Karta pa e Hebreonan 3:1-19
3 P’esei, rumannan santu, boso ku a risibí e yamada* selestial,+ pensa riba e ehèmpel di Hesus, e persona ku nos ta rekonosé públikamente komo apòstel i sumo saserdote.+
2 E tabata fiel na Dios, kende a nombr’é,+ meskos ku Moises tambe tabata fiel na Dios segun ku e tabata sirbi den Dios su kas.*+
3 Pero Hesus ta digno di risibí mas onor+ ku Moises, pasobra e persona ku traha un kas tin mas onor ku e kas ku el a konstruí.
4 Naturalmente, tur kas tin un persona ku a trah’é, pero e persona ku a traha tur kos ta Dios.
5 Moises tabata un fiel sirbidó den e kas di Dios. Su sirbishi tabata un testimonio di e kosnan ku lo a ser revelá despues.
6 Pero Kristu tabata fiel komo Yu+ enkargá ku e kas di Dios. Nos ta e kas di Dios,+ basta nos sigui papia ku konfiansa* i tene duru na nos speransa te na final. Nos ta kontentu* ku nos tin e speransa ei.
7 P’esei, manera spiritu santu ta bisa:+ “Mare boso ke skucha awe loke el a bisa:
8 ‘No bira tèrko* manera tempu ku boso antepasadonan a pone mi rabia masha hopi mes, manera nan a hasi tempu ku* nan a pone mi na prueba den desierto;+
9 sí, einan nan a pone mi pasenshi* na prueba i nan a desafiá mi, maske nan a mira loke mi a hasi pa nan 40 aña largu.+
10 Ta p’esei mi tabata masha disgustá ku e generashon akí, i mi a bisa: “Semper nan ta sigui e kaprichonan di nan kurason, i nan no a siña konosé mi kaminda.”
11 P’esei, den mi rabia, mi a hura: “Lo mi no permití nan tambe sosegá durante mi sosiegu.”’”*+
12 Rumannan, tene kuidou pa ningun di boso no haña un mal kurason, un kurason sin fe, pa motibu ku boso a alehá for di e Dios bibu.+
13 Pero miéntras ku ainda tin un tempu ku por ser yamá “awe,”+ sigui animá otro tur dia pa ningun di boso no laga piká, ku tin poder pa engañá hende, hasi boso kurason duru.
14 Pasobra en realidat, nos lo partisipá den loke Kristu ta partisipá* solamente si, te na final, nos tene duru na e konfiansa ku nos tabatin na kuminsamentu.+
15 Manera Skritura ta bisa: “Mare boso ke skucha awe loke el a bisa: ‘No bira tèrko* manera tempu ku boso antepasadonan a pone mi rabia masha hopi mes.’”+
16 Ken tabata tur e hendenan ku a tende stèm di Dios i tòg nan a pone Dios rabia masha hopi mes? No tabata tur e hendenan ku a sali for di Egipto bou di guia di Moises?+
17 Ademas, ku ken Dios tabata disgustá 40 aña largu?+ No tabata ku e hendenan ku a peka, kende nan kadaver a keda bentá den desierto?+
18 I ta ken Dios a hura ku lo e no permití nan tambe sosegá durante su sosiegu? No ta e hendenan ku tabata desobediente el a hura esei?
19 Pues, nos ta mira ku nan no por a sosegá durante su sosiegu pasobra nan no tabatin fe.+
Nota
^ Òf: “invitashon.”
^ “Kas” ta referí na e kongregashon di Dios, esta, e nashon di Israel.
^ Òf: “papia ku frankesa; papia habrí.”
^ Òf: “orguyoso.”
^ Lit.: “dia.”
^ Lit.: “No hasi boso kurason duru.”
^ Lit.: “a pone mi.”
^ Òf: “Nan lo no drenta mi sosiegu.”
^ Òf: “nos lo eksperensiá loke Kristu a eksperensiá.”
^ Lit.: “No hasi boso kurason duru.”
