Promé Reinan 8:1-66
8 Rei Sálomon a manda yama+ e ansianonan di Israel, esta, tur e kabesantenan di e tribunan i e kabesantenan di e kasnan di famia* di Israel pa nan bini serka dje.+ Nan a bini Herúsalèm serka Rei Sálomon pa transportá e arka di pakto di Yehova for di Siòn,+ esta, for di Stat di David,+ hiba tèmpel. Nan mester a trese e arka tèmpel.
2 Tur e hòmbernan di Israel a reuní serka Rei Sálomon den e di shete luna,+ esta, luna di etanim,* pa Fiesta di Ramada.
3 Ora tur e ansianonan di Israel a yega, e saserdotenan a hisa e arka.+
4 E saserdotenan i e levitanan a trese Arka di Yehova, e tènt di reunion+ i tur e artíkulonan di uso sagrado ku tabata den e tènt.
5 Rei Sálomon i henter e pueblo* di Israel, ku el a reuní serka dje, tabata pará dilanti di e arka. Nan a sakrifiká+ asina tantu karné, baka i toro ku nan no por a konta nan.
6 Despues, e saserdotenan a pone e arka di pakto di Yehova na su lugá,+ esta, bou di ala di e kerubinnan+ den e lugá Santísimo, e kamber te patras den tèmpel.*
7 E kerubinnan tabatin nan alanan habrí di manera ku e kerubinnan tabata forma manera un protekshon pa e arka i pa e baranan di e arka.+
8 E baranan+ tabata asina largu ku bo por a mira nan punta for di den e lugá Santu, ku tabata keda dilanti di e kamber te patras. Pará pafó sí, bo no por a mira nan. E arka i e baranan a keda ei te dia djawe.
9 Den e arka, tabatin solamente e dos tablanan di piedra+ ku Moises a pone.+ Moises a pone nan den e arka ora e tabata na Hórèb, kaminda Yehova a sera un pakto+ ku e pueblo di Israel tempu ku nan a sali for di Egipto.+
10 Awor, ora e saserdotenan a sali for di e tèmpel,* un nubia+ a yena tèmpel* di Yehova.+
11 Debí na e nubia, e saserdotenan no por a sigui rindi sirbishi, pasobra tèmpel di Yehova a yena ku gloria di Yehova.+
12 E ora ei, Sálomon a bisa: “O Yehova, bo a bisa ku lo bo biba den nubia diki.+
13 Mi a logra konstruí un kas mahestuoso pa bo, un lugá permanente pa bo biba den dje pa semper.”+
14 Anto Rei a bira wak henter e pueblo di Israel, ku tabata pará einan,* i el a bendishoná nan.+
15 Rei a bisa: “Alabá sea Yehova, Dios di Israel, kende a kumpli ku* loke el a primintí* mi tata, David, bisando:
16 ‘For di dia ku mi a libra mi pueblo Israel for di Egipto, mi no a skohe niun stat for di tur e tribunan di Israel pa einan mi laga traha un kas pa mi nòmber.+ Pero mi a skohe David pa goberná mi pueblo Israel.’
17 Di henter su kurason, mi tata, David, tabata ke konstruí un kas na onor di* Yehova, Dios di Israel.+
18 Pero Yehova a bisa mi tata, David: ‘Di henter bo kurason, bo tabata ke traha un kas pa mi nòmber. I loke bo a deseá ta algu bon.
19 Sinembargo, abo lo no traha e kas. Bo yu hòmber ku lo nase* lo traha e kas pa mi nòmber.’+
20 Anto Yehova a kumpli ku e promesa ku el a hasi, pasobra mi a sinta riba trono di Israel despues di mi tata, David, manera Yehova a primintí. I mi a traha un kas na onor di* Yehova, Dios di Israel.+
21 Ademas, mi a traha un lugá den e kas pa e arka ku ta kontené e tablanan ku e pakto+ ku Yehova a sera ku nos antepasadonan despues ku el a saka nan for di Egipto.”
