Bon Notisia Segun Lúkas 8:1-56
Vários hende muhé ta kompañá Hesus (1-3)
Ilustrashon tokante un sembradó (4-8)
Dikon Hesus tabata usa ilustrashon (9, 10)
Hesus ta splika e ilustrashon tokante e sembradó (11-15)
Niun hende no ta skonde nan lampinan (16-18)
Mama i e ruman hòmbernan di Hesus (19-21)
Hesus ta kalma bientu fuerte (22-25)
Hesus ta manda e demoñonan den trupa di porko (26-39)
Yu muhé di Yairo; un señora ta mishi ku paña di Hesus (40-56)
8 Poko tempu despues, Hesus a kuminsá biaha di stat pa stat i di pueblito pa pueblito pa prediká bon notisia tokante e Reino di Dios.+ E 12 apòstelnan tabata huntu kuné.
2 Algun hende muhé tambe a kompañá nan. Algun di e hende muhénan ei tabata malu òf poseí pa demoño, pero Hesus a kura nan. Entre nan tabatin Maria, ku tabata konosí tambe komo Magdalena i ku tabata poseí pa shete demoño;
3 Huana,+ esposa di Kuzas (Kuzas tabata na enkargo di kas di Heródes) i Susana. Aparte di nan, hopi hende muhé mas tabata kompañá Hesus. Nan tur tabata usa nan pertenensianan pa sostené Hesus i e apòstelnan.+
4 Miéntras Hesus tabata bai di stat pa stat, mas i mas hende di vários stat tabata kompañ’é. Dado momento, tabatin un multitut grandi di hende huntu kuné. E ora ei, el a konta nan un ilustrashon.+ El a bisa:
5 “Un kunukero a sali bai sembra simia. Ora ku e tabata sembra, algun simia a kai kantu di kaminda. Hende a pasa trapa e simianan i para di shelu a kome nan.+
6 Algun simia a kai den baranka. Nan a sprùit, pero e planchinan* a seka pa falta di awa.+
7 Algun di e simianan a kai den mata di sumpiña. E matanan di sumpiña a krese i stek e planchinan ku a sprùit.+
8 Algun di e simianan a kai den bon tera. Nan a sprùit, i e matanan a kuminsá produsí. Algun di e matanan a produsí 100 biaha mas simia.”+ Ora Hesus a kaba di konta e ilustrashon ei, el a bisa na bos haltu: “Ken ku tin orea, skucha. Sí, skucha.”+
9 Su disipelnan a bin pidié pa splika nan nifikashon di e ilustrashon.+
10 El a bisa nan: “Dios ta yuda boso komprondé e sekretonan sagrado tokante su Reino, pero pa otro hende, e ilustrashonnan ku mi ta konta tokante e Reino di Dios ta djis ilustrashon.+ Nan ta mira, pero ta pòrnada nan ta mira. Nan ta tende, pero nan no ta komprondé e kosnan.+
11 Esaki ta nifikashon di e ilustrashon: E simianan ta palabra di Dios.+
12 Tin hende ta tende palabra di Dios, pero Diabel ta bini i kohe loke a ser sembrá den nan kurason pa nan no kere i haña salbashon. Den nan kaso, e simianan ku ta ser sembrá ta resultá di ta manera simia ku ta kai kantu di kaminda.+
13 Tin hende ta tende palabra di Dios i aseptá e mensahenan ku goso. Nan ta hasi kaso pa un tempu, pero ora nan haña nan ku prueba, nan ta trompeká. Den nan kaso, e simianan ku ta ser sembrá ta resultá di ta manera simia ku ta kai den baranka i ku no ta saka rais.+
14 Tin tambe e hendenan ku ta tende palabra di Dios pero ku ta laga preokupashon, rikesa+ i plaser di e mundu akí+ distraí nan i stek e mensahenan ku nan ta skucha. P’esei, nan frutanan no ta hecha. Den nan kaso, e simianan ku ta ser sembrá ta resultá di ta manera simia ku ta kai den mata di sumpiña.+
