Bon Notisia Segun Lúkas 19:1-48
19 Hesus a drenta Yériko, i e tabata pasando via e stat pa sigui su rumbo.
2 Na Yériko, tabatin un hòmber ku tabata yama Zakeo. E tabata un di e hefenan di e kobradónan di belasting. E tabata un hòmber riku.
3 Zakeo tabata buska moda di mira ta ken tabata Hesus, pero e no por a logra pasobra tabatin un kantidat grandi di hende i e tabata un hòmber kòrtiku.
4 P’esei, el a kore pasa e hendenan i subi un palu di figu shimaron pa e por a mira Hesus, pasobra Hesus tabata serka di pasa ei banda.
5 Ora Hesus a yega banda di e palu, Hesus a hisa kara wak ariba i bisa Zakeo: “Zakeo, baha abou lihé, pasobra awe, mi mester keda na bo kas.”
6 Zakeo a baha abou rápidamente, i el a risibí Hesus ku goso.
7 Tur e hendenan a kuminsá murmurá ora nan a mira loke a sosodé. Nan a bisa: “El a bai kas di un hòmber pekadó.”+
8 Awor bon, Zakeo a lanta para i bisa Señor: “Señor, mitar di mi pertenensianan, mi ta bai duna hende pober. Anto tur e hendenan ku mi a ranka plaka for di dje na un manera inhustu,* lo mi duna nan kuater biaha e montante ku mi a kita for di nan.”+
9 Hesus a bis’é: “Awe, e kas akí a ser salbá, pasobra bo tambe ta yu di Ábraham.
10 E Yu di hende a bini pa buska e hendenan ku ta pèrdí i pa salba nan.”+
11 Miéntras e disipelnan tabata skuchando, Hesus a disidí di konta nan un ilustrashon, pasobra e tabata yegando Herúsalèm i e disipelnan tabata kere ku e Reino di Dios lo a aparesé un ora pa otro.+
12 Hesus a bisa: “Un hòmber di desendensia real tabata prepará pa biaha bai un tera leu+ pa keda koroná komo rei pa despues, e bini bèk.
13 El a manda yama dies di su esklabonan, i el a duna nan dies mina.* El a bisa nan: ‘Hasi negoshi ku e minanan te ora mi bini bèk.’+
14 Su paisanonan tabatin rabia riba dje. P’esei, nan a manda un delegashon su tras pa bisa: ‘Nos no ke pa e hòmber ei bira nos rei.’
15 Ku tempu, despues ku el a keda koroná komo rei, el a bini bèk i el a manda yama e esklabonan ku el a duna plaka.* E tabata ke sa kuantu ganashi nan a generá.+
16 Un di e esklabonan a presentá dilanti di dje i bis’é: ‘Señor, mi a gana dies mina ku e mina ku bo a duna mi.’+
17 E rei a bis’é: ‘Bon trabou! Bo ta un bon esklabo. Bo a demostrá ku bo ta un persona konfiabel den un asuntu di poko importansia. Mi ta duna bo outoridat pa goberná dies stat.’+
18 Un otro esklabo a bini i bisa: ‘Señor, mi a gana sinku mina ku e mina ku bo a duna mi.’+
19 E rei a bis’é: ‘Abo tambe lo ta un gobernante. Mi ta pone sinku stat na bo enkargo.’
20 Un otro esklabo a bini i bisa: ‘Señor, ata e mina ku bo a duna mi. Mi a ward’é bon den un pida paña.
21 E kos ta ku mi tabatin miedu di bo, pasobra bo ta un hòmber masha strèn. Bo ta lanta loke bo no a depositá, i bo ta kosechá loke bo no a sembra.’+
22 E rei a kontest’é: ‘Bo ta un mal esklabo! Mi ta usa bo mes palabranan pa husga bo. Bo a bisa ku mi ta un hòmber masha strèn, ku mi ta lanta loke mi no a depositá i ku mi ta kosechá loke mi no a sembra.+
