Karta pa e Romanonan 11:1-36
11 Akaso esei ke men ku Dios a rechasá su pueblo?+ Klaru ku nò! Mi tambe ta un israelita; mi ta un desendiente* di Ábraham, i mi ta di e tribu di Bènyamin.
2 Dios no a rechasá su pueblo, sí, e promé pueblo ku el a skohe.*+ Boso no sa loke Skritura ta bisa tokante Elías? El a keha tokante Israel serka Dios. El a bisa:
3 “Yehova,* nan a mata bo profetanan, i nan a basha bo altarnan abou. Ta mi so a keda. Awor, nan ta buska ami* tambe pa mata.”+
4 Pero kiko Dios a kontest’é? “A sobra 7.000 hende di mi pueblo ku no a hinka rudia pa Baal.”+
5 Aworakí ta meskos. Tin un grupo chikitu* di israelita+ ku Dios a skohe debí na su bondat inmeresí.
6 Awor, si Dios a skohe nos debí na su bondat inmeresí,+ e no por ta pasobra nos a traha pa ser skohé.+ Si tabata asina, su bondat inmeresí lo no ta realmente bondat inmeresí.
7 Kiko nos por bisa antó? Henter e pueblo di Israel no a haña loke e tabatin masha gana di haña, pero e poko hendenan ku Dios a skohe sí a haña esei.+ E restu di e pueblo a nenga di skucha.*+
8 Manera ta pará skirbí den Skritura: “Dios a pone nan kai den un soño profundo.+ P’esei, nan no ta mira, ni nan no ta tende. Anto te dia djawe, nan ta den e kondishon ei.”+
9 Ademas, David ta bisa: “Laga nan banketenan* bira un las i un trampa ku ta pone nan kai i ser kastigá.
10 Laga nan wowo bira skur pa nan no mira, i hasi nan karga den bida pisá.”*+
11 Akaso esei ke men ku ora e hudiunan a trompeká, nan a kai sin ku nan por a rekuperá? Klaru ku nò! Pero pa motibu di e fayo ku nan a kometé, hende di e nashonnan a haña salbashon, i esei ta hasi e hudiunan yalurs.+
12 E fayo di e hudiunan a nifiká bendishon pa mundu, i e echo ku nan kantidat a mengua a nifiká bendishon pa hende di e nashonnan.+ Pues, e bendishon lo ta mas grandi ainda ora ku nan kantidat kompleto* ser rekohé!
13 Awor, mi ta papia ku boso ku ta hende di e nashonnan. Komo un apòstel ku a ser mandá na e nashonnan,+ mi ta balorá mi sirbishi na Dios mashá.*+
14 I mi ta spera tambe ku, di un manera òf otro, mi por hasi mi propio pueblo* yalurs riba boso pa motibu di loke boso a risibí, i asina salba algun di nan.
15 E echo ku Dios a rechasá nan+ a hasi posibel ku algun hende den mundu por haña un bon relashon* ku Dios. Pero, si Dios aseptá nan* bèk, esei lo ta komo si fuera nan a bini bèk for di morto i haña bida!
16 Ademas, si un parti di mansa ku ta ser ofresé komo promé fruta ta santu, henter e mansa tambe ta santu. I si rais di un palu ta santu, e takinan tambe ta santu.
17 Sinembargo, Dios a kap algun taki kita afó. Anto el a ènter boso entre e takinan ku a resta. Dios a hasi esei maske boso tabata taki di palu di oleifi shimaron. Awor, boso tambe ta benefisiá di nutrishon* di e rais di palu di oleifi.
18 Pero no pensa ku boso ta mihó ku* e takinan ku Dios a kap. Si boso ta pensa ku boso ta mihó ku* nan,+ kòrda ku no ta boso ta karga e rais; ta e rais ta karga boso.
19 Algun di boso lo bisa: “Dios a kap algun taki pa por ènter ami den e palu.”+
20 Esei ta bèrdat! Dios a kap nan kita afó+ pasobra nan no tabatin fe, pero boso ta na boso lugá ainda pa motibu di boso fe.+ Pues, tene kuidou; no sea orguyoso.