15 Tin tambe e simianan ku ta kai den bon tera. Esei ta kaso di e hendenan ku ta tende palabra di Dios i balorá e mensahenan. Nan ta hende sinsero, i nan tin bon kurason.+ Nan ta perseverá i produsí fruta.+
16 Ningun hende no ta sende un lampi i skond’é bou di un makutu òf pon’é bou di un kama. Mas bien, nan ta pone e lampi riba un mesita.* Asina, e lampi ta pèrkurá lus pa tur hende ku drenta den e kas.+
17 Pues, no tin niun sekreto ku lo no sali na kla; ni no tin nada asina bon skondí ku nunka lo no keda deskubrí; nada no ta keda skondí pa semper.+
18 P’esei, skucha bon ora nan ta papia ku boso, pasobra hende ku tin lo haña mas,+ pero hende ku no tin lo pèrdè asta loke nan ta kere ku nan tin.”+
19 Dado momento, Hesus su mama i su ruman hòmbernan+ a bini serka dje, pero nan no por a yega serka dje pasobra tabatin hopi hende.+
20 Algun hende a bisa Hesus: “Bo mama i bo ruman hòmbernan ta pará pafó. Nan a bini serka bo.”
21 El a kontestá nan: “Mi mamanan i mi rumannan ta e personanan akí ku ta tende palabra di Dios i ku ta kumpli ku loke nan ta tende.”+
22 Un biaha, Hesus a subi den un boto, huntu ku su disipelnan, i bisa nan: “Laga nos krusa bai otro banda.” Nan a hisa bela i nabegá bai otro banda di e lago.+
23 Ora nan tabata nabegando, Hesus a pega soño. Diripiente, bientu a kuminsá supla masha duru mes, i e boto a kuminsá yena ku awa. Nan tabata den peliger.+
24 E disipelnan a bai serka Hesus i lant’é for di soño. Nan a bis’é: “Maestro, Maestro, nos ta serka di muri!” Hesus a lanta i ordená bientu i e olanan grandi pa nan kalma, i nan a kalma kompletamente.+
25 El a puntra su disipelnan: “Unda boso fe a keda?” E disipelnan a keda morto spantá i masha asombrá. Nan tabata puntra otro: “Ken e hòmber akí ta? E ta duna bientu i laman òrdu, i nan ta obedes’é!”+
26 Den esei, nan a yega kosta di teritorio* di e gerasenonan,+ ku tabata keda na otro banda di Laman di Galilea.
27 Ora Hesus a baha for di e boto, el topa un hòmber ku tabata poseí pa demoño. E hòmber tabata di un stat den bisindario. E hòmber tabatin basta tempu sin bisti paña na su kurpa, i e tabata biba den santana, i no den un kas.+
28 Ora el a mira Hesus, el a dal un gritu, kai na rudia su dilanti i kuminsá grita masha duru mes: “Kiko mi tin di haber ku bo, Hesus, Yu di e Dios haltísimo? Mi ta roga bo pa no kastigá* mi.”+
29 (Hesus a ordená e spiritunan impuru pa sali for di e hòmber. Pa hopi tempu, nan tabatin e hòmber den nan gara.+ Bes tras bes, hende tabata bui e hòmber ei, mar’é na kadena i laga algun hende vigil’é. Pero kada bes, e tabata kibra e kadenanan, i e demoñonan tabata fòrs’é pa bai vários lugá aislá.)
30 Hesus a puntra e hòmber: “Kon yama bo?” El a bisa: “Legion.” Su nòmber tabata Legion pasobra ta hopi demoño a drenta den dje.
31 E demoñonan a roga Hesus pa no manda nan den abismo.+
32 Awor, djis ei banda, tabatin un trupa grandi di porko+ ta kome riba seru. E demoñonan a supliká Hesus pa laga nan drenta den e porkonan, i el a permití nan.+
33 Nan a sali for di e hòmber i drenta den e porkonan. E porkonan a sali na kareda, bula for di e baranka steil, kai den e lago i hoga.
