Karta pa e Romanonan 1:1-32
1 Esaki ta un karta di ami, Pablo, esklabo* di Kristu Hesus. Kristu a skohe mi pa ta apòstel. El a nombra mi* pa prediká e bon notisianan di Dios.+
2 Dios a anunsiá e bon notisianan ei di antemano den Skritura santu pa medio di su profetanan,
3 sí, e bon notisianan tokante Dios su Yu ku a nase komo hende i ku tabata desendiente* di David.+
4 E Yu ei ta Hesukristu, nos Señor. Ta bisto ku e ta Yu di Dios,+ pasobra Dios a usa poder di spiritu santu pa resusit’é for di morto.+
5 Dios a demostrá mi* bondat inmeresí* pa medio di Hesus. Hesus a skohe mi pa ta apòstel+ pa mi por yuda hende di tur nashon+ demostrá fe den dje i obedes’é i asina onra su nòmber.
6 Boso tambe ta entre e hendenan di e nashonnan* ku a ser invitá pa bira siguidó di Hesukristu.
7 E karta akí ta pa tur e hendenan ku Dios ta stima i ku ta biba na Roma, hende ku el a skohe pa ta santu.*
Mi ta deseá pa boso haña bondat inmeresí i pas ku ta bini di Dios, nos Tata, i di nos Señor Hesukristu.
8 Na promé lugá, mi ke bisa ku, den nòmber di Hesukristu, mi ta gradisí mi Dios pa boso fe, pasobra rònt mundu hopi hende ta papia tokante boso fe.
9 Mi ta sirbi Dios ku henter mi kurason,* i mi ta prediká e bon notisianan tokante su Yu. Anto Dios ta mi testigu ku semper mi ta menshoná boso den mi orashonnan.+
10 Mi ta roga Dios yuda mi pa awor sí mi por logra bini serka boso, si esei ta su boluntat.
11 Pasobra mi tin masha gana di mira boso pa mi animá boso, sí, pa usa e abilidat ku Dios a duna mi pa* fortalesé boso fe.
12 Ku otro palabra, mi tin masha gana di mira boso pa nos por fortalesé otro;+ boso por animá mi pa medio di boso fe, i ami por animá boso pa medio di mi fe.
13 Rumannan, mi ke pa boso sa ku hopi biaha mi tabata kier a bini serka boso, pero mi a haña mi strobá. Mi kier a bini pa wak si nos predikashon serka boso lo por tin bon resultado manera ta e kaso serka e hendenan di e otro nashonnan.
14 Mi tin un obligashon pa yuda* tur hende: tantu hende griego komo hende estranhero,* tantu hende eduká komo hende sin edukashon.
15 P’esei, mi ta ansioso pa prediká e bon notisianan na boso tambe ku ta biba na Roma.+
16 Mi no tin bèrgwensa di prediká e bon notisianan,+ pasobra esei ta e medio poderoso ku Dios ta usa pa salba tur hende ku demostrá fe.+ E bon notisianan ei a ser prediká promé na hende hudiu+ i despues na hende griego.*+
17 Pues, hende ku tin fe por mira ku Dios ta revelá su hustisia pa medio di e bon notisianan ei,* i esei ta fortalesé nan fe.+ Esei ta kuadra ku loke tin pará skirbí den Skritura: “Pero hende hustu lo biba pasobra nan tin fe.”+
18 For di shelu, Dios ta basha* su rabia+ riba hende ku ta hasi tur tipo di maldat i tur tipo di kos inhustu. E hendenan ei ta stroba otro hende di konosé e bèrdatnan tokante Dios.+
19 Bon mirá, e hendenan ei mester sa ki sorto di persona Dios ta, pasobra Dios a duna nan sufisiente prueba pa nan sa ta ken e ta.+
20 Ta asina ku for di tempu ku Dios a krea mundu, hende por a konosé Dios su kualidatnan, maske nan no por mira Dios. Si nan studia e kosnan ku el a traha,+ nan por komprondé ku Dios tin poder eterno+ i ku di bèrdat e ta Dios.+ Hende ku no ta hasi kaso di e pruebanan ei no por bini ku e èksküs ku nan no tabata sa.
