Bai na kontenido

Bai na kontenido

 KAPÍTULO 4

“Señor Ta . . . Grandi den Poder”

“Señor Ta . . . Grandi den Poder”

1, 2. Ki kosnan asombroso Elias a yega di mira den su bida, pero ki susesonan espektakular el a presensiá for di e kueba riba Seru Horèb?

ELIAS a yega di mira kosnan asombroso den pasado. El a mira raf trese kuminda p’e dos biaha pa dia kaminda e tabata skonde. Durante un periodo largu di skarsedat di kuminda el a mira kon nan tabata saka hariña i zeta for di dos kònchi sin ku esakinan a bira bashí. Asta el a mira kandela kai for di shelu komo kontesta riba su orashon. (1 Reinan, kapítulo 17 i 18) Tòg, nunka Elias a yega di mira un kos asin’aki.

2 Ora el a bùk banda dje entrada di un kueba riba Seru Horèb, el a presensiá un seri di suseso espektakular. Promé tabatin un bientu ku lo mester a produsí un zonidu spantoso, manera kachó ku ta yora, pasobra e tabata asina poderoso ku el a splet seru i kibra baranka. Despues a bini un temblor ku a lòs forsanan ekstraordinario ku tin wantá bou di kapa di tera. Finalmente a bini un kandela. Ora esaki tabata pasa dor di e region, probablemente Elias a sinti ráfaga di bientu kayente ku su kalor intenso a produsí.—1 Reinan 19:8-12.

“Mira, Señor tabata pasa!”

3. Elias a mira manifestashon di ki kualidat divino, i unda nos por mira manifestashon di e mesun kualidat aki?

3 Tur e diferente akontesimentunan aki ku Elias a presensiá tabatin un kos en komun: nan tabata demostrashonnan di Yehova Dios su gran poder. Klaru ku nos no tin nodi mira un milager pa komprondé ku Dios ta poseé e kualidat aki. E ta klaramente bisto. Beibel ta bisa nos ku kreashon ta duna prueba di Yehova su “poder eterno i naturalesa divino.” (Romanonan 1:20) Djis pensa riba e lus skèrpi di werlek i e zonidu fuertísimo di bos, e kaida mahestuoso di un waterval  imponente, e inmensidat impreshonante di un shelu yen di strea! Bo no ta mira un manifestashon di Dios su poder den e kosnan aki? Tòg, masha poko hende den e mundu djawe ta realmente rekonosé e poder di Dios. I ménos hende ainda tin un punto di bista korekto tokante dje. Pero si nos ta komprondé kiko e kualidat di Dios aki ta, nos ta haña hopi motibu pa hala mas serka Yehova. Den e sekshon aki nos lo analisá Yehova su poder inkomparabel detayadamente.

Un Kualidat Esensial di Yehova

4, 5. (a) Ki konekshon tin entre Yehova su nòmber i su poder? (b) Pakiko toro ta un símbolo adekuá di Yehova su poder?

4 Yehova su poder ta úniko. Jeremias 10:6 ta bisa: “No tin ningun manera bo, o SEÑOR; grandi bo ta, i bo nòmber ta grandi den poder.” Tuma nota ku poder ta konektá ku Yehova su nòmber, i manera nos ta kòrda, su nòmber evidentemente ta nifiká “E Ta Kousa pa Bira.” Kiko ta permití Yehova krea kualke kos ku e kier i bira kualke kos ku e kier? Esei ta prinsipalmente su poder. Sí, Yehova su kapasidat di aktua, pa realisá su boluntat, ta sin límite. E poder ei ta un di su kualidatnan esensial.

5 Pa motibu ku hamas nos lo por komprondé e magnitut kompletu di su poder, Yehova ta usa ilustrashon pa yuda nos. Manera nos a mira, e ta usa toro pa simbolisá su poder. (Ezekiel 1:4-10) Esei ta un símbolo adekuá, pasobra asta un toro ku hende a tam ta keda un animal grandi i fuerte. Masha poko biaha hende den e Palestina di tempu di Beibel a yega di topa un bestia mas fuerte, esta, si nan a topa unu mes. Pero loke sí nan tabata konosé ta un tipo di toro ku tabata hinka mas miedu den hende; un toro salbahe ku entre tantu no ta eksistí mas. (Jòb 39:9-12) E emperador romano Julio Cesar a remarká un biaha ku e toronan aki tabata kasi mes grandi ku olefante. El a skirbi: “Nan tin hopi forsa i  tremendo velosidat.” Imaginá bo kon chikitu i débil lo bo sinti bo pará banda di un kriatura asina!