23 Dikon bo no a pone mi plaka* na banko? E ora ei, lo mi por a lant’é ku interes ora mi yega.’
24 E ora ei, e rei a bisa e personanan ku tabata pará einan: ‘Kita e mina for di dje i duna e esklabo ku tin dies mina e plaka.’+
25 Ma nan a bis’é: ‘Señor, e tin dies mina kaba!’
26 El a kontestá nan: ‘Mi ta bisa boso: Tur hende ku tin lo risibí mas, pero e hendenan ku no tin nada, asta loke nan tin lo ser kitá for di nan.+
27 Pa loke ta mi enemigunan ku no tabata ke pa mi bira nan rei, trese nan i mata nan mi dilanti.’”
28 Ora Hesus a kaba di konta e ilustrashon ei, el a sigui su kaminda, rumbo pa Herúsalèm.
29 Ora e tabata serka di yega Bètfage i Betania, ku tabata keda pegá ku Seru di Oleifi,+ el a bisa dos di su disipelnan:+
30 “Bai, i drenta e pueblito ku boso ta mira boso dilanti. Asina ku boso drenta, boso lo mira un yu di buriku* mará. Nunka ningun hende no a yega di sinta riba e buriku ei. Lòs e i tres’é pa mi.
31 Si un hende puntra boso: ‘Dikon boso ta lòs e?’ Bisa: ‘Señor tin mester di e bestia akí.’”
32 E dos disipelnan a bai, i nan a haña e yu di buriku manera Hesus a bisa nan.+
33 Ora nan tabata lòs e, e doñonan a puntra nan: “Dikon boso ta lòs e yu di buriku?”
34 Nan a kontestá: “Señor tin mester di e bestia akí.”
35 E disipelnan a hib’é pa Hesus, i nan a habri nan pañanan riba e yu di buriku i laga Hesus sinta riba dje.+
36 Ora ku Hesus tabata pasa, e hendenan tabata habri nan pañanan abou riba kaminda.+
37 Ora e tabata serka di yega bahada di Seru di Oleifi, henter e multitut di disipel a bira masha kontentu. Na bos haltu, nan tabata alabá Dios pa tur e milagernan ku nan a mira.
38 Nan tabata bisa: “Bendishoná ta e persona ku ta bini komo Rei den nòmber di Yehova!* Pas den shelu, i gloria na Dios, ku ta te den shelu aya ariba!”+
39 Algun di e fariseonan ku tabata den e multitut di hende a bisa Hesus: “Maestro, skual bo disipelnan.”+
40 Hesus a kontestá nan: “Mi ta bisa boso: Si nan keda ketu, e piedranan lo grita.”
41 Ora Hesus tabata serka di yega Herúsalèm, el a kuminsá yora ora el a mira e stat.+
42 El a bisa: “Mare bo tabata sa riba e dia akí kiko ta e kosnan ku bo tin ku hasi pa bo por tin pas. Aworakí, nan ta skondí pa bo.+
43 Un dia, bo enemigunan lo traha un muraya di staka ku punta skèrpi rònt di bo, i nan lo rondoná bo i sera bo di tur banda.+ E dia ei lo yega!
44 Nan lo basha bo abou i destruí bo yunan.*+ Ni un di bo piedranan lo no keda riba otro.+ Esei lo sosodé ku bo pasobra bo no a hasi kaso ora a bin inspekshoná bo.”
45 Despues, Hesus a drenta den tèmpel i kuminsá kore ku e hendenan ku tabata bende kos den tèmpel.+
46 El a bisa nan: “Ta pará skirbí: ‘Mi kas lo ta un kas di orashon,’+ pero boso ta hasi mi kas un kueba di ladron.”+
47 Tur dia, Hesus tabata siña e hendenan den tèmpel, pero e saserdotenan prinsipal, e eskribanan i e hendenan di mas prominente di e pueblo tabata blo buska moda di mat’é.+
48 Pero nan no a logra haña un bon manera pa hasi esei, pasobra henter e pueblo tabata skucha Hesus ku masha atenshon.+
