Karta pa e Hebreonan 8:1-13
8 E punto prinsipal di loke nos ta bisando ta esaki: Ta un sumo saserdote asina nos tin.+ El a sinta na man drechi di e Mahestat, ku ta sintá riba Su trono den shelu.+
2 E sumo saserdote ei ta un sirbidó* den e lugá santu*+ den e berdadero tènt. No ta hende a establesé e tènt ei, sino Yehova.*
3 Komo ku tur sumo saserdote ta ser nombrá pa ofresé tantu ofrenda komo sakrifisio, tabata nesesario pa Hesus tambe tin algu di ofresé.+
4 Awor, si e tabata riba tera, lo e no tabata saserdote,+ pasobra tin otro saserdote ku ta ofresé e ofrendanan segun Lei.
5 E sirbishi sagrado di e hòmbernan akí ta un kopia i un sombra+ di e kosnan selestial.+ E mandamentu divino ku Moises a haña ora ku e tabata bai traha e tènt a demostrá esei: Dios a bisa Moises: “Hasi sigur ku tur kos ta ser trahá segun e diseño ku mi a mustra bo riba seru.”+
6 Pero awor, Hesus a haña un asignashon* superior, pasobra Hesus ta mediador+ tambe di un mihó pakto.+ Ademas, e promesanan ku ta forma e base legal pa e pakto ei ta mihó.+
7 Si e promé pakto no tabatin fayo, lo no tabatin mester di un di dos pakto.+
8 Ta pasobra Dios ta mira fayo den e pueblo e ta bisa: “Esaki ta loke Yehova* ta bisa: ‘Tende! Ta bai bini un tempu ku lo mi sera un pakto nobo ku e pueblo di Israel i ku e pueblo di Huda.’
9 Ademas, Yehova* ta bisa: ‘E pakto ei lo no ta manera esun ku mi a sera ku nan antepasadonan dia ku mi a kohe nan na man pa saka nan for di Egipto.+ Komo ku nan no a keda fiel na mi pakto, mi a stòp di preokupá ku nan.
10 Esaki ta e pakto ku lo mi sera ku e pueblo di Israel despues di e tempu ei. Lo mi pone mi leinan den nan mente, i lo mi skirbi nan riba nan kurason.+ Lo mi bira nan Dios, i nan lo bira mi pueblo.’+ Esei ta loke Yehova* ta bisa.
11 ‘Ningun di nan lo no bisa* un otro siudadano ni su ruman mas: “Siña konosé Yehova!”* Pasobra nan tur lo konosé mi, for di e persona di mas insignifikante te na esun di mas importante.
12 Lo mi pordoná nan pa e kosnan malu ku nan a hasi; lo mi no kòrda mas riba nan pikánan.’”+
13 Ora Dios a papia di “un pakto nobo,” el a indiká ku e pakto anterior a bira antikuá.+ Awor, loke ta antikuá, sí, loke ta birando bieu, ta serka di disparsé.+
