Bon Notisia Segun Huan 2:1-25
2 Dos dia despues, tabatin un fiesta di kasamentu na Kana, na Galilea. Mama di Hesus tambe tabata na e fiesta.
2 Hesus i su disipelnan tambe tabata invitá na e kasamentu.
3 Ora ku biña tabata kabando, Hesus su mama a bisa Hesus: “No tin mas biña.”
4 Hesus a kontest’é: “Kiko nos tin di haber ku esei?* Ainda no ta ora pa mi aktua.”
5 Su mama a bisa e hendenan ku tabata sirbi biña: “Hasi loke e bisa boso.”
6 Na e lugá, tabatin seis tinashi di piedra pa pone awa aden, manera e reglanan di purifikashon di e hudiunan a eksigí.+ Kada un di e tinashinan por a kontené mas o ménos 44 pa 66 liter di awa.*
7 Hesus a bisa e sirbidónan: “Yena e tinashinan ku awa.” Nan a yena e tinashinan te na rant.
8 Hesus a bisa nan: “Saka un poko hiba pa e direktor di e fiesta.” Nan a hasi manera el a bisa nan.
9 Ora e direktor di e fiesta di kasamentu a purba e awa ku a bira biña, el a yama e brùidehòm pasobra e no tabata sa di unda e biña a bini. (E sirbidónan ku a saka e awa sí tabata sa esei.)
10 E direktor di e fiesta a bisa e brùidehòm: “Tur hende ta sirbi e mihó biña promé, i ora e hendenan ta burachi, nan ta sirbi biña inferior. Ma abo a warda e mihó biña te awor.”
11 E milager ei ku Hesus a hasi na Kana, na Galilea, tabata su promé milager. Asina ei, el a laga hende mira su gloria,+ i su disipelnan a pone fe den dje.
12 Despues, Hesus i su mama i su ruman hòmbernan+ i su disipelnan a bai Kapernaum,+ pero nan no a keda hopi dia ayanan.
13 Despues, Hesus a subi bai Herúsalèm. Tabata falta poko dia pa Pasku Hudiu.*+
14 Ora Hesus a drenta den tèmpel, el a mira e hendenan ta bende baka, toro, karné i palomba.+ Tabatin kambiadó di plaka tambe sintá na nan mesanan.
15 Hesus a traha un zuip di kabuya i kore ku e karnénan, ku e toronan i ku e bakanan for di den tèmpel. E hendenan ku tabata bende bestia den tèmpel, tambe el a kore kuné. Hesus a basha e monedanan di e kambiadónan di plaka abou i bòltu nan mesanan.+
16 El a bisa e hendenan ku tabata bende palomba: “Saka e kosnan akí for di aki den! Stòp di hasi negoshi den kas di mi Tata!”+
17 Su disipelnan a kòrda ku ta pará skirbí: “E amor* ku mi tin pa bo kas ta manera kandela den mi.”+
18 E hudiunan a puntra Hesus: “Ku ki derecho bo ta hasi e kosnan akí? Hasi un milager pa nos mira+ ku bo tin derecho.”
19 Hesus a kontestá nan: “Basha e tèmpel akí abou, i lo mi lant’é bèk denter di tres dia.”+
20 E hudiunan a bis’é: “A tuma 46 aña pa konstruí e tèmpel akí. Abo ta bai lant’é den tres dia?”
21 E tèmpel ku Hesus tabata papia di dje tabata su mes kurpa.+
22 Ta despues ku Hesus a lanta for di morto, su disipelnan a kòrda ku e tabatin kustumber di papia e palabranan ei.+ Anto nan a kere Hesus i loke Skritura ta bisa.
23 Durante e dianan ku Hesus tabata na Herúsalèm pa selebrá fiesta di Pasku Hudiu, hopi hende a kuminsá pone fe den dje* ora nan a mira e milagernan ku e tabata hasi.
24 Pero Hesus no tabatin masha konfiansa den nan, pasobra e tabata konosé nan tur.
25 Niun hende no tabatin nodi di bin kont’é nada tokante niun hende pasobra e mes por a wak den kurason di hende.+
Nota
^ Esaki tabata un forma antiguo di hasi pregunta, no pa mustra menospresio ni arogansia, sino pa indiká ku bo no ta di akuerdo ku loke un hende a proponé, sugerí òf sospechá.
^ Òf: “Pésah.” E palabra ei ku nos ta tradusí komo “Pasku Hudiu” ta nifiká “salta.” Wak Glosario, “Pasku Hudiu.”
^ Òf: “deboshon.”
^ Lit.: “fe den su nòmber.”