34 Ora e wardadónan di e porkonan a mira loke a sosodé, nan a kore limpi bai. Nan a bai konta e hendenan den stat i e hendenan di kunuku loke a sosodé.
35 E hendenan a sali bai wak ta kiko a sosodé. Ora nan a yega serka Hesus, nan a mira e hòmber for di ken e demoñonan a sali, ku paña na su kurpa, i e tabata na su sano huisio. E tabata sintá na pia di Hesus. E hendenan a haña miedu.
36 E hendenan ku a mira loke a sosodé a konta e otro hendenan kon e hòmber ku tabata poseí pa demoño a bira bon.
37 Hopi habitante di e region di e gerasenonan a pidi Hesus pa e bai for di nan region, pasobra nan a haña hopi miedu. E ora ei, Hesus a subi den boto pa bai.
38 E hòmber for di ken e demoñonan a sali a kuminsá roga Hesus pa e bai huntu ku Hesus, pero Hesus a bis’é:+
39 “Bai bo kas bèk, i konta tur hende loke Dios a hasi pa bo.” E hòmber a bai i kuminsá proklamá den henter e stat loke Hesus a hasi p’e.
40 Ora Hesus a yega bèk na otro banda di e lago, tabatin un multitut di hende ku tabata warda riba dje. Nan a risibié amablemente.+
41 Un hòmber ku tabata yama Yairo, kende tabata un kabesante di snoa, a bini serka dje. El a tira su kurpa abou na pia di Hesus i supliká Hesus pa bai su kas kuné,+
42 pasobra su úniko yu, su yu muhé di mas o ménos 12 aña, tabata muriendo.
Ora Hesus tabata kana bai e kas, e multitut di hende tabata pusha bini riba dje di tur banda.
43 Tabatin un señora ku 12 aña largu tabatin sangramentu.+ Ningun hende no por a kur’é.+
44 El a aserká Hesus di patras i mishi ku zòm di Hesus su paña,+ i mesora e sangramentu a para.
45 Hesus a puntra: “Ta ken a mishi ku mi?” Tur hende a bisa ku no tabata nan. Pedro a bisa Hesus: “Maestro, ta masha hopi hende tin rònt di bo ta pusha bini riba bo.”+
46 Hesus a bisa: “Un hende a mishi ku mi, pasobra mi a sinti ku poder+ a sali for di mi.”
47 Ora e señora a mira ku e no por a keda skondí mas, el a bini dilanti, temblando, i kai na rudia dilanti di Hesus. I dilanti di tur hende, el a konta pakiko el a mishi ku Hesus i kon el a kura mesora.
48 Hesus a bis’é: “Mi yu, bo fe a kura bo. Bai na pas.”+
49 Miéntras Hesus tabata papia, un hòmber for di kas di e kabesante di snoa a bin bisa e kabesante: “Bo yu muhé a muri. No molestiá e Maestro mas.”+
50 Hesus a tende loke e hòmber a bisa, p’esei el a bisa Yairo: “No preokupá. Sigui pone fe den Dios, i bo yu lo bira bon.”*+
51 Ora Hesus a yega kas di Yairo, Hesus no a laga ningun hende drenta huntu kuné, ku eksepshon di Pedro, Huan, Santiago i e mayornan di e mucha.
52 Tur e hendenan tabata yora i bati nan pechu di tristesa pasobra e mucha a muri. El a bisa nan: “No yora mas,+ pasobra e mucha no a muri. Ta na soño e ta.”+
53 Nan a harié, pasobra nan tabata sa ku e mucha a muri.
54 Hesus a kohe e mucha su man tene i bisa na bos haltu: “Hobensita, lanta!”+
55 E mucha a bolbe haña forsa di bida,*+ i el a lanta mesora.+ Hesus a pidi nan pa duna e mucha algu di kome.
56 E mayornan no por a kontené nan emoshon, pero el a bisa nan pa no bisa ningun hende loke a sosodé.+
