Bon Notisia Segun Lúkas 1:1-80
1 Ekselentísimo Teófilo, hopi hende a hasi esfuerso pa kompilá hopi informashon i pone por eskrito e kosnan akí ku a tuma lugá. Nos tambe ta kompletamente konvensí ku nan a sosodé.+
2 Vários di e kosnan akí, nos a haña sa for di boka di e personanan ku for di prinsipio tabata testigu okular+ i ku tabata proklamá mensahe di Dios.+
3 Bo sa, mi tambe a disidí di skirbi un relato. Mi a investigá tur loke a tuma lugá for di prinsipio, i lo mi relatá e susesonan den órden lógiko pa bo i ku eksaktitut.+
4 Asina, bo por tin sigur ku loke bo a siña* ta bèrdat.+
5 Tempu ku Heródes*+ tabata rei di Hudea, tabatin un saserdote ku tabata yama Zakarías. Zakarías tabata forma parti di un grupo di saserdote ku tabata karga e nòmber Abías.+ Zakarías a kasa ku un señora ku tabata yama Elísabèt. Elísabèt tabata famia di Áròn.
6 Zakarías i Elísabèt tabata hende hustu den bista di Dios. Nan tabata hende íntegro.* Nan tabata kumpli ku tur e mandamentunan i e leinan di Yehova.*
7 Nan no tabatin yu, pasobra Elísabèt tabata steril. Ademas, nan tur dos tabata hende grandi.
8 Dado momento, Zakarías su grupo tabata na turno pa sirbi na tèmpel.+ Zakarías tabata na tèmpel pa sirbi komo saserdote den presensia di Dios.
9 Awor, segun un kustumber ku e saserdotenan tabatin, Zakarías tabata na turno pa drenta e lugá santu di tèmpel di Yehova*+ pa kima sensia.+
10 Ora Zakarías tabata kima sensia, henter e pueblo tabata pafó ta hasi orashon.
11 Dado momento, un angel di Yehova* a aparesé na dje. E angel tabata pará na banda drechi di e altar di kima sensia.
12 Zakarías a spanta ora el a mira e angel. Zakarías a haña hopi miedu.
13 E angel a bis’é: “No tene miedu, Zakarías. Dios a tende bo súplikanan, i bo esposa, Elísabèt, lo haña un yu hòmber. Bo tin ku yama e yu Huan.+
14 Lo bo bira masha kontentu. Hopi hende lo alegrá ora e nase,+
15 pasobra lo e ta grandi* den bista di Yehova.*+ Un kos sí: E no mag di bebe biña ni niun otro bibida alkohóliko.+ For di den barika di su mama, lo e ta yen di spiritu santu.+
16 Lo e yuda hopi israelita* bolbe serka Yehova,* nan Dios.+
17 Ku poder i ku spiritu di Elías,* lo e bai Dios su dilanti,+ i lo e pone kurason di tata bira manera kurason di yu.+ Lo e yuda hende desobediente hasi loke ta hustu i aktua ku sabiduria. Asina, lo e yuda prepará e hendenan pa nan sirbi Yehova.”*+
18 Zakarías a bisa e angel: “Kon mi por ta sigur di esei? Pasobra mi ta bieu kaba, i mi esposa tambe ta hende grandi.”
19 E angel a kontest’é: “Ami ta Gabriel.+ Tur ora, mi ta dilanti di Dios.+ El a manda mi bin papia ku bo i duna bo bon notisia,
20 pero lo bo keda muda, sin por papia, te dia ku e kosnan akí sosodé, pasobra bo no a kere mi palabranan. Tur e kosnan akí lo tuma lugá na nan tempu stipulá.”
21 Mientrastantu, e hendenan tabata warda Zakarías pafó. Nan a haña straño ku el a tarda asina tantu den e lugá santu.
22 Ora el a sali, e no por a papia. Nan a komprondé ku ta un vishon el a kaba di haña den e lugá santu. E tabata hasi seña ku nan pasobra e no por a papia.