6. Pakiko ta Yehova so tin e título di “Todopoderoso”?

6 Meskos tambe, hende ta insignifikante i impotente na komparashon ku Yehova, e Dios di poder. Den su bista, asta nashonnan poderoso ta manera djis un kapa fini di stòf riba un balansa. (Isaias 40:15) Distinto di kualkier kriatura, Yehova su poder no tin límite, pasobra ta e so tin e título di “Todopoderoso.” * (Revelashon 15:3) Yehova tin un ‘forsa inmenso’ i masha “tantu poder.” (Isaias 40:26, BPK) E ta e fuente semper abundante i inagotabel di poder. E no ta dependé di un fuente eksterno di energia, pasobra “poder ta pertenesé na Dios.” (Salmo 62:11) Pero, ki medio Yehova ta usa pa ehersé su poder?

Kon Yehova Ta Ehersé Su Poder

7. Kiko ta e spiritu santu di Yehova, i ki idea e palabranan di e idiomanan original usá den Beibel ta duna?

7 Yehova ta drama su spiritu santu na kantidatnan sin límite. Esaki ta e forsa di Dios den akshon. De echo, na Génesis 1:2 di e Tradukshon di Mundu Nobo, Beibel ta referí na dje komo e “forsa aktivo” di Dios. E palabranan original na hebreo i griego ku ta ser tradusí komo “spiritu,” den otro kontekstonan por ser tradusí komo “bientu,” “rosea” i “ráfaga.” Segun dikshonarionan, e palabranan di e idioma original ta duna e idea di un forsa invisibel den akshon. Meskos ku bientu, e spiritu di Dios ta invisibel pa nos bista, pero su efektonan ta real i nos por sinti nan.

8. Ki símbolo Beibel ta usa p’e spiritu di Dios, i pakiko e komparashonnan aki ta adekuá?

8 E spiritu santu di Dios por obra den un sinfin di manera. Yehova por us’é pa realisá kualkier propósito ku e tin na  mente. Ku bon motibu anto Beibel ta yama e spiritu di Dios simbólikamente su “dede,” su “man poderoso” òf su “brasa ekstendí.” (Lukas 11:20; Deuteronomio 5:15; Salmo 8:3) Meskos ku un hòmber por usa su man pa kumpli ku tur tipo di tarea ku ta rekerí vários grado di forsa òf delikadesa, asina Dios por usa su spiritu pa kumpli ku kualkier propósito. Por ehèmpel, pa medio di dje el a krea atom sumamente chikitu, el a parti Laman Kòrá na dos, i el a kapasitá e kristiannan di promé siglo pa papia diferente idioma.

9. Kon ekstenso Yehova su poder di goberná ta?

9 Tambe Yehova ta ehersé poder pa medio di su outoridat komo Soberano di Universo. Bo por imaginá bo kiko kier men disponé di miónes i miónes di súpdito inteligente i kompetente ku ta ansioso pa kumpli ku bo òrdu? Asina Yehova su poder di goberná ta. E tin sirbidónan humano, i e Skritura sa kompará nan ku un ehérsito. (Salmo 68:11; 110:3) Pero na komparashon ku angel, ser humano ta un kriatura débil. Figurá bo, ora e ehérsito asirio a ataká e pueblo di Dios, un angel so a mata 185.000 sòldá riba un solo anochi! (2 Reinan 19:35) E angelnan di Dios ta “poderoso den fortalesa.”—Salmo 103:19, 20.

10. (a) Pakiko e Todopoderoso ta ser yamá Yehova di ehérsito? (b) Ken ta e ser di mas poderoso ku Yehova a krea?

