Karta pa e Romanonan 8:1-39

  • Pa medio di spiritu santu, nos tin bida i libertat (1-11)

  • Spiritu santu ta konvensé hende ku nan ta yu adoptá di Dios (12-17)

  • Kreashon ta warda riba e libertat di e yunan di Dios (18-25)

  • ‘Spiritu santu ta supliká Dios pa nos’ (26, 27)

  • Dios a skohe un grupo di hende di antemano (28-30)

  • Nos ta sali viktorioso danki na e amor di Dios (31-39)

8  P’esei, e hendenan ku ta den union ku Kristu Hesus no ta ser kondená. 2  Bon mirá, ta e lei di spiritu santu* ku ta duna boso bida a libra boso+ ku ta disipel di* Kristu Hesus for di lei di piká i morto. 3  Lei di Moises no por a libra boso+ pasobra hende ta imperfekto.*+ Dios sí por a libra boso. El a hasi esei ora el a manda su mes Yu+ komo hende*+ pa kaba ku piká. Asina Dios a kondená piká ku ta den kurpa di hende, 4  pa nos por kumpli ku e rekisitonan hustu di Lei.+ Nos ta logra hasi esei pasobra nos ta laga spiritu santu guia nos i no e deseonan di nos kurpa imperfekto.*+ 5  Hende ku ta laga e deseonan di nan kurpa imperfekto guia nan ta blo pensa riba loke nan kurpa ke hasi.+ Pero hende ku ta laga spiritu santu guia nan ta keda pensa riba kos ku tin di haber ku spiritu santu.+ 6  Ora hende ta blo pensa riba loke nan kurpa ke hasi, esei lo hiba na morto.+ Pero ora hende ta keda pensa riba kos ku ta na armonia ku spiritu santu, esei lo hiba na bida i pas.+ 7  Hende ku ta blo pensa riba loke nan kurpa ke hasi ta bira enemigu di Dios,+ pasobra nos kurpa imperfekto no ke obedesé e leinan di Dios; de echo, nos kurpa imperfekto no por obedesé nan tampoko. 8  Pues, hende ku ta laga e deseonan di nan kurpa imperfekto guia nan, no por agradá Dios. 9  Pero Rumannan, boso no ta laga e deseonan di boso kurpa imperfekto guia boso. Si Dios su spiritu santu di bèrdat ta den boso, esei ke men ku ta spiritu santu+ ta guia boso. Si un persona no tin Kristu su manera di pensa,* e persona ei no ta pertenesé na Kristu. 10  Boso kurpa ta muri pa motibu di piká. Pero si boso ta den union ku Kristu,+ spiritu santu ta nifiká bida pa boso pasobra boso ta ser konsiderá hustu. 11  Dios su spiritu santu a lanta Hesus for di morto. Si e spiritu santu ei ta den boso, e ora ei Dios, kende a lanta Kristu Hesus for di morto,+ lo duna boso kurpa* tambe bida+ mediante Dios su spiritu santu ku ta den boso. 12  Ku otro palabra, Rumannan, nos no ta obligá di laga e deseonan di nos kurpa guia nos.+ 13  Si boso ta laga e deseonan di boso kurpa guia boso, boso lo muri sigur. Pero si boso ta laga e poder di spiritu santu yuda boso mata e mal obranan di boso kurpa,+ boso lo biba.+ 14  Bon mirá, tur hende ku ta laga Dios su spiritu santu guia nan ta yu di Dios.+ 15  Pues, Dios su spiritu santu no ta hasi boso esklabo, ni e no ta pone boso bolbe biba ku miedu. Mas bien, pa medio di e spiritu ei, nos a ser adoptá komo yu di Dios. I e spiritu ei ta motivá nos pa grita: “Aba,* Tata!”+ 16  Dios su spiritu santu ta konvensé nos*+ ku nos ta yu di Dios.+ 17  Pues, si nos ta su yunan, esei ke men ku nos ta heredero tambe. Sí, nos lo risibí un herensia di Dios. Nos lo risibí e herensia+ ei huntu ku Kristu. Pero promé, nos tin ku sufri meskos ku Kristu a sufri,+ pa asina nos tambe por ser glorifiká* meskos kuné.+ 18  Mi ta haña ku e sufrimentu ku nos ta pasa aden aktualmente no ta nada kompará ku e gloria ku Dios lo revelá pa medio di nos.+ 19  Henter kreashon* ta spera ansiosamente pa Dios revelá e gloria di su yunan.+ 20  Pasobra kreashon no tabata kier a ser sentensiá na un bida sin speransa pa futuro,*+ pero Dios a permití esei. Sinembargo, ora Dios a dikta sentensia, el a duna nos e siguiente speransa: 21  Kreashon lo ser librá+ di sklabitut na un kurpa ku ta kaba na nada, i kreashon lo tin e glorioso libertat di e yunan di Dios. 22  Pasobra nos sa ku te ku awor, henter kreashon ta sigui keña i sufri. 23  Pero, nos tin spiritu santu, ku ta e promé parti di e kosnan ku lo bini.* Apesar di esei, nos ta keña den nos mes,+ miéntras ku nos ta spera ansiosamente pa nos ser adoptá kompletamente komo yu.+ Na e tempu ei, nos lo ser librá di nos kurpa pa medio di e reskate. 24  Ora nos a ser salbá di piká, nos a haña e speransa ei. Pero ora un hende ta mira kumplimentu di loke e ta spera, e no tin mester di speransa mas. Akaso un hende ta keda spera riba un kos ku e ta mira? 25  Pero ainda nos no a mira+ kumplimentu di nos speransa,+ p’esei nos tin ku sigui warda ansiosamente riba dje ku pasenshi.*+ 26  Ademas, spiritu santu por yuda nos ora nos ta suak.+ Tin biaha, ora nos tin ku hasi orashon, nos no sa kiko nos mester pidi den orashon. Ora nos ta keña den nos kurason pero nos no tin e palabranan korekto pa ekspresá esei, spiritu santu por supliká Dios pa nos. 27  Dios ta saminá nos kurason,+ i e sa kiko spiritu santu ta pidi pa e rumannan santu,* pasobra spiritu santu ta supliká di akuerdo ku Dios su boluntat. 28  Nos sa ku Dios ta laga tur kos* kooperá huntu pa bienestar di e hendenan ku ta stim’é, sí, pa bienestar di e hendenan ku Dios a skohe di akuerdo ku su propósito.+ 29  For di prinsipio, Dios a pensa di skohe e hendenan ei, i el a disidí* di antemano ku nan lo a bira meskos ku* su Yu.+ Di e manera ei, su Yu lo ta yu mayó+ entre hopi ruman.+ 30  Anto e hendenan ku Dios a skohe di antemano+ ta e hendenan ku Dios a yama.+ Ademas, e hendenan ku el a yama ta esnan ku el a konsiderá hustu.+ Por último, e hendenan ku el a konsiderá hustu ta e hendenan ku el a glorifiká.+ 31  Pues, kiko nos por bisa tokante e kosnan ei? Si Dios ta ku nos, ken por vense nos?+ 32  Dios no a spar ni su mes Yu. Mas bien, el a sakrifik’é pa nos tur.+ Pues, lo e no duna nos bondadosamente tur otro kos tambe ku nos tin mester? 33  Ken por akusá e hendenan ku Dios a skohe?+ Niun hende! Pasobra ta Dios ta bisa ku nan ta hustu.+ 34  Ken por kondená nan? Niun hende! Pasobra Kristu Hesus a muri pa nan, i el a ser lantá for di morto. Anto awor, e ta na man drechi di Dios,+ i e tambe ta supliká Dios pa nos.+ 35  Akaso tin algu ku por separá nos for di e amor ku Kristu tin pa nos?+ Akaso problema,* angustia, persekushon, hamber, falta di paña,* peliger òf violensia* lo por separá nos for e amor ku Kristu tin pa nos?+ 36  Manera ta pará skirbí den Skritura: “Komo ku nos ta pertenesé na bo, nos ta enfrentá morto konstantemente;* sí, pa nan, nos ta manera karné ku nan ta bai mata.”+ 37  Pero ku yudansa di e Persona ku ta stima nos, nos ta sali kompletamente viktorioso+ for di tur e kosnan ei. 38  Mi ta konvensí ku nada no por separá nos for di e amor ku Dios tin pa nos: ni morto ni bida, ni angel ni gobièrnu, ni loke tin awor ni loke tin ku bini, ni niun poder,+ 39  ni haltura ni profundidat, ni niun otro kreashon. No tin apsolutamente nada ku por separá nos for di e amor di Dios ku a ser demostrá mediante Kristu Hesus, nos Señor.

