Karta pa e Romanonan 13:1-14
13 Nos mester obedesé* hende den puesto di outoridat ku ta goberná riba nos.*+ Niun outoridat no por eksistí sin Dios su pèrmit.+ Ta ku Dios su pèrmit e outoridatnan ku ta eksistí awor ta na nan diferente posishonnan.*+
2 P’esei, ken ku ta bai kontra outoridat ta bai kontra areglo di Dios. Hende ku ta bai kontra e areglo di Dios lo ser kondená.*
3 Hende ku ta hasi bon no mester tin miedu di e gobernantenan, pero hende ku ta hasi malu sí mester tin miedu di nan.+ Si boso no ke tin miedu di hende den puesto di outoridat, sigui hasi bon,+ i nan lo elogiá boso.
4 Hende den puesto di outoridat ta den servisio* di Dios pa boso mes bon. Pero si boso ta hasi malu, boso mester tin miedu, pasobra nan tin e derecho i poder pa kastigá hende ku ta hasi malu.* Nan ta den servisio di Dios pa kastigá hende ku ta hasi malu.
5 Pues, ta importante pa boso obedesé hende den puesto di outoridat; no hasi esei solamente pa boso evitá kastigu, pero tambe pa boso keda ku un konsenshi limpi.+
6 Ta p’esei boso ta paga belasting; pasobra e gobernantenan ta den servisio di Dios, i nan ta sirbi pueblo konstantemente.
7 Duna tur hende loke nan tin derecho riba dje: Duna hende ku mester haña belasting tur tipo di belasting ku nan mester haña;+ mustra rèspèt na hende ku mester haña rèspèt;+ mustra onor na hende ku mester haña onor.+
8 No debe niun hende nada; úniko kos ku boso debe otro ta amor.+ Ken ku ta stima su próhimo a kumpli ku Lei.+
9 Pasobra Lei ta bisa: “No kometé adulterio,”+ “no mata,”+ “no hòrta,”+ “no deseá loke ta di otro hende.”*+ E mandamentunan ei i tur e otro mandamentunan ku tin den Lei ta ser resumí den e siguiente mandamentu: “Stima bo próhimo meskos ku bo mes.”+
10 Un hende ku tin amor pa otro hende no ta hasi malu ku su próhimo.+ P’esei, un persona ku ta stima otro hende ta kumpli ku Lei.+
11 Boso mester hasi e kosnan ku mi a bisa boso pasobra boso sa den ki tempu nos ta biba. Ta tempu pa boso lanta for di soño,+ pasobra nos salbashon ta hopi mas serka ku ora nos a bira kreyente.*
12 Anochi ta serka di pasa; e dia ta serka di yega. P’esei, laga nos stòp di hasi e kosnan ku ta pertenesé na skuridat,+ i laga nos usa e armanan di lus.+
13 Laga nos komportá nos mes desentemente,+ manera hende ta hasi ora ta di dia kla. Laga nos no ta hende ku ta festehá na un manera deskontrolá* i ku ta bebe burachi, ni laga nos no ta manera hende ku ta kometé inmoralidat seksual, òf hende ku tin kondukta sinbèrgwensa,*+ òf hende ku ta kana pleita òf hende yalurs.+
14 Mas bien, sigui e ehèmpel di Señor Hesukristu fielmente,*+ i no plania di antemano pa satisfasé deseo egoista.+
Nota
^ Òf: “Tur hende mester ta sumiso na.”
^ Òf: “obedesé e outoridatnan superior,” esta, e gobernantenan.
^ Esta, nan posishon ku por ta sea mas haltu òf mas abou ku otro, pero semper inferior na Dios.
^ Òf: “husgá; kastigá.”
^ Òf: “ta sirbidó.”
^ Òf: “pasobra no ta pòrnada nan ta karga spada.”
^ Òf: “no kudishá.”
^ Òf: “bira disipel di Hesus.”
^ Òf: “hende ku ta kore paranda.”
^ Lit.: “bisti Señor Hesukristu.”
