Bon Notisia Segun Lúkas 24:1-53
24 Riba e promé dia di siman,* mainta trempan trempan, nan a bai na e graf ku e yerbanan ku tabata hole dushi ku nan a prepará.+
2 Nan a haña e piedra ku tabata sera boka di e graf halá un banda.+
3 Ora nan a bai paden, nan no a haña e kurpa di Señor Hesus.+
4 Nan a keda tur turdí. Diripiente, dos hòmber bistí na paña briante a aparesé i para banda di nan.
5 E muhénan a spanta! Nan a keda kabes abou. E hòmbernan a bisa nan: “Dikon boso ta buska un hòmber bibu entre e mortonan?+
6 E no ta akinan, pasobra el a lanta for di morto. Boso ta kòrda loke el a bisa boso tempu ku e tabata na Galilea?
7 El a bisa ku e Yu di hende lo a keda entregá den man di pekadó i ku nan lo a kolog’é na staka. El a bisa tambe ku, riba e di tres dia, lo el a lanta for di morto.”+
8 E ora ei, nan a kòrda loke Hesus a bisa.+
9 Nan a bai for di e graf, i nan a konta e 11 apòstelnan i tur e otro disipelnan tur loke a pasa.+
10 Maria Magdalena, Huana i Maria, mama di Santiago, kendenan a bai na e graf, i vários otro hende muhé ku a kompañá nan, a bai konta e apòstelnan loke a pasa.
11 Pero e apòstelnan no a kere nan. Nan a pensa ku ta ko’i loko e muhénan tabata papia.
12 Pedro a lanta i kore bai na e graf. Ora el a bùk wak paden, el a mira solamente e pañanan di lenen. El a kana bai, i e tabata blo puntra su mes ta kiko lo a pasa.
13 Riba e mesun dia ei, dos disipel tabata riba kaminda, rumbo pa Emaus. Emaus tabata un pueblito ku tabata keda mas o ménos 11 kilometer* for di Herúsalèm.
14 Nan tabata kòmbersá tokante tur e kosnan ku a kaba di sosodé.
15 Miéntras nan tabata kòmbersá i interkambiá opinion, Hesus a yega serka nan i kuminsá kana huntu ku nan,
16 pero nan no a rekonos’é.+
17 El a puntra nan: “Tokante kiko boso tabata debatiendo ku otro na kaminda?” Nan a stòp di kana i keda para ku kara tur tristu.
18 Un di nan tabata yama Kleopas. El a bisa Hesus: “Ta un estranhero bo ta? Ta bo so ta biba? Bo no sa kiko a sosodé e dianan akí na Herúsalèm?”*
19 Hesus a puntra nan: “Kiko a pasa antó?” Nan a kontest’é: “Bo no sa kiko a pasa ku Hesus di Názarèt?+ Hesus tabata un profeta poderoso. Su echonan i su palabranan a demostrá esei. E tabata un profeta poderoso tantu den bista di Dios komo den bista di tur hende.+
20 Nos saserdotenan prinsipal i e lidernan di e hudiunan a laga sentensi’é na morto.+ Nan a laga klab’é na staka.
21 Nos tabata karga speransa ku e lo tabata e persona ku lo a libra Israel.+ Por sierto, awe ta di tres dia kaba desde ku e kosnan ei a sosodé.
22 Algun hende muhé ku tambe ta disipel a laga nos keda babuká. Mainta trempan, nan a bai na e graf,+
23 pero nan no a haña e kurpa. Nan a bin bisa ku algun angel a aparesé i bisa ku Hesus ta na bida.
24 E ora ei, algun di e otro personanan ku tabata huntu ku nos a bai na e graf,+ pero nan no a haña Hesus. Nan a haña e graf manera e muhénan a bisa.”
25 Hesus a bisa nan: “Ai hòmbernan, boso no a komprondé ni kere loke e profetanan a bisa!
26 Kristu no mester a sufri manera el a sufri+ pa e por a drenta den su gloria?”+
27 E ora ei, Hesus a kuminsá splika nan* tur loke Skritura ta bisa tokante dje, kuminsando for di loke Moises a skirbi. Tur loke e profetanan*+ a skirbi tokante dje, tambe el a splika nan.
