Yòb 33:1-33
33 “Yòb, skucha mi, por fabor;skucha loke mi tin di bisa.
2 Skucha mi, por fabor! Permití mi papia;mi boka* tin ku papia.
3 Lo mi* ta sinsero; mi palabranan lo proba esei;+mi lepnan lo papia loke mi sa.
4 Dios a usa su poder* pa krea mi;+Dios Todopoderoso a duna mi bida pa medio di su rosea.+
5 Kontestá mi, si bo por;presentá bo argumentonan mi dilanti; prepará bo pa bo defendé bo kaso.
6 Abo i ami ta igual den bista di e Dios berdadero;mi tambe a ser formá di klei.+
7 P’esei, no tene miedu di mi;mi palabranan lo no aplastá bo.
8 Mi a tende bo bisa,sí, bes tras bes, bo a bisa:
9 ‘Mi ta puru i sin piká;+mi ta limpi, i mi no a kometé niun piká.+
10 Tòg, Dios a haña motibu pa bai kontra mi;e ta konsiderá mi su enemigu.+
11 El a sera mi pianan den blòki di palu pisá;*e ta vigilá tur mi pasonan.’+
12 Wèl, bo no tin rason den e kaso akí. P’esei, esaki ta loke mi tin di bisa:Dios ta superior na kualke hende.+
13 Dikon bo ta keha kontra dje?+Bo ta keha kontra dje pasobra segun bo e no ta kontestá bo?+
14 Bes tras bes, Dios ta papia ku hende,pero hende no ta presta atenshon.
15 Dios ta papia ku nos pa medio di soño, den vishon den anochi,+ora nos bai un soño profundomiéntras nos ta drumí riba nos kama.
16 E ta habri orea di hende,+i e ta enfatisá* e instrukshonnan ku el a duna
17 pasobra e ke yuda hende kita for di mal kaminda,+i e ke yuda hende pa nan no bira orguyoso.+
18 Dios ta spar hende* pa nan no tin ku baha den graf;*+e ta spar nan pa nan no pèrdè nan bida pa medio di spada.*
19 Doló tambe por korigí un persona ora ku e ta drumí riba su kama,ora ku konstantemente su wesunan ta morde.
20 Un persona asina* ta haña asko di pan;e* ta rechasá asta su plato faborito.+
21 Su karni ta kaba na nada;hende por mira tur su wesunan.
22 Kasi e* ta baha den graf;*hende peligroso ta busk’é pa mata.
23 Sinembargo, si tin un mensahero* na su fabor,un persona entre mil persona ku por papia na su fabori siñ’é kon e por ta un hende hustu,
24 Dios lo mustra miserikòrdia na dje i bisa:‘No lag’é baha den graf!*+Mi a haña reskate p’e!+
25 Laga su karni bira mas suave* ku karni di mucha;+lag’é bolbe haña e vigor ku e tabatin den su hubentut.’+
26 Lo e hasi orashon ferviente na Dios,+ i Dios lo asept’é;ku gritu di alegria, lo e mira kara di Dios,i Dios lo konsider’é un persona hustu atrobe.
27 E persona ei lo bisa* otro hende:‘Mi a peka,+ i mi a aktua na un manera robes,pero mi no a haña mi ku e mal konsekuensianan ku mi meresé.*
28 Dios a libra mi* di baha den graf;*+lo mi sigui mira lus.’
29 Tur e kosnan akí, Dios ta hasi pa hende;bes tras bes,* Dios ta hasi tur e kosnan ei pa hende.
30 Dios lo trese hende* bèk for di graf*pa nan por disfrutá di bida.+
31 Presta atenshon, Yòb! Skucha mi!No bisa nada; lo mi sigui papia.
32 Si bo tin algu di bisa, papia numa;papia, pasobra mi ke proba ku bo ta inosente.
33 Si bo no ke bisa nada, djis skucha mi;no bisa nada; lo mi siña bo pa bo por ta sabí.”
Nota
^ Lit.: “mi lenga ku mi shel’i boka.”
^ Òf: “Mi kurason.”
^ Lit.: “spiritu.”
^ Lit.: “ta pone un seyo riba.”
^ Òf: “pa medio di un arma; pa medio di un proyektil.”
^ Lit.: “buraku.”
^ Òf: “spar bida di hende.” Lit.: “alma.”
^ Lit.: “Su bida.”
^ Òf: “su alma.”
^ Lit.: “su alma.”
^ Lit.: “buraku.” Òf: “E ta serka di pèrdè su alma (bida).”
^ Òf: “angel.”
^ Lit.: “buraku.”
^ Òf: “bira mas salú.”
^ Lit.: “kanta pa.”
^ Òf posiblemente: “i esei no a benefisiá mi.”
^ Òf: “mi alma; mi bida.”
^ Lit.: “buraku.”
^ Lit.: “dos biaha, tres biaha tras di otro.”
^ Òf: “trese nan alma.”
^ Lit.: “buraku.”