23 Ora e dianan ku e tabatin ku sirbi na tèmpel* a pasa, el a bai kas.
24 Mas despues, su esposa Elísabèt a sali na estado. Elísabèt a keda sinku luna largu sin sali for di kas. E tabata bisa:
25 “Wak kiko Yehova* a hasi pa mi. El a kòrda riba mi. Danki na su yudansa, lo mi no pasa bèrgwensa* mas.”+
26 Ora Elísabèt tabatin seis luna na estado, Dios a manda Angel Gabriel+ Názarèt. Názarèt tabata un stat na Galilea.
27 Gabriel mester a bai bishitá un sierto bírgen+ ku tabata komprometé pa kasa ku un hòmber ku tabata yama Hose. Hose tabata desendiente di David. Nòmber di e bírgen tabata Maria.+
28 Gabriel a bai serka Maria i bis’é: “Bon dia! Bo ta un persona sumamente bendishoná. Yehova* ta ku bo.”
29 Maria a bira tur aribabou ora el a tende loke Gabriel a bisa. Maria tabata puntra su mes kiko e saludo ei lo a nifiká.
30 E angel a bis’é: “No tene miedu, Maria. Bo tin Dios su aprobashon.
31 Tende! Lo bo sali na estado, i lo bo haña un yu hòmber.+ Bo tin ku yama e yu Hesus.+
32 Lo e ta grandi,*+ i lo e ser yamá ‘Yu di e Dios haltísimo.’+ Yehova* Dios lo dun’é e trono di su tata David,+
33 i lo e reina komo rei. Lo e goberná kas di Yákòb pa semper, i nunka su Reino lo no yega na un fin.”+
34 Maria a puntra e angel: “Kon esei por ta posibel? Mi no ta teniendo relashon seksual ku ningun hòmber.”+
35 E angel a kontest’é: “Spiritu santu lo baha riba bo,+ i poder di e Dios haltísimo lo kubri bo manera un sombra. P’esei, e yu ku nase lo ta santu,+ i lo e ser yamá ‘Yu di Dios.’+
36 Elísabèt, bo famia, tambe ta bai haña un yu hòmber. El a sali na estado den su behes, aunke hende tabata bisa ku e ta un muhé steril. Ya e tin seis luna na estado,
37 pasobra nada no ta imposibel pa Dios.”*+
38 Maria a bisa: “Ata mi aki, Yehova* su sirbidó! Laga sosodé ku mi manera mi Shon a bisa.” E ora ei, e angel a bai lag’é.
39 Poko tempu despues, Maria a sali purá pa bai un stat na Huda. Huda tabata un region yen di seru.
40 Maria a bai kas di Zakarías. El a drenta e kas i kumindá Elísabèt.
41 Ora Elísabèt a tende Maria su stèm, e yu den su barika a bula. Elísabèt a yena ku spiritu santu.
42 Elísabèt a grita masha duru mes: “Bo ta un muhé bendishoná entre e hende muhénan. E yu ku bo ta karga den bo barika ta un yu bendishoná!
43 Kon bini mi tin e onor akí,* esta, ku mama di mi Señor ta bin bishitá mi?
44 Ora ku bo a kumindá mi, e yu den mi barika a bula di alegria.
45 Bo ta un persona bendishoná* pasobra bo a kere loke Yehova* a manda bisa bo. Sí, bo ta felis pasobra loke el a manda bisa bo lo kumpli sigur.”
46 Maria a bisa: “Mi* ta alabá Yehova.*+
47 Mi ta masha kontentu, danki na Dios, mi Salbador.+
48 El a kòrda riba mi, ami ku ta un sirbidó insignifikante.+ Di awor padilanti, tur generashon lo proklamá ku mi ta un persona bendishoná*+
49 pa motibu di e kosnan grandi ku e Dios poderoso a hasi pa mi. Su nòmber ta santu.+
50 Generashon tras di generashon, lo e mustra miserikòrdia na hende ku tin profundo rèspèt* p’e.+
51 Su mannan fuerte ta hasi kos maravioso. E ta kore ku hende orguyoso.+
52 E ta baha e hòmbernan poderoso for di nan trono+ i halsa hende humilde.+
53 E ta sasia hende ku tin hamber, i e ta duna nan loke ta bon na abundansia.+ E hendenan riku, e ta laga nan bai man bashí.