22 Despues, Sálomon a bai para dilanti di e altar di Yehova, esta, dilanti di henter e nashon* di Israel, i el a hisa su mannan na shelu+
23 i bisa: “O Yehova, Dios di Israel, no tin ningun Dios manera bo,+ ni den shelu ni riba tera. Bo ta kumpli ku bo pakto, i bo ta mustra amor leal+ na bo sirbidónan ku ta sirbi bo* di henter nan kurason.+
24 Bo a kumpli ku e promesa ku bo a hasi na mi tata, bo sirbidó David. I awe, bo a kumpli ku* loke bo a primintí.*+
25 Awor, o Yehova, Dios di Israel, mi ta pidi bo pa kumpli ku e promesa ku bo a hasi na mi tata, bo sirbidó David. Bo a primintié: ‘Semper lo tin un desendiente di bo* riba trono di Israel, basta bo desendientenan biba manera mi ke pa nan biba, manera abo ta hasi.’+
26 O Dios di Israel, kumpli por fabor ku e promesa ku bo a hasi na bo sirbidó, mi tata, David.
27 Pero di bèrdat Dios lo biba riba tera?+ E shelunan, sí, shelu di e shelunan mes no ta sufisientemente grandi pa ta bo kas.+ E kas akí ku mi a traha muchu ménos!+
28 O Yehova, mi Dios, skucha e orashon akí di bo sirbidó i su súplikanan. Skucha bo sirbidó su sklamashon pa yudansa i e orashon ku e ta hasi na bo awe.
29 Por fabor, keda ku bo bista di dia i anochi riba e kas akí. Relashoná ku e lugá akí, bo a bisa: ‘Mi nòmber lo ta einan.’+ Por fabor, skucha e orashonnan ku bo sirbidó ta hasi den direkshon di e lugá akí.+
30 Skucha e súplikanan di bo sirbidó i e orashonnan di súplika ku bo pueblo Israel ta hasi den direkshon di e lugá akí. Por fabor, skucha for di bo lugá di biba den shelu;+ sí, skucha nos i pordoná nos.+
31 Si un hende peka kontra su próhimo i su próhimo oblig’é hura* ku e ta inosente i ku si e ta gaña, e mester haña kastigu, i bou di e huramentu* ei, e hende ei ku a peka bini dilanti di bo altar na e kas akí,+
32 skucha e kaso por fabor for di shelu. Husga i tuma akshon relashoná ku e kaso di bo sirbidónan. Deklará e persona malbado kulpabel,* i kastig’é pa loke el a hasi; deklará e persona hustu inosente* i rekompens’é pa su rektitut.+
33 Si enemigu derotá bo pueblo Israel pasobra nan a sigui peka kontra bo+ i bo pueblo bolbe serka bo i, den e kas akí, nan glorifiká bo nòmber+ i hasi orashon i roga bo pa tene miserikòrdia di nan,+
34 skucha nan, por fabor, abo ku ta den shelu. Pordoná e pikánan di bo pueblo Israel i laga nan regresá e pais ku bo a duna nan antepasadonan.+
35 Si shelu stòp di duna áwaseru+ pasobra bo pueblo a sigui peka kontra bo+ pero despues nan resa den direkshon di e lugá akí, alabá bo nòmber i stòp di hasi piká pasobra bo a korigí nan,*+
36 skucha nan, por fabor, for di den shelu kaminda bo ta, i pordoná piká di bo sirbidónan; sí, pordoná mi Dios su pueblo Israel. Siña nan+ e bon kaminda ku nan mester kana den dje. I manda áwaseru pa bo pais,+ e pais ku bo a duna bo pueblo komo herensia.
37 Si den e pais tin hamber,+ epidemia, difikultat debí na bientu kayente ku ta destruí e matanan, beskein riba e matanan,+ plaga di dalakochi, dalakochi feros,* òf si enemigu sitia kualke un di e statnan* di e pais òf si tin kualke otro plaga òf malesa+
38 i kualke hende òf henter bo pueblo Israel resa na bo,+ ku man na haltu i ku kara den direkshon di e kas akí, i pidi yudansa (pasobra kada hende sa ki doló e tin den su kurason),+
39 skucha, por fabor, for di shelu, kaminda bo ta biba.+ Pordoná+ bo sirbidónan i tuma akshon; trata kada hende segun su echonan,+ pasobra bo sa kiko tin den kurason di kada hende (pasobra ta abo so sa kiko tin den kurason di tur hende).+
