+ tambe.
11 Pasobra Dios no ta hasi distinshon di persona.+
12 Tur hende ku a peka sin ku nan tabata bou di Lei di Moises tambe lo muri maske nan no tabata bou di Lei.+ Pero tur hende ku a peka miéntras ku nan tabata bou di Lei lo ser husgá segun e leinan ei.+
13 Dios no ta konsiderá hende hustu djis pasobra nan ta tende loke Lei ta bisa. Mas bien, ta hende ku ta kumpli ku Lei Dios lo konsiderá hustu.+
14 Hende di e nashonnan no tin e leinan di Dios.+ Pero ora ku di nan mes,* nan ta hasi loke e leinan ei ta bisa, e hendenan ei ta demostrá ku e leinan ei ta den nan kurason.
15 Ku nan akshonnan, nan ta demostrá ku loke Lei ta bisa ta skirbí den nan kurason, i nan konsenshi ta konfirmá esei. Nan pensamentunan ta laga nan sa si nan akshonnan ta bon òf malu.*
16 Tur e kosnan ei lo ta bisto riba e dia ku Dios, pa medio di Kristu Hesus, ta husga loke hende ta hasi i pensa den sekreto.+ Tur esei ta parti di e bon notisianan ku mi ta prediká.
17 Algun di boso ta yama boso mes hudiu;+ boso ta konfia den Lei, i boso ta broma ku boso amistat ku Dios.
18 Boso konosé Dios su boluntat, i boso sa kiko ta e kosnan importante, pasobra boso ta risibí instrukshon* for di Lei.+
19 Ademas, boso ta konvensí ku boso por guia hende siegu i ku boso por iluminá hende ku ta den skuridat.
20 Boso ta kere ku boso por korigí hende bobo i siña hende ku ta manera mucha chikitu* djis pasobra boso tin un konosementu i komprondementu básiko di e bèrdatnan ku tin den Lei.
21 Boso ta siña otro hende, pero boso mes no ta hasi loke boso ta siña hende.+ Boso ta prediká: “No hòrta,”+ pero boso mes ta hòrta.
22 Boso ta bisa: “No kometé adulterio,”*+ pero boso mes ta kometé adulterio. Boso ta bisa ku boso ta odia dios falsu,* pero boso ta hòrta tèmpel di dios falsu.
23 Boso ta masha orguyoso ku boso tin Lei di Dios, pero boso ta kibra Lei; asina boso ta desonrá Dios.
24 Pasobra manera ta pará skirbí den Skritura: “Pa motibu di boso komportashon hende di e nashonnan ta papia malu di* e nòmber di Dios.”+
25 Sirkunsishon*+ tin balor solamente si boso ta kumpli ku Lei;+ pero si boso ta kibra Lei, ta komo si fuera boso nunka tabata sirkunsidá.
26 P’esei, si un persona ku no ta sirkunsidá+ ta kumpli ku e rekisitonan hustu di Lei, Dios lo konsider’é komo un hende sirkunsidá.+
27 Boso a ser sirkunsidá i boso a ser siñá tokante Lei, pero boso no ta kumpli ku Lei. P’esei, ora un persona ku no ta físikamente sirkunsidá sí ta kumpli ku Lei, e persona ei ta kondená boso.
28 Pues, no ta un hende su aparensia ta hasié un berdadero hudiu,+ i berdadero sirkunsishon no ta loke hende ta hasi ku nan kurpa.+
29 Pero ser un berdadero hudiu tin di haber ku loke un persona ta di paden.+ Ta e persona su kurason ta ser sirkunsidá+ pa medio di spiritu santu. Su sirkunsishon no ta pa medio di Lei di Moises.+ E persona ei lo haña elogio di Dios, no di hende.+
Nota
^ Lit.: “ta basá riba bèrdat.”
^ Òf: “Dios ta demostrá su gran bondat, su gran miserikòrdia i su gran pasenshi.”
^ Lit.: “Dios lo paga.”
^ Òf: “Alma di tur hende.”
^ Lit.: “tribulashon.”
^ Òf: “di naturalesa.”
^ Òf: “Nan pensamentunan ta akusá nan òf diskulpá nan.”
^ Òf: “ta ser instruí oralmente.”
^ Esaki ta referí na hende ku mester haña mas konosementu i komprondementu.
^ Lit.: “imágen.” Òf: “odia ídolo.”
^ Lit.: “ta blasfemá.”