21 Maske nan konosé Dios, nan no ta duna Dios e onor ku e meresé, ni nan no ta gradisié. Al kontrario, nan manera di pensa ta bobo, i nan no ta demostrá komprondementu.*+
22 Aunke e hendenan ei ta pretendé di ta sabí, nan ta bobo.
23 Na lugá di onra Dios, kende no por muri, nan ta onra imágen trahá den forma di hende ku sí ta muri; nan ta onra imágen di para, imágen di bestia di kuater pata i imágen di bestia ku ta lastra.*+
24 Pues, Dios a bandoná e hendenan ei i laga nan kumpli ku e deseonan impuru di nan kurason. P’esei, nan ta hasi kos masha bergonsoso ku nan kurpa.
25 Nan ta skohe pa kere mentira, en bes di e bèrdatnan tokante Dios. Nan ta adorá* i sirbi loke Dios a krea, en bes di adorá i sirbi e Kreador di tur kos, kende mester ser alabá pa semper. Amèn.*
26 Pa e motibu ei, Dios ta laga nan kumpli ku e deseonan seksual bergonsoso*+ ku nan tin. Hende muhé, en bes di tene relashon seksual na un manera natural,* ta tene relashon seksual na un manera ku ta kontra naturalesa.*+
27 Asina tambe, hende hòmber ta legumai relashon seksual natural ku hende muhé. Anto e hòmbernan ei ta kuminsá satisfasé e deseo seksual desenfrená ku nan tin pa otro hòmber; hòmber ku hòmber+ ta hasi loke ta indesente. Pero nan lo haña e pleno kastigu* ku nan meresé pa nan mal komportashon.+
28 Nan no ta haña ku ta importante pa rekonosé Dios.* Pues, Dios ta laga nan sigui pensa maldat, i komo resultado, nan ta hasi kos ku no ta bon.+
29 Den tur kos, e hendenan ei ta inhustu,+ malisioso, golos+ i malbado. Nan ta yen di envidia.+ Nan ta kometé asesinato;+ nan ta pleita i gaña,+ i nan ta hasi kos ku ta pone hende sufri.+ Ademas, nan ta hasidó di redu,*
30 kalumniadó,+ hende ku ta odia Dios, ònbeskòp, arogante i bromadó. Nan ta sinta plania maldat; nan ta desobediente na nan mayornan+
31 i sin komprondementu.+ Nan ta hende ku no ta kumpli ku nan palabra, hende sin berdadero amor i sin miserikòrdia.
32 Nan sa bon bon ku Dios ta bisa ku hende ku ta praktiká e kosnan ei meresé morto.+ Tòg, nan ta sigui hasi e kosnan ei, i nan ta asta mustra nan aprobashon pa e hendenan ku ta sigui hasi e kosnan ei.
Nota
^ Lit.: “apartá mi.”
^ Lit.: “simia.”
^ Lit.: “nos.” Kisas Pablo a usa e forma plural pa referí na su mes.
^ Lit.: “ku mi spiritu.”
^ Òf: “sí, pa mi kompartí un regalo di Dios ku boso ku lo.”
^ Lit.: “Mi debe.”
^ Òf: “komo hende ku no ta griego.”
^ Òf: “por mira Dios su hustisia.”
^ Lit.: “revelá.”
^ Lit.: “nan kurason sin heful a bira skur.”
^ Òf: “di rèptil.”
^ Òf: “venerá.”
^ Òf: “tene relashon seksual ku hende muhé.”
^ Òf: “tene relashon seksual ku hende hòmber.”
^ Òf: “repugnante.”
^ Òf: “pago.”
^ Òf: “Nan no ta dispuesto pa haña konosementu eksakto di Dios.”
^ Òf: “nan ta papia kuchikuchi.”