21 Pasobra si Dios no a keda ku e takinan original di e palu di oleifi kultivá, lo e no spar boso tampoko.
22 Pues, boso por mira ku Dios ta bondadoso+ pero tambe severo.* E tabata severo ku e hendenan ku a kai+ pasobra nan no tabatin fe. Pero Dios ta bondadoso ku boso, tanten ku boso keda digno di risibí su bondat. Si no ta asina, lo e kap boso tambe kita afó.
23 Anto si e hudiunan kuminsá mustra fe atrobe, Dios lo ènter nan tambe den e palu,+ pasobra Dios por bolbe ènter nan.
24 Dios a kòrta boso for di un palu di oleifi shimaron i, kontra naturalesa, el a ènter boso den e palu di oleifi kultivá. Di mes, lo ta hopi mas fásil pa bolbe ènter e takinan original den nan mes palu di oleifi!
25 Pues Rumannan, pa boso no kere ku boso ta masha sabí, mi ke pa boso sa ku Dios tin un sekreto sagrado.*+ E sekreto sagrado ei ta esaki: Un parti di e pueblo di Israel a bira kabesura,* i nan lo keda asina te ora ku e kantidat di hende di e nashonnan ku Dios a skohe bira kompleto.
26 Esei ta e manera ku e kantidat kompleto di Israel+ lo ser salbá. Manera ta pará skirbí den Skritura: “E salbador* lo sali di Siòn,+ i lo e yuda e desendientenan di Yákòb* pa nan stòp di hasi maldat.
27 I ora mi pordoná nan nan pikánan,+ lo mi sera un pakto ku nan.”+
28 Ta bèrdat ku algun hudiu ta enemigu di e bon notisianan di Dios, i esei a benefisiá boso. Pero pa motibu di e promesa ku Dios a hasi nan antepasadonan, Dios a stima nan i skohe algun di nan.+
29 Pues, Dios lo no sinti duele ku el a duna regalo, ni lo e no sinti duele ku el a yama sierto hende.
30 Pasobra un tempu, boso tabata desobedesé Dios,+ pero Dios a mustra miserikòrdia+ na boso pasobra e hudiunan tabata desobediente.+
31 Dios ta mustra miserikòrdia na boso pasobra e hudiunan ta desobediente. Pero awor Dios por mustra miserikòrdia na nan tambe, meskos ku el a mustra na boso.
32 Pasobra tur hende ta desobediente,+ i Dios a laga nan keda den e kondishon ei, pa asina e por mustra miserikòrdia na tur hende.+
33 E bendishonnan di Dios ta masha abundante mes! Dios su sabiduria i konosementu ta masha profundo. Ta imposibel pa komprondé kompletamente su manera di husga i tur loke e ta hasi!
34 Pasobra ta pará skirbí: “Ken a siña konosé Yehova* su manera di pensa, òf ken por dun’é konseho?”+
35 Òf: “Ken a yega di duna Dios algu,* ku awor Dios tin ku pag’é bèk?”+
36 Pasobra tur kos ta bini di Dios, i nan ta eksistí pa medio di dje i p’e. Dios meresé gloria pa semper. Amèn.
Nota
^ Lit.: “simia.”
^ Òf: “rekonosé.”
^ Òf: “mi alma.”
^ Òf: “un restu.”
^ Òf: “a bira sin heful.”
^ Lit.: “nan mesa.”
^ Òf: “i laga nan lomba ta semper doblá.”
^ Òf: “ora ku e kantidat kompleto di hudiu i di hende di e nashonnan.”
^ Òf: “mi ta glorifiká mi ministerio.”
^ Lit.: “mi karni.”
^ Òf: “aseptá algun hudiu.”
^ Òf: “por rekonsiliá.”
^ Òf: “gordura.”
^ Òf: “no menospresiá.”
^ Òf: “boso ta menospresiá.”
^ Òf: “strèn.”
^ Òf: “a bira sin heful.”
^ Esta, Israel.
^ Òf: “libertador.”
^ Òf: “duna Dios algu promé.”
