Bon Notisia Segun Lúkas 17:1-37
17 Hesus a bisa su disipelnan: “Ta bai tin vários kos ku por pone hende trompeká; esei ta inevitabel. Pero ai di e personanan ku ta pone hende trompeká!*
2 Si un persona pone un di e personanan humilde akí trompeká, lo tabata mihó p’e si a kologá un piedra di mulina na su garganta i tir’é den laman.+
3 Tene kuidou! Si bo ruman kometé un piká kontra bo, papia serio kuné.+ Si e arepentí, pordon’é.+
4 Asta si e peka shete biaha pa dia kontra bo i e bini bèk serka bo shete biaha i bisa bo: ‘Pordoná mi,’* bo mester pordon’é.”+
5 E apòstelnan a bisa Señor: “Yuda nos pa nos por tin mas fe.”+
6 Señor a bisa nan: “Si boso fe tabata djis tamaño di un pipita di mòster, boso lo a bisa e palu grandi* akí: ‘Sea ranká ku rais ku tur i planta bo mes den laman!’, i lo el a obedesé boso.+
7 Suponé ku boso tin un esklabo, i el a bai plug pa boso i kuida boso bestianan. Ora e yega kas for di kunuku, boso lo bis’é: ‘Bin sinta kome mesora na mesa’?
8 Mas bien, boso lo bis’é: ‘Prepará algu di kome pa mi. Bisti un frèskòt i sirbi mi. Ora mi kaba di kome i bebe, bo por bai kome i bebe.’
9 Boso lo no tin motibu pa boso ta gradisidu na e esklabo ei pasobra el a hasi loke boso a mand’é hasi, no ta bèrdat?
10 Bon mirá, despues ku boso kaba di hasi tur loke nan manda boso hasi, boso mester bisa: ‘Nos ta simplemente esklabo; nos no meresé nada.* Nos a hasi loke nos tabatin ku hasi.’”+
11 Ora Hesus tabata riba kaminda pa Herúsalèm, el a pasa via e área ku tabata keda na frontera di Samaria i Galilea.
12 Ora e tabata drenta un pueblito, dies hòmber leproso a mir’é, pero nan a keda para na un distansia.+
13 Nan a grita: “Hesus, Maestro, tene miserikòrdia di nos!”
14 Ora Hesus a mira nan, Hesus a bisa nan: “Bai serka e saserdotenan i laga nan mira boso.”+ Ora e leprosonan tabata riba kaminda ta bai, nan a kura.+
15 Un di nan a bira bini bèk ora el a mira ku el a kura. E tabata alabá Dios na bos haltu.
16 El a tira su kurpa abou na pia di Hesus i gradisié. E tabata un samaritano.+
17 Hesus a puntra: “No ta tur dies a kura? Unda e otro nuebe hòmbernan ku a kura a keda?
18 Niun di nan no a bini bèk pa duna gloria na Dios? Ta e hòmber akí so, ku ta di un otro nashon, a bini bèk?”
19 Hesus a bisa e hòmber: “Lanta, i sigui bo kaminda numa. Bo fe a kura bo.”+
20 Un biaha, e fariseonan a puntra Hesus: “Na ki tempu e Reino di Dios lo bini?”+ El a bisa nan: “Ora e Reino di Dios bini, no ta tur hende lo ripará esei.
21 Hende lo no bisa: ‘At’é aki!’ òf ‘At’é aya!’ Pasobra e Reino di Dios ta entre boso.”+
22 Hesus a bisa e disipelnan: “Lo yega e dia ku boso lo tin gana di mira e Yu di hende atrobe i pasa un dia huntu kuné, pero boso lo no mir’é.
23 Hende lo bisa boso: ‘At’é aya!’ òf ‘At’é aki!’ No kere nan, ni sigui nan.+
24 E dianan+ di e Yu di hende+ lo ta manera ora welek ta kòrta i bria di un parti di shelu te e otro parti di shelu.
25 Pero promé, e Yu di hende tin ku soportá hopi sufrimentu. E generashon akí lo rechas’é.+
26 E mesun kosnan ku tabata tuma lugá den e dianan di Noe+ lo tuma lugá den e dianan di e Yu di hende:+
27 E hendenan tabata kome, bebe i kasa, te e dia a yega ku Noe mester a drenta den e arka.+ Áwaseru a kuminsá kai, i un diluvio a destruí nan tur.+
28 Den tempu di Lòt+ tambe e hendenan tabata kome, bebe, kumpra, bende, planta i traha kas.
29 Te e dia a yega ku Lòt mester a sali for di Sódoma. Kandela i suafel a yobe for di shelu i destruí tur e hendenan.+
30 Asina lo sosodé riba e dia ku e Yu di hende keda revelá.+
31 Riba e dia ei, e hendenan ku ta riba dak* no mester baha bai kohe nada den nan kas. I e hendenan ku ta den kunuku no mester bira bai kas bèk pa kohe e kosnan ku a keda atras.
32 Kòrda riba e esposa di Lòt.+
33 Tur hende ku purba di konserbá nan bida lo pèrdè nan bida, pero ken ku pèrdè su bida lo konserbá su bida.+
34 Mi ta bisa boso: Riba e anochi ei, si tin dos hende riba un kama, lo bai ku un di nan i e otro lo keda atras.+
35 Si tin dos muhé ta mula na e mesun mulina, lo bai ku un di nan i e otro lo keda atras.”
36 * ——
37 E disipelnan a puntra Hesus: “Na unda, Señor?” El a kontestá nan: “Kaminda tin kadaver,* ei bo ta haña e águilanan tambe.”+