10 Kuantu angel tin? Profeta Daniel a haña un vishon di shelu den kua el a mira mas ku 100 mion kriatura spiritual dilanti e trono di Yehova, pero no tin ningun indikashon ku ta tur e angelnan ku Dios a krea el a mira. (Daniel 7:10) Podisé tin sentenáres di miónes di angel. P’esei Beibel ta yama Dios, ‘Yehova di ehérsito.’ E título aki ta deskribí su posishon poderoso komo Komandante di un enorme kuerpo di angel vigoroso bon organisá. El a pone su Yu stimá, “e primogénito di henter kreashon,” riba tur e kriaturanan spiritual aki. (Kolosensenan 1:15) Komo e arkangel—hefe riba tur angel, serafin i kerubin—Hesus ta e ser di mas poderoso ku Yehova a krea.

11, 12. (a) Den ki manera e palabra di Dios ta ehersé poder? (b) Ki testimonio Hesus a duna di e magnitut di Yehova su poder?

 11 Yehova tin mas medio pa ehersé poder. Hebreonan 4:12 ta bisa: “E palabra di Dios ta bibu i [“ta ehersé poder,” NW].” Bo a yega di para ketu n’e poder fenomenal di e palabra di Dios, e mensahe inspirá pa spiritu ku awendia nos por haña preservá den Beibel? E por fortalesé nos, edifiká nos fe i yuda nos hasi kambionan grandi. Apòstel Pablo a spièrta su rumannan den fe kontra hende ku ta hiba un bida sumamente inmoral. Anto el a agregá: “I asina algun di boso tabata.” (1 Korintionan 6:9-11) Sí, “e palabra di Dios” a ehersé su poder den nan i a yuda nan kambia.

12 Yehova su poder ta asina inmenso i su medionan pa ehersé e poder ei ta asina efektivo ku nada no por para den su kaminda. Hesus a bisa: “Serka Dios tur kos ta posibel.” (Mateo 19:26) Ku ki propósito Yehova ta usa su poder?

Poder Dirigí pa un Propósito

13, 14. (a) Pakiko nos por bisa ku Yehova no ta un fuente di poder sin personalidat? (b) Den ki maneranan Yehova ta usa su poder?

13 E spiritu di Yehova ta muchu mas grandi ku kualkier forsa físiko; i Yehova no ta un forsa sin personalidat, esta, djis un fuente di energia. Dios tin un personalidat i tambe e tin pleno kontròl riba su poder. Pero kiko ta impulsá Yehova pa usa e poder aki?

14 Manera nos lo mira, Dios ta usa poder pa krea, pa destruí, pa protehá, pa restorá—en fin, pa hasi tur loke ta kuadra ku su propósito perfekto. (Isaias 46:10) Den algun kaso, Yehova ta usa su poder pa revelá aspektonan importante di su personalidat i normanan. Prinsipalmente, e ta dirigí su poder pa kumpli ku su boluntat—pa kita tur duda tokante su derecho di goberná, i pa santifiká su nòmber sagrado pa medio di e Reino Mesiániko. No tin nada ku lo por stroba e propósito ei di kumpli.

15. Ku ki propósito Yehova ta usa su poder en konekshon ku su sirbidónan, i kon esaki a keda demostrá den e kaso di Elias?

 15 Tambe Yehova ta usa su poder pa benefisio di kada un di nos. Wak kiko 2 Krónikanan 16:9 ta bisa: “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.” Nos ta haña un bon ehèmpel di esaki den e eksperensia di Elias, menshoná na prinsipio. Pakiko Yehova a dun’é e demostrashon asombroso ei di poder divino? Wèl, e reina malbado Jezabel a hura ku e lo a laga mata Elias. E profeta tabata na kareda, huyendo pa skapa su bida. El a sintié su so, e tabata spantá, desanimá—komo si fuera tur su trabou duru tabata pòrnada. Pa konsolá e hòmber afligí aki, Yehova a rekordá Elias na un manera bibu kuantu forsa E tin. E bientu, e temblor i e kandela a demostrá ku Elias por a konta ku respaldo di e Ser mas poderoso di universo. Pakiko e mester tabatin miedu di Jezabel, siendo ku e tabatin e Dios todopoderoso na su banda?—1 Reinan 19:1-12. *

