Bon Notisia Segun Lúkas 9:1-62
Hesus ta duna e 12 apòstelnan instrukshon pa ora nan ta bai prediká (1-6)
Hesus ta laga Heródes keda konfundí (7-9)
Hesus ta alimentá 5.000 hòmber (10-17)
Pedro ta bisa ku Hesus ta e Kristu (18-20)
Hesus ta papia di su morto (21, 22)
E rekisitonan ku un disipel mester kumpli kuné (23-27)
E transfigurashon di Hesus (28-36)
Hesus ta kura un mucha hòmber ku ta poseí pa demoño (37-43a)
Hesus ta bolbe papia di su morto (43b-45)
E disipelnan ta diskutí tokante kua di nan ta mas importante (46-48)
Ken ku no ta kontra nos ta na nos banda (49, 50)
Un pueblito samaritano ta rechasá Hesus (51-56)
Loke sigui Hesus ta enserá (57-62)
9 Hesus a reuní e 12 apòstelnan, i el a duna nan poder i outoridat pa saka tur demoño+ i pa kura malesa.+
2 Ademas, el a duna nan e tarea pa bai prediká tokante e Reino di Dios i pa kura hende malu.
3 El a bisa nan: “No bai ku nada pa e biahe: No bai ku garoti ni ku saku pa pone kos aden ni ku pan ni ku plaka* ni ku paña èkstra.*+
4 Unda ku boso yega, keda na kas di e hendenan ku risibí boso te ora ku boso tin ku bai for di e lugá.+
5 Kaminda e hendenan no risibí boso, sagudí boso pia kita stòf* ora boso sali for di e stat. Esei lo sirbi komo prueba ku e hendenan a ser spièrtá.”+
6 E apòstelnan a sali bai tur pueblito. Tur kaminda, nan a prediká bon notisia i kura e hendenan.+
7 Ora Heródes,* kende tabata un gobernante di distrito, a tende tur e kosnan ku tabata sosodé, el a keda masha konfundí, pasobra algun hende tabata bisa ku ta Huan a lanta for di morto.+
8 Algun otro hende tabata bisa ku ta Elías a aparesé, i tabatin hende ku tabata bisa ku ta un di e profetanan di antigwedat a lanta for di morto.+
9 Heródes a bisa: “Mi mes a laga kap kabes di Huan kita afó.+ Ta ken e hòmber ku ta hasi tur e kosnan ei ta antó?” P’esei, Heródes tabata buska moda di konosé Hesus personalmente.+
10 Ora e apòstelnan a bini bèk, nan a konta Hesus tur loke nan a hasi.+ Hesus a hiba nan un stat ku tabata yama Bètsaida pa e por tabata su so huntu ku nan.+
11 E hendenan a haña sa ku Hesus a bai, i nan a siguié. El a risibí nan amablemente. El a papia ku nan tokante e Reino di Dios, i el a kura e hendenan ku tabata malu.+
12 Atardi lat, e 12 apòstelnan a aserk’é i bis’é: “Laga e hendenan bai e pueblitonan òf e kunukunan den bisindario pa nan por haña algun lugá kaminda nan por keda i algu di kome, pasobra kaminda nos ta aki ta un lugá aislá.”+
13 Hesus a bisa nan: “Boso duna nan algu di kome.”+ Nan a bis’é: “Ta sinku pan i dos piská so nos tin. Òf nos mester bai kumpra kuminda pa tur e hendenan akí?”
14 Den e multitut, tabatin mas o ménos 5.000 hòmber. Hesus a bisa su disipelnan: “Laga e hendenan sinta abou den grupo di mas o ménos 50 hende.”
15 Tur hende a sinta abou, manera e disipelnan a bisa nan.
16 E ora ei, Hesus a kohe e sinku pannan i e dos piskánan, hisa su kara na shelu i hasi un orashon.* El a kibra e pannan, i despues, el a duna su disipelnan e pannan i e piskánan pa nan parti pa e hendenan.
