Yòb 27:1-23
27 Yòb a sigui ku su spich:
2 “Mi ta hura, mes sigur ku Dios Todopoderoso ta na bida, kende a trata mi na un manera inhustu,+kende a amargá mi bida,*+
3 ku, tanten ku mi ta hala rosea,e rosea di bida ku Dios a duna mi,+
4 mi ta papia bèrdat;mi no ta papia mentira!
5 Hamas lo mi duna boso rason,*i lo mi keda leal na Dios* te na mi morto!+
6 Lo mi keda un hòmber rekto, i lo mi sigui hasi loke ta bon;+tanten ku mi ta na bida,* mi kurason lo no kondená mi.*
7 Mare mi enemigunan haña mesun kastigu ku hende malbado lo risibí;mare e hendenan ku ta ataká mi ser kastigá meskos ku ta kastigá un persona inhustu.
8 Ki speransa tin pa un hende sin rèspèt pa Dios* despues ku e ser destruí?+Ki speransa e tin despues ku Dios kita su bida?*
9 Dios ta skucha ora hende sin rèspèt p’e ta grita pidi yudansa?Dios ta skucha nan ora nan haña nan ku kalamidat?+
10 Nan ta konsiderá Dios Todopoderoso nan fuente di alegria?Nan lo hasi orashon na Dios na tur momento?
11 Laga mi splika boso algun kos ku yudansa* di Dios;lo mi no skonde nada tokante Dios Todopoderoso.
12 Si boso tur a haña vishon,kon bini boso ta papia kos sin sentido?
13 Loke Dios tin reservá pa hende malbado,+esta, loke e opresornan lo risibí komo herensia for di Dios Todopoderoso, ta lo siguiente:
14 Maske un hende malbado tin hopi yu, su yunan lo muri pa medio di spada;+su desendientenan lo sufri pa motibu di hamber.
15 Anto e desendientenan ku keda na bida, malesa mortal lo laga nan baha den graf;nan biudanan lo no yora nan morto.
16 Aunke un hende malbado montoná plata fásilmente komo si fuera ta monton di terai aunke e akumulá hopi paña di bon kalidat fásilmente komo si fuera ta klei,
17 sí, maske e akumulá tur e kosnan ei,ta hende hustu lo bisti su pañanan;+hende inosente lo parti su plata entre nan.
18 Kas ku hende malbado traha lo ta mes frágil ku kas di mòt,manera ramada+ ku wardadó di kunuku sa traha.
19 Hende malbado ta bai drumi riku, pero ora nan lanta, nan no tin nada;*no tin nada pa kosechá den nan kunuku.
20 Teror lo sorprendé nan manera un diluvio;mal tempu lo lastra nan bai kuné anochi.+
21 Bientu di ost lo hisa nan, lastra nan bai kuné for di kaminda nan ta;+nan lo no eksistí mas.
22 Desesperadamente, nan ta purba di skapa for di gara di bientu,+pero bientu lo keda gòlpia nan sin miserikòrdia.+
23 Ta komo si fuera bientu ta bati mani flùit+ pa hasi bofon di nan.”*
Nota
^ Òf: “mi alma.”
^ Lit.: “lo mi deklará boso hustu.”
^ Òf: “lo mi keda íntegro.”
^ Òf: “durante niun di mi dianan.”
^ Òf: “mi ta sigui bisa ku mi ta inosente.”
^ Òf: “alma.”
^ Òf: “hende apóstata; hende sin Dios.”
^ Òf posiblemente: “Laga mi siña boso ku yudansa.”
^ Òf: “nan no ta haña nada pa kosechá.”
^ Òf posiblemente: “For di kaminda nan ta, hende lo bati man i flùit.”
