Karta pa e Romanonan 12:1-21
12 P’esei Rumannan, komo ku Dios a mustra kompashon na boso, mi ta supliká boso pa duna boso kurpa+ i boso bida na Dios. Hasi esei manera ta un sakrifisio santu+ ku ta agradá Dios boso ta presentá, i usa boso kapasidat di pensa*+ pa sirbi Dios.
2 Anto stòp di laga e mundu* akí influensiá* boso. Mas bien, kambia* boso manera di pensa,+ i asina kambia e persona ku boso ta. E ora ei, boso por komprobá pa boso+ mes kiko ta boluntat di Dios, sí, su boluntat ku ta bon, agradabel i perfekto.
3 Dios a mustra mi bondat inmeresí. P’esei, mi ta animá boso tur pa no pensa ku boso ta masha importante.*+ Mas bien, pensa na un manera balansá tokante boso mes,* di akuerdo ku e midí di fe ku Dios a duna kada un di boso.+
4 Bon mirá, un kurpa ta konsistí di hopi parti,+ pero no ta tur e partinan ta hasi mesun kos.
5 Asina tambe, aunke nos ta hopi, nos ta un solo kurpa, pasobra nos ta uní ku Kristu. Anto individualmente, kada un di nos ta un parti di kurpa ku ta dependé di otro.*+
6 Komo ku Dios ta bondadoso,* el a duna kada un di nos sierto abilidat* pa kumpli ku diferente tipo di asignashon.+ Pues, si nos tin e abilidat di profetisá, laga nos profetisá di akuerdo ku e fe ku nos a risibí.
7 Si nos tin un asignashon pa sirbi, laga nos hasi nos bèst pa sirbi; si nos tin e abilidat di siña otro hende, laga nos hasi nos bèst pa siña otro hende.+
8 Òf si nos tin e abilidat di animá hende, laga nos sigui animá hende.+ Si nos ta kompartí ku otro hende,* laga nos hasi esei generosamente.+ Si un persona ta dirigí, lag’é hasi esei diligentemente.+ Si un persona ta mustra miserikòrdia, lag’é hasi esei di kurason.+
9 Boso amor pa otro mester ta sinsero.*+ Odia loke ta malu;+ tene duru na* loke ta bon.
10 Stima otro, i demostrá masha kariño* pa otro manera ta famia boso ta. Tuma inisiativa pa mustra onor na otro.+
11 Traha duru;* no hasi kos di floho.+ Laga spiritu santu yena boso ku entusiasmo.+ Sirbi Yehova* ku henter boso kurason.+
12 Laga boso speransa hasi boso kontentu. No entregá ora boso ta enfrentá problema.*+ Perseverá den orashon.+
13 Kompartí loke boso tin ku e rumannan santu* ku ta den nesesidat.+ Semper buska manera pa mustra hospitalidat.+
14 Sigui bendishoná* hende ku ta persiguí boso.+ Bendishoná nan, i no maldishoná nan.+
15 Alegrá ku hende ku ta alegrá. Yora ku hende ku ta yora.
16 Preokupá pa otro hende meskos ku boso ta preokupá pa boso mes.* No kana rònt ku idea grandi, pero keda humilde,+ pa boso no pensa ku boso ta masha sabí.+
17 No paga malu ku malu.+ Ora bo ta hasi algu, tene kuenta ku loke ta bon den bista di tur hende.
18 Si ta posibel, te asina leu ku ta dependé di boso, keda na pas ku tur hende.+
19 Rumannan stimá, no tuma vengansa; laga esei pa Dios. Laga Dios ekspresá su rabia+ pa e kosnan malu ku ta ser hasí. Pasobra ta pará skirbí den Skritura: “‘Ami lo tuma vengansa. Ami lo duna hende nan pago meresí.’ Esei ta loke Yehova* ta bisa.”+
20 Mas bien, hasi esaki: “Si bo enemigu tin hamber, dun’é di kome; si e tin set, dun’é algu di bebe. Hasiendo esei, lo bo por sorprendé e persona i hasi su kurason moli.”*+
21 No laga malu vense bo, pero sigui vense malu hasiendo loke ta bon.+
Nota
^ Òf: “di rasoná.”
^ Òf: “forma.”
^ Òf: “transformá.”
^ Òf: “no pensa mas di boso mes di loke ta nesesario.”
^ Òf: “mustra sano huisio den boso manera di pensa.”
^ Òf: “nos ta uní ku otro.”
^ Òf: “Debí na Dios su bondat inmeresí.”
^ Lit.: “don; regalo.”
^ Òf: “nos ta duna; nos ta kontribuí.”
^ Òf: “pega na.”
^ Lit.: “sin hipokresia.”
^ Òf: “tierno kariño.”
^ Òf: “Sea diligente.”
^ Lit.: “tribulashon.”
^ Lit.: “e santunan.”
^ Òf: “Deseá loke ta bon pa.”
^ Òf: “Tene e mesun aktitut pa ku otro ku boso tin pa ku boso mes.”
^ Òf: “lo bo montoná karbon sendí riba su kabes.”