40 Asina, nan lo tin rèspèt profundo* pa bo durante e dianan ku nan ta biba na e pais ku bo a duna nos antepasadonan.
41 I si un estranhero ku no ta pertenesé na bo pueblo Israel bini for di un tera leu pa motibu di bo nòmber*+
42 (pasobra nan lo tende di bo gran nòmber+ i di bo inmenso poder*) i e kuminsá hasi orashon den direkshon di e kas akí,
43 skucha e estranhero, por fabor, for di shelu, kaminda bo ta biba,+ i hasi tur loke e ta pidi bo. Di e manera ei, tur nashon na mundu lo siña konosé bo nòmber,* i nan lo haña rèspèt profundo pa bo,*+ meskos ku bo pueblo Israel ku tin rèspèt profundo pa bo. Tur nashon lo sa ku e kas akí, ku mi a traha pa bo, ta karga bo nòmber.
44 Si bo pueblo bai bringa kontra nan enemigunan, kaminda bo manda nan,+ i nan resa na bo,+ o Yehova, den direkshon di e stat akí ku bo a skohe+ i den direkshon di e kas ku mi a traha pa bo nòmber,+
45 skucha, for di shelu, nan orashon i nan súplikanan i yuda nan haña hustisia.
46 Ban bisa ku bo pueblo peka kontra bo (pasobra no tin ningun hende ku no ta hasi piká)+ i bo bira furioso riba nan i entregá nan den man di enemigu i nan enemigunan kohe nan prezu i hiba nan pais di nan enemigunan, sea leu òf serka.+
47 Awor, suponé ku bo pueblo bini na nan sano huisio na e pais kaminda nan ta prezu.+ Sí, na pais di nan enemigunan, nan ta bolbe serka bo,+ i nan ta supliká bo pa bo miserikòrdia,+ bisando: ‘Nos a peka; nos a hasi malu; nos a hasi maldat.’+
48 Sí, na e pais di nan enemigunan ku a kohe nan prezu, nan ta bolbe serka bo di henter nan kurason+ i di henter nan alma,* i nan ta hasi orashon na bo den direkshon di nan pais ku bo a duna nan antepasadonan, den direkshon di e stat ku bo a skohe i den direkshon di e kas ku mi a konstruí na bo onor.*+
49 Ora nan hasi orashon, skucha nan, por fabor, for di shelu, bo lugá di biba;+ skucha nan orashon i nan súplikanan i yuda nan haña hustisia.
50 Pordoná bo pueblo ku a peka kontra bo; pordoná bo pueblo pa tur e pikánan ku nan a kometé kontra bo. Laga e hendenan ku a kapturá nan tene kompashon ku nan.+
51 (Pasobra nan ta bo herensia, bo pueblo+ ku bo a saka for di Egipto,+ e fòrnu pa dirti heru.)+
52 Por fabor, presta atenshon* i skucha e súplikanan+ di bo sirbidó i e súplikanan di bo pueblo Israel. Skucha nan kada bes ku nan sklama na bo.*+
53 Pasobra di tur e pueblonan na tera,+ bo a apartá nan komo bo herensia, manera bo a bisa pa medio di bo sirbidó Moises ora bo a saka nos antepasadonan for di Egipto, o Señor Soberano Yehova.”
54 Manera Sálomon a kaba di hasi e orashon ei na Yehova, suplikando e pa tur e kosnan ei, el a lanta for di dilanti di e altar di Yehova kaminda e tabata na rudia ku su mannan habrí den direkshon di shelu.+
55 Sálomon a lanta para i, ku un stèm fuerte, el a bendishoná henter e kongregashon di Israel, bisando:
56 “Alabá sea Yehova, kende a duna su pueblo Israel pas i trankilidat, manera el a primintí!+ Ningun di su promesanan ku el a hasi pa medio di su sirbidó Moises no a keda sin kumpli.+
57 Mare Yehova, nos Dios, keda ku nos manera el a keda ku nos antepasadonan.+ Mare e no bandoná nos ni laga nos.+
58 Lag’é hinka den nos kurason+ e deseo pa kana den tur su kamindanan i pa kumpli ku su mandamentunan, su leinan i e dekretonan ku el a duna nos antepasadonan pa kumpli kuné.