Nota

^ Òf: “ku ta den union ku.”
^ Esei ta referí na e influensia poderoso di spiritu santu.
^ Òf: “pasobra hende ta suak i pekadó.”
^ Òf: “manda su mes Yu den un kurpa ku ta manera esun di nos, nos ku ta pekadó.”
^ Òf: “nos ta kana di akuerdo ku spiritu santu i no di akuerdo ku deseo di karni.”
^ Òf: “su aktitut mental.” Lit.: “spiritu.” Na griego, pnéuma.
^ Lit.: “kurpa mortal.”
^ Aba tabata un ekspreshon hebreo òf arameo. Ora yu tabata papia ku nan tata, nan tabata yam’é Aba. Aba tabata un ekspreshon di kariño i di rèspèt.
^ Lit.: “ta duna testimonio huntu ku nos spiritu.”
^ Òf: “nos por haña un posishon elevá.”
^ Refiriendo prinsipalmente na hende.
^ Òf: “ser sometí na un bida di banidat.”
^ Lit.: “nos tin e promé frutanan di spiritu.”
^ Lit.: “perseveransia.”
^ Lit.: “e santunan.”
^ Òf: “tur su obranan.”
^ Òf: “lo a ser formá konforme e imágen di.”
^ Òf: “stipulá.”
^ Lit.: “tribulashon.”
^ Lit.: “desnudes.”
^ Òf: “spada.”
^ Lit.: “henter dia.”

Derecho di outor pa e publikashon akí