16. Pakiko nos ta haña un konsuelo ora nos pensa riba e gran poder di Yehova?

16 Ounke aworakí no ta su tempu pa efektuá milager, Yehova no a kambia desde e tempu di Elias. (1 Korintionan 13:8) E tin e mesun deseo awe pa usa su poder na fabor di esnan ku ta stim’é. Ounke e ta biba den un region spiritual hopi elevá, e no ta muchu leu for di nos. No tin un límite na su poder, pues distansia no ta un opstákulo. Mas bien, “SEÑOR ta serka di tur esnan ku ta sklama na dje.” (Salmo 145:18) Na un okashon ku profeta Daniel a supliká Yehova pa yud’é, asta promé ku el a kaba di hasi orashon, un angel a aparesé na dje! (Daniel 9:20-23) Nada por stroba Yehova di yuda i fortalesé esnan ku e ta stima.—Salmo 118:6.

 Dios Su Poder Ta Hasié Inaserkabel?

17. Den ki sentido e poder di Yehova ta duna nos temor, pero ki klase di temor e no ta lanta?

17 E echo ku Dios ta asina poderoso mester pone nos haña temor di dje? Sí i nò. ‘Sí,’ den sentido ku e kualidat prinsipal aki ta duna nos motibu amplio pa teme Dios i mustra un rèspèt profundo p’e, manera nos a trata brevemente den e kapítulo anterior. Beibel ta bisa nos ku tal temor ta “e prinsipio di sabiduria.” (Salmo 111:10) Pero e kontesta ta ‘nò’ tambe, pasobra e poder di Dios no ta duna nos motibu pa sinti un miedu insaludabel di dje òf pa keda sin aserk’é.

18. (a) Pakiko hopi hende ta deskonfiá esnan ku tin poder? (b) Kon nos por sa ku poder no por korumpí Yehova?

18 “Poder tin tendensia di korumpí, i poder apsoluto ta korumpí na un grado apsoluto.” Asina e historiadó ingles Lord Acton a skirbi na 1887. Su deklarashon a ser sitá hopi biaha, tal bes pa motibu ku hopi hende ta mira den dje un bèrdat innegabel. Hopi bes hende imperfekto ta hasi mal uso di nan poder, manera historia a konfirmá bes tras bes. (Eklesiastés 4:1; 8:9) P’e motibu ei, hopi hende ta deskonfiá esnan ku tin poder, i ta hala leu for di nan. Awor bon, Yehova tin poder apsoluto. Su poder a korumpié na un manera òf otro? Klaru ku nò! Manera nos a mira, e ta santu, totalmente inkoruptibel. Yehova no ta manera e hòmber i muhénan imperfekto ku ta na poder den e mundu korupto aki. Nunka el a hasi mal uso di su poder, i nunka lo e no hasié tampoko.

19, 20. (a) Semper Yehova ta ehersé su poder na armonia ku ki otro kualidatnan, i pakiko esei ta un konsuelo pa nos? (b) Kon nos lo por ilustrá Yehova su dominio propio, i pakiko e kualidat aki ta atraé bo?

19 Kòrda ku poder no ta e úniko kualidat prinsipal di Yehova. Ainda nos tin ku studia su hustisia, su sabiduria i su amor. Pero nos no mester kere ku Yehova ta manifestá e kualidatnan ei den un forma rígido, mekániko, komo si fuera ta un pa un so e por ehersé nan. Al kontrario, manera nos lo  mira den e kapítulonan ku ta sigui, semper Yehova ta ehersé su poder na armonia ku su hustisia, su sabiduria i su amor. Pensa riba un otro kualidat di Dios i ku masha poko gobernante di e mundu aki ta manifestá: dominio propio.