28 Ora nan tabata serka di yega e pueblito kaminda e dos disipelnan tabata bai, a parse ku Hesus tabata bai sigui su rumbo.
29 P’esei, nan a insistí pa e keda serka nan. Nan a bis’é: “Keda serka nos, pasobra anochi ta serando. E dia ta yegando su fin.” E ora ei, el a bai keda serka nan.
30 Ora e tabata sintá* na mesa huntu ku nan, el a kohe un pan, bendishon’é, kibr’é na pida pida i duna nan.+
31 E ora ei, nan wowo a habri, i nan a rekonos’é, pero el a disparsé for di nan dilanti.+
32 Nan a bisa otro: “Nos kurason no tabata manera na kandela ora e tabata papia ku nos na kaminda i splika nos na plaka chikí loke Skritura ta bisa?”
33 Nan a lanta bai Herúsalèm bèk mesora. Aya, nan a haña e 11 apòstelnan huntu ku e otro disipelnan.
34 E 11 apòstelnan i e otro disipelnan tabata kòmbersá ku otro, i nan a bisa: “Di bèrdat, Señor a ser lantá for di morto. El a aparesé na Simon!”+
35 E ora ei, e dos disipelnan a konta loke a sosodé ku nan riba kaminda. Nan a konta tambe ku nan a rekonosé Hesus ora el a kibra un pan.+
36 Miéntras e apòstelnan i e disipelnan tabata papia tokante e kosnan akí, Hesus a bin para meimei di nan. El a bisa nan: “Pas sea ku boso.”+
37 Nan a spanta! Nan a haña miedu, pasobra nan a kere ku ta un spiritu nan tabata mira.
38 El a bisa nan: “Dikon boso a bira intrankil? Dikon boso ta duda den boso kurason?
39 Wak mi mannan i mi pianan. Ta mi mes. Mishi ku mi pa boso komprobá pa boso mes ku ta ami, pasobra un spiritu no tin karni ni wesu manera boso ta mira ku mi tin.”
40 Ora el a bisa nan esei, el a mustra nan su mannan i su pianan.
41 Nan a bira masha kontentu, i a la bes nan tabata tur asombrá. Nan no por a kaba di kere loke tabata pasando. Hesus a puntra nan: “Boso tin algu di kome akinan?”
42 Nan a dun’é un pida piská hasá.
43 El a tum’é i kom’é nan dilanti.
44 Hesus a bisa nan: “Ora ku mi tabata huntu ku boso, mi a bisa boso+ ku tur loke ta pará skirbí tokante mi den Lei di Moises i den Salmo i ku tur loke e profetanan a skirbi tokante mi* mester kumpli.+ Boso ta kòrda?”
45 E ora ei, el a yuda nan* komprondé loke Skritura ta bisa.+
46 El a bisa nan: “Ta pará skirbí ku Kristu lo sufri i lanta for di morto riba e di tres dia.+
47 Ta pará skirbí tambe ku hende lo prediká den su nòmber. Hende lo prediká na tur nashon,+ kuminsando ku e pueblo di Herúsalèm.+ Nan lo prediká ku hende mester arepentí pa nan por haña pordon di piká.+
48 Boso mester duna testimonio tokante* e kosnan akí.+
49 Lo mi manda pa boso loke mi Tata a primintí di duna boso. Keda den stat* te ora boso risibí poder djariba.”+
50 Despues, el a hiba nan Betania. El a hisa su mannan na laira i bendishoná nan.
51 Ora e tabata bendishonando nan, el a kuminsá alehá for di nan i subi bai shelu.+
52 Nan a bùig* p’e, i ku gran goso, nan a bai Herúsalèm bèk.+
53 I tur ora, nan tabata den tèmpel, alabando Dios.+
Nota
^ Òf posiblemente: “El a bisa Hesus: ‘Abo ta e úniko bishitante na Herúsalèm ku no sa loke a sosodé e dianan akí.’”
^ Òf: “a yuda nan kapta nifikashon di.”
^ Òf: “Tur loke E Profetanan.”
^ Lit.: “tabata di lèn.”
^ Lit.: “den Salmo i den E Profetanan.”
^ Lit.: “el a habri nan mente kompletamente pa nan por a.”
^ Òf: “Boso lo ta testigu di.”
^ Esta, Herúsalèm.
^ Òf: “bùig ku nan kara te na suela.”