17 Tur hende a kome i keda satisfecho. Despues, e disipelnan a rekohé e pida pannan ku a sobra. Nan a yena 12 makutu.+
18 Mas despues, ora Hesus tabata su so, hasiendo orashon, e disipelnan a bini serka dje. El a puntra nan: “Ken e hendenan ta bisa ku mi ta?”+
19 Nan a kontest’é: “Tin hende ta bisa ku bo ta Huan Boutista, i tin hende ta bisa ku bo ta Elías. Algun otro hende ta kere ku ta un di e profetanan di antigwedat a lanta for di morto.”+
20 El a puntra nan: “Ken boso ta bisa ku mi ta?” Pedro a kontest’é: “Abo ta e Kristu, e persona ku Dios a skohe.”+
21 E ora ei, Hesus a papia seriamente ku nan. El a bisa nan pa no bai konta ningun hende nada.+
22 El a sigui bisa: “E Yu di hende mester sufri masha hopi mes. E ansianonan, e saserdotenan prinsipal i e eskribanan lo rechas’é. Lo e ser matá,+ i riba e di tres dia, lo e ser lantá for di morto.”+
23 E ora ei, Hesus a bisa tur e hendenan presente: “Si un hende ke sigui mi, e tin ku nenga su mes.+ Dia aden dia afó, e mester hisa su staka di tormento* i sigui mi kontinuamente.+
24 Tur hende ku ke salba nan bida* lo pèrdè nan bida, pero ken ku pèrdè su bida pa mi motibu lo salba su bida.+
25 Kiko un hende ta gana si e haña henter mundu pero e pèrdè su bida òf hasi su mes daño?+
26 Si un hende tin bèrgwensa di mi òf si loke mi ta bisa ta pon’é pasa bèrgwensa, e Yu di hende tambe lo tin bèrgwensa di dje. Ora e Yu di hende bini den su gloria i den gloria di su Tata i den gloria di e angelnan santu, e Yu di hende lo tin bèrgwensa di dje.+
27 Mi ta sigurá boso: Algun di e hendenan pará akinan lo no muri sin mira e Reino di Dios.”+
28 Mas o ménos ocho dia despues ku Hesus a papia e palabranan ei, Hesus a subi bai riba un seru huntu ku Pedro, Huan i Santiago pa hasi orashon.+
29 Ora e tabata hasi orashon, su kara a kambia i su paña a bira blanku briante.
30 Diripiente, dos hòmber a aparesé i kuminsá kòmbersá kuné. Tabata Moises i Elías.
31 Nan kara tabata bria. Nan a aparesé i kuminsá kòmbersá ku Hesus tokante su baimentu for di e mundu akí ku lo mester a sosodé na Herúsalèm.+
32 Pedro i e personanan* ku tabata huntu ku Pedro tabata kansá, mitar na soño. Ora nan a spièrta kompletamente, nan a mira Hesus, den su gloria,+ i e dos hòmbernan ku tabata pará huntu kuné.
33 Ora ku e dos hòmbernan ei tabata kla pa bai, Pedro a bisa Hesus: “Maestro, ta bon ku nos ta akinan. Laga nos harma tres tènt akinan: un pa bo, un pa Moises i un pa Elías.” Pedro no tabata sa kiko e tabata papia.
34 Miéntras Pedro tabata papia, a forma un nubia ku a kubri nan. Nan a haña miedu.
35 Un stèm+ for di e nubia a bisa: “Esaki ta mi Yu, kende mi a skohe.+ Skuch’é.”+
36 Ora e stèm tabata resoná, e disipelnan a mira Hesus su so pará einan. Nan no a bai konta ningun hende loke nan a mira.+ Pa basta tempu, nan a keda ketu.
37 E siguiente dia, ora nan tabata baha for di e seru, un multitut grandi di hende a topa Hesus.+
38 Un hòmber den e multitut a kuminsá grita: “Maestro, mi ta roga bo pa yuda mi yu hòmber. Ta mi úniko yu.+
39 Tin un spiritu impuru ta atak’é i pon’é kuminsá grita diripiente. E spiritu ta pon’é kai djimpi te ku e ta kuminsá skuma na boka. E spiritu ta maltratá mi yu malamente, i despues di basta ratu, e ta bai laga mi yu.