54 E ta yuda e israelitanan; nan ta su sirbidónan. El a bisa ku lo e tene miserikòrdia di nan.+
55 Dios a primintí nos antepasadonan ku lo e tene miserikòrdia di Ábraham i di e desendientenan di Ábraham.”+
56 Maria a keda mas o ménos tres luna serka Elísabèt. Despues, el a bai su kas bèk.
57 Dado momento, a yega e ora pa Elísabèt duna lus. El a haña un yu hòmber.
58 Su bisiñanan i su famianan a keda kontentu ora nan a haña sa kon Yehova* a mustra gran miserikòrdia na dje.+
59 Riba e di ocho dia, nan a bini pa sirkunsidá* e yu.+ Nan kier a yama e yu Zakarías, meskos ku su tata,
60 pero e mama a bisa nan: “Nò! Mester yam’é Huan.”
61 Nan a bis’é: “No tin niun hende den bo famia ku e nòmber ei.”
62 E ora ei, nan a puntra e tata, pa medio di seña, kon e tabata ke pa yama e yu.
63 El a pidi nan un tabla, i riba e tabla, el a skirbi: “Su nòmber ta Huan.”+ Tur e hendenan a keda asombrá.
64 Diripiente, Zakarías por a papia* atrobe.+ El a alabá Dios.
65 Tur e hendenan ku tabata biba den bisindario a keda boka habrí. Den henter Hudea, ku tabata un region yen di seru, hende tabata papia tokante loke a sosodé.
66 E hendenan a keda pensa riba loke a sosodé. Nan tabata bisa: “Kiko e mucha akí lo bira ora e bira grandi?” No tabatin duda, Yehova* tabata kuné.
67 Su tata, Zakarías, a yena ku spiritu santu. Zakarías a profetisá:
68 “Alabá sea Yehova,* Dios di Israel,+ pasobra e tin atenshon pa su pueblo. El a pèrkurá liberashon pa su pueblo.+
69 El a manda un salbador poderoso,*+ desendiente* di su sirbidó David,+ pa libra nos,
70 manera el a primintí. Hopi tempu pasá, su profetanan santu a anunsiá+
71 ku lo e libra nos for di man di nos enemigunan i for di gara di tur hende ku ta odia nos.+
72 Lo e tene miserikòrdia di nos, manera el a primintí nos antepasadonan. Anto lo e kòrda riba su pakto santu.+
73 Sí, Dios lo no lubidá loke el a primintí nos antepasado Ábraham.+
74 Dios a primintí ku, despues ku e libra nos for di gara di enemigu, nos lo tin e privilegio di sirbié sin miedu di hende.
75 Tur e dianan di nos bida, nos lo por sirbié lealmente i hasi loke ta hustu den su bista.
76 Abo, mi yu, lo bo ta un profeta di e Dios haltísimo, pasobra lo bo bai dilanti di Yehova* pa prepará kaminda p’e.+
77 Lo bo proklamá na su pueblo kon nan lo por haña pordon pa nan pikánan+ i ser salbá,
78 pasobra Dios lo tene tierno kompashon ku su pueblo. Dios su kompashon lo ta manera lus, manera e klaridat ku tin ora di dia habri.
79 Su lus lo lusa e hendenan ku ta biba* den skuridat i den sombra di morto.+ Danki na su lus, nos lo por kana ku éksito riba e kaminda di pas.”
80 E mucha a krese i, ku tempu, el a bira spiritualmente fuerte. El a keda biba den desierto* te dia ku el a presentá su mes públikamente dilanti di e hendenan di Israel.
Nota
^ Lit.: “loke otro hende a konta bo.”
^ Òf: “ireprochabel; sin kulpa.”
^ Òf: “lo e tin un ròl importante.”
^ Òf: “yuda e yunan di Israel.”
^ Òf: “e dianan di su sirbishi sagrado.”
^ Esta, e bèrgwensa di no por a haña yu.
^ Òf: “Lo e tin un ròl importante.”
^ Òf: “pasobra Dios por kumpli ku tur loke e bisa.”
^ Òf: “e privilegio akí.”
^ Òf: “felis.”
^ Òf: “felis.”
^ Òf: “Zakarías a habri su boka i move su lenga.”
^ Òf: “El a hisa un kachu di salbashon.” Den Beibel, hopi biaha, kachu di bestia tabata simbolisá forsa, konkista i viktoria.
^ Òf: “un hende for di kas.”
^ Lit.: “sintá.”