59 Mare Yehova, nos Dios, kòrda di dia i anochi riba e fabornan ei ku mi a pidié i ku Yehova sòru pa su sirbidó i pa su pueblo Israel haña hustisia tur dia, segun ta nesesario.
60 Pa asina, tur nashon na tera por sa ku Yehova ta e Dios berdadero.+ No tin ningun otro!+
61 Pues, laga boso kurason ta kompletamente dediká+ na Yehova, nos Dios. Kumpli ku su leinan i obedesé su mandamentunan manera boso ta hasiendo awe.”
62 Rei Sálomon i henter Israel a ofresé un sakrifisio grandi na Yehova.+
63 Sálomon a ofresé 22.000 toro i 120.000 karné komo sakrifisio di pas*+ na Yehova. Pues, Rei i tur e israelitanan a inougurá tèmpel* di Yehova.+
64 E dia ei, Rei a santifiká e parti meimei di e plenchi ku tabata keda dilanti di tèmpel di Yehova. Einan, el a ofresé sakrifisio kimá, ofrenda di grano i e vètnan di bestia ku nan a duna komo sakrifisio di pas, pasobra e altar di koper+ ku tabata dilanti di Yehova tabata muchu chikitu pa karga tur e sakrifisionan kimá, e ofrendanan di grano i e partinan vèt+ ku nan a duna komo sakrifisio di pas.
65 Na e okashon ei, Sálomon a selebrá e fiesta+ huntu ku henter Israel, un kantidat grandi di hende* ku a bini for di Lebo-Hámat* te na vaye* di Egipto.+ Nan a selebrá e fiesta pa nos Dios Yehova 7 dia i despues 7 dia mas, na tur, 14 dia.
66 E siguiente dia,* Sálomon a laga e hendenan bai. Nan a deseá Rei tur kos bon,* i nan a regresá nan kas alegre, ku un kurason kontentu, debí na tur e bon kosnan+ ku Yehova a hasi pa su sirbidó David i pa su pueblo Israel.
Nota
^ Lit.: “kas.”
^ Lit.: “e lugá sagrado.”
^ Lit.: “kas.”
^ Lit.: “a kumpli ku su propio man ku.”
^ Lit.: “a primintí ku su mes boka na.”
^ Lit.: “un kas pa nòmber di.”
^ Òf: “Bo yu hòmber ku lo sali for di bo hep.”
^ Lit.: “un kas pa nòmber di.”
^ Lit.: “kongregashon.”
^ Lit.: “ta kana bo dilanti.”
^ Lit.: “a kumpli ku bo propio mannan ku.”
^ Lit.: “a primintí ku bo mes boka.”
^ Òf: “un hòmber di bo liña di desendensia.”
^ Esaki tabata un huramentu ku tin un maldishon komo kastigu si e persona hura falsamente òf kibra su huramentu.
^ Lit.: “maldishon.”
^ Lit.: “malbado.”
^ Lit.: “rekto.”
^ Òf: “a yuda nan bira humilde; a afligí nan.”
^ Òf: “tirakochi.”
^ Lit.: “e portanan.”
^ Lit.: “tin temor.”
^ Òf: “bo reputashon.”
^ Lit.: “i di bo man poderoso i bo brasa ekstendí.”
^ Esaki ta nifiká siña tokante e nòmber di Dios i siña konosé e persona ku e nòmber akí ta representá.
^ Lit.: “i teme bo.”
^ Lit.: “pa bo nòmber.”
^ Lit.: “laga bo wowonan ta habrí.”
^ Òf: “Kiko ku nan pidi, skucha nan.”
^ Lit.: “kas.”
^ Lit.: “un kongregashon masha grandi.”
^ Òf: “e entrada di Hámat.”
^ Lit.: “E di ocho dia,” esta, e dia despues di e di dos periodo di shete dia.
^ Òf: “Nan a deseá pa Dios bendishoná Rei.”