20 Imaginá bo ku bo ta topa un hòmber fuerte i di hopi estatura. Su aparensia ta intimidá bo. Sin embargo, ku tempu bo ta ripará ku e ta amabel. Semper e ta kla i dispuesto pa usa su poder pa yuda i protehá hende, spesialmente esnan indefenso i vulnerabel. Nunka e ta hasi mal uso di su forsa. Bo ta mira ku nan ta papia malu di dje sin base, i tòg e ta keda firme pero kalmu, ku dignidat i asta bondadoso. Bo ta kuminsá puntra bo mes si abo lo por mustra e mesun bondat i dominio propio, foral si bo ta mes fuerte kuné! Segun ku bo ta konosé un hende asina, lo bo no kuminsá sinti bo atraí na dje? Nos tin muchu mas motibu pa hala serka Yehova, e Dios todopoderoso. Konsiderá e frase kompletu riba kua e título di e kapítulo aki ta basá: “SEÑOR no ta rabia lihé  i ta grandi den poder.” (Nahum 1:3) Yehova no ta lihé pa usa su poder kontra hende, ni sikiera kontra e malbadonan. E tin un genio suave i ta bondadoso. El a demostrá ku e “no ta rabia lihé” ni ora e ser provoká bes tras bes.—Salmo 78:37-41.

21. Pakiko Yehova no ta fòrsa hende pa hasi su boluntat, i kiko esaki ta siña nos tokante dje?

 21 Konsiderá Yehova su dominio propio for di un otro ángulo. Si bo tabata un persona sumamente poderoso, bo no ta kere ku tin biaha lo bo sinti bo tentá pa obligá hende hasi manera abo kier? Yehova, ku tur su poder, no ta fòrsa nos pa sirbié, ounke esei ta e úniko manera ku nos por gana bida eterno. Mas bien, e ta onra kada un di nos bondadosamente ku e libertat di skohe. E ta spièrta nos di e konsekuensianan di skohe malu i ta bisa nos kiko lo ta e rekompensanan di hasi bon. Pero e desishon mes e ta laga den nos man. (Deuteronomio 30:19, 20) Yehova simplemente no tin ningun interes pa nos sirbié obligá ni pa motibu di un miedu insaludabel di su poder impreshonante. E ta buska personanan ku ta deseá di sirbié di nan propio boluntat, motivá pa amor.—2 Korintionan 9:7.

22, 23. (a) Kiko ta mustra ku pa Yehova ta un plaser di por delegá outoridat i duna otronan poder? (b) Kiko nos lo analisá den e siguiente kapítulo?

22 Laga nos wak un último motibu pakiko nos no tin nodi biba ku miedu di e Dios Todopoderoso. Hende ku tin poder no ta muchu inkliná pa kompartí esaki ku otronan. Pero pa Yehova ta un plaser di por duna poder na su fiel adoradónan. E ta delegá bastante outoridat na otronan, por ehèmpel na su Yu. (Mateo 28:18) I e ta duna poder na su sirbidónan den un otro manera tambe. Beibel ta splika: “Di bo, o SEÑOR, ta e grandesa, e poder, e gloria, e viktoria i e mahestat, di bèrdat, tur loke ta den shelu i riba tera; e dominio ta di bo. . . . Den bo man tin poder i forsa; i ta den bo man pa engrandesé i pa fortalesé kada un.”—1 Krónikanan 29:11, 12.

23 Sí, Yehova lo duna bo su forsa gustosamente. E ta duna asta “e poder mas ayá di loke ta normal” na ken ku kier sirbié. (2 Korintionan 4:7, NW) Bo no ta sinti bo atraí n’e Dios dinámiko aki, kende ta usa su poder ku bondat i na armonia ku prinsipionan hustu? Den e siguiente kapítulo, nos lo enfoká riba kon Yehova ta usa su poder pa krea.

^ par. 6 E palabra griego tradusí komo “Todopoderoso” ta nifiká literalmente “Gobernante Riba Tur; Esun Ku Tin Tur Poder.”

^ par. 15 Beibel ta bisa ku “SEÑOR no tabata den e bientu” ni “den e temblor” ni “den e kandela.” Yehova su sirbidónan no ta busk’é den e forsanan di naturalesa manera esnan ku ta adorá e diosnan místiko di naturalesa sí ta hasi. E ta asina grandi ku nada ku el a krea no por konten’é.—1 Reinan 8:27.