Karta pa e Hebreonan 4:1-16
4 Pues, di akuerdo ku Dios su promesa, te ainda tin oportunidat pa nos tambe sosegá durante Dios su sosiegu. P’esei, laga nos tene kuidou pa ningun di nos no keda sin benefisiá di e promesa ei.+
2 Meskos ku nos antepasadonan, nos tambe a tende e bon notisianan,+ pero e mensahe ku nan a tende no a benefisiá nan pasobra nan no a obedes’é. Nan a desobedesé pasobra nan fe no tabata mes fuerte ku fe di e hendenan ku sí a obedesé.
3 Nos ku tin fe sí ta sosegá durante Dios su sosiegu. Tokante e sosiegu ei, Dios a bisa: “P’esei, den mi rabia, mi a hura: ‘Lo mi no permití nan tambe sosegá durante mi sosiegu.’”*+ El a bisa esei maske ku su trabou a keda kla desde ku mundu a ser fundá.+
4 Pasobra un kaminda den Skritura, Dios a bisa lo siguiente tokante e di shete dia: “Riba e di shete dia, Dios a sosegá despues ku el a kaba ku tur su trabounan.”+
5 I despues, el a bisa: “Lo mi no permití nan tambe sosegá durante mi sosiegu.”+
6 E hendenan ku tabata e proménan pa tende e bon notisianan no a sosegá durante e sosiegu ei pa motibu di desobedensia.+ Pero ainda tin oportunidat pa algun hende sosegá durante e sosiegu ei.
7 P’esei, despues di hopi tempu, Dios a bisa den e salmo di David, manera e karta akí ta bisa mas promé: “Mare boso ke skucha awe loke el a bisa: ‘No bira tèrko.’”*+ Pues, Dios a bolbe stipulá un dia ku por ser yamá “awe.”
8 Si Hosue+ a guia nan na un lugá di sosiegu, Dios lo no a papia despues di un otro dia.
9 Pues, ta keda un dia di sosiegu, manera un sabat, pa e pueblo di Dios.+
10 Un hende ku sosegá durante e sosiegu di Dios tambe a sosegá di su trabounan,* meskos ku Dios a sosegá despues di a kaba ku su trabounan.+
11 P’esei, laga nos hasi tur nos esfuerso pa sosegá durante e sosiegu ei pa ningun hende no sigui ehèmpel di e hendenan ku tabata desobediente.*+
12 E palabra di Dios ta bibu i poderoso,+ i e ta mas skèrpi ku kualke spada ku ta kòrta tur dos banda.+ E ta penetrá asina profundo ku e ta separá alma* for di spiritu* i djòint for di tut’i wesu. E por saka pensamentu i intenshon di kurason na kla.
13 No tin ningun kreashon ku ta skondí pa Dios;+ tur kos ta sunú i habrí den bista di e persona na ken nos tin ku duna kuenta i rason.+
14 Nos tin un gran sumo saserdote ku a drenta shelu, esta, Hesus, e Yu di Dios.+ P’esei, laga nos sigui rekonosé su posishon públikamente.+
15 Nos tin un sumo saserdote ku ta komprondé nos debilidatnan.+ E ta un sumo saserdote ku, meskos ku nos, a ser poné na prueba den tur manera. Pero e no a hasi piká.+
16 P’esei, laga nos aserká e trono di Dios, e Dios kende ta demostrá bondat inmeresí,* i resa na Dios ku konfiansa.+ Asina, Dios por demostrá miserikòrdia i bondat inmeresí na nos na e momento apropiá.