40 Mi a roga bo disipelnan pa kore ku e spiritu, pero nan no tabata por.”
41 Hesus a bisa: “E generashon akí ta un generashon sin fe i malbado.+ Pa kuantu tempu mi tin ku keda serka boso i soportá boso? Trese bo yu.”+
42 Ora e mucha tabata kana bini serka Hesus, e demoño a benta e mucha abou i pon’é kai un djimpi pisá. Hesus a skual e spiritu impuru i kura e mucha. Anto Hesus a entregá e yu na e tata.
43 Ora e hendenan a mira e inmenso poder di Dios, nan a keda boka habrí.
Tur e hendenan a keda masha impreshoná ora nan a mira e milagernan ku Hesus a hasi. Na e momento ei, Hesus a bisa su disipelnan:
44 “Tende bon i kòrda loke mi ta bai bisa boso: E Yu di hende lo ser entregá den man di hende.”+
45 Pero nan no a komprondé kiko e tabata ke men. Bon mirá, nan no tabata sa presis kiko tabata bai sosodé. P’esei, nan no por a komprondé e asuntu. Ademas, nan tabatin miedu di puntra Hesus kiko e tabata ke men.
46 Den esei, e disipelnan a kuminsá diskutí ku otro tokante kua di nan tabata e persona di mas importante.*+
47 Hesus, kende tabata sa loke tabata biba den nan kurason, a laga un mucha chikitu bin para banda di dje.
48 Hesus a bisa su disipelnan: “Ken ku risibí un mucha, manera e mucha akí, den mi nòmber ta risibiendo mi tambe. Ken ku risibí mi ta risibiendo tambe e Persona ku a manda mi serka boso.+ E hendenan entre boso ku ta komportá nan mes manera un persona insignifikante ta grandi.”*+
49 Huan a bis’é: “Maestro, nos a mira un hòmber ta saka demoño den bo nòmber, i nos a purba di stòp e, pasobra e no ta sigui bo huntu ku nos.”+
50 Hesus a bis’é: “No stòp e, pasobra ken ku no ta kontra boso ta na boso banda.”
51 Awor, e dia pa Hesus subi bai shelu tabata yegando;+ p’esei, Hesus tabata determiná pa bai Herúsalèm.
52 El a manda algun mensahero su dilanti, i nan a bai un sierto pueblito na Samaria pa hasi algun preparashon p’e.
53 Pero e habitantenan di e pueblito no tabata ke risibí Hesus,+ pasobra nan a haña sa ku e tabata bayendo Herúsalèm.
54 Ora e disipelnan Santiago i Huan+ a mira loke a sosodé, nan a puntra Hesus: “Señor, bo ke pa nos pidi Dios manda kandela for di shelu riba nan i kaba ku nan?”+
55 Hesus a bira skual nan.
56 E ora ei, nan a bai un otro pueblito.
57 Na kaminda, un hende a bisa Hesus: “Lo mi sigui bo unda ku bo bai.”
58 Hesus a bis’é: “Zoro* tin hòl i para tin nèshi, pero e Yu di hende no tin niun kaminda pa e pone su kabes.”+
59 Hesus a bisa un otro hòmber: “Sigui mi.”* E hòmber a bis’é: “Señor, permití mi bai dera mi tata promé.”+
60 Hesus a kontest’é: “Laga e mortonan+ dera nan mortonan. Abo, bai tur kaminda i prediká tokante e Reino di Dios.”+
61 Un otro hende a bisa Hesus: “Señor, lo mi sigui bo, pero permití mi bai yama mi hendenan di kas ayó promé.”
62 Hesus a bis’é: “Ken ku pone man na plug i bira wak patras+ no ta apto pa drenta e Reino di Dios.”+
Nota
^ Òf: “ni ku dos paña.”
^ Lit.: “plata.”
^ Sagudí bo pia kita stòf a indiká ku bo a libra bo mes di responsabilidat.
^ Òf: “i bendishoná e kuminda.”
^ Òf: “alma.”
^ Esta, Santiago i Huan.
^ Òf: “mas grandi.”
^ Òf: “un persona insignifikante lo haña un puesto di onor.”
^ Na hulandes, vos. Un bestia ku parse kachó.
