Bon Notisia Segun Huan 9:1-41
9 Na kaminda, Hesus a mira un hòmber ku a nase siegu.
2 E disipelnan a puntra Hesus: “Rabi,+ dikon e hòmber ei a nase siegu? Ta e òf ta su mayornan a peka?”
3 Hesus a kontestá nan: “E no a nase siegu debí ku el a kometé piká ni debí na piká di su mayornan, pero su kaso por yuda hende mira poder* di Dios.+
4 Tanten ku ta di dia, nos mester sigui kumpli ku boluntat di e Persona ku a manda mi na mundu.+ Ora ku bira anochi, ningun hende no por traha.
5 Tanten ku mi ta na mundu, mi ta lus pa mundu.”+
6 Despues ku el a bisa e kosnan ei, el a skupi riba tera i traha poko lodo i hunta e lodo riba wowo di e hòmber siegu.+
7 El a bisa e hòmber: “Bai laba bo wowonan den e tanki di awa* Siloam” (Siloam tabata nifiká “mandá”). E hòmber a bai i laba su wowonan. Ora el a bini bèk, e por a mira.+
8 Su bisiñanan i e hendenan ku ántes tabata mir’é ta pidi limosna a bisa: “E hòmber akí no ta e hòmber ku tabatin kustumber di sinta pidi limosna?”
9 Algun hende a respondé: “Sí, ta e mes.” Algun otro hende a bisa: “Nò, ta un hende ku pars’é.” E hòmber mes tabata bisa: “Ta mi mes.”
10 Nan a puntr’é: “Kon bini bo por mira?”
11 El a kontestá nan: “Un hòmber ku yama Hesus a traha poko lodo hunta riba mi wowonan i bisa mi: ‘Bai Siloam i laba bo wowonan.’+ Mi a bai laba mi wowonan, i mi a kuminsá mira.”
12 Nan a puntr’é: “Unda e hòmber ei ta?” El a bisa nan: “Mi no sa.”
13 E ora ei, nan a hiba e hòmber ku ántes tabata siegu serka e fariseonan.
14 Dia ku Hesus a traha lodo i kur’é*+ tabata un sabat.+
15 E fariseonan tambe a puntra e hòmber ku a kura kon bini e por mira. El a bisa nan: “Un hòmber a hunta lodo riba mi wowonan, i mi a bai laba mi wowonan, i mi a kuminsá mira.”
16 Algun fariseo a bisa: “E hòmber ku a kur’é no por ta un hòmber ku Dios a manda, pasobra e no ta tene su mes na lei di sabat.”+ Algun otro fariseo a bisa: “Un pekadó no por hasi e tipo di milagernan ei.”+ Pues, nan no tabata di akuerdo ku otro.+
17 E ora ei, nan a puntra e hòmber ku ántes tabata siegu: “Kiko abo ta pensa di e hòmber ku a kura bo?” E hòmber a kontestá: “E ta un profeta.”
18 Tòg, e lidernan hudiu no tabata ke kere ku e hòmber a nase siegu i ku Hesus a kur’é. P’esei, nan a manda yama e hòmber su mayornan.
19 Nan a puntra e mayornan: “Ta boso yu e hòmber akí ta? Ta bèrdat ku el a nase siegu? Kon bini e por mira awor?”
20 Su mayornan a kontestá: “Sí. Ta nos yu, i el a nase siegu,
21 pero nos no sa ta kon bini e por mira awor. Nos no sa tampoko ta ken a kur’é. Puntra e mes. E ta mayor di edat. E por papia pa su mes.”
22 E mayornan a kontestá asina pasobra nan tabatin miedu di e hudiunan.*+ E hudiunan a palabrá ku otro pa ekspulsá for di snoa* tur hende ku tabata bisa ku Hesus ta Kristu.+
23 Ta p’esei, e mayornan a bisa: “E ta mayor di edat. Puntra e mes.”
24 E ora ei, pa di dos biaha, e hudiunan a manda yama e hòmber ku ántes tabata siegu. Nan a bis’é: “Papia bèrdat! Duna gloria na Dios. Nos sa ku e hòmber ku bo ta bisa ku a kura bo ta un pekadó.”
25 E hòmber a bisa nan: “Ami no sa si e ta un pekadó. Un kos sí mi sa: Mi tabata siegu, i awor mi por mira.”
26 Nan a puntr’é: “Kiko el a hasi presis? Kon el a kura bo?”
27 El a kontestá nan: “Mi a bisa boso kaba kon mi a kura, pero boso no ke kere mi. Dikon boso ke bolbe tende e mesun kos? Boso tambe ke bira su disipel?”
28 E ora ei, nan a kuminsá zundr’é. Nan a bis’é: “Ta abo ta disipel di e hòmber ei. Nos ta disipel di Moises.
29 Nos sa ku Dios tabata komuniká ku Moises, pero e hòmber ei sí, nos no sa di unda el a bini.”
30 E hòmber a kontestá nan: “Esei sí ta straño! Boso no sa di unda Hesus a bini? El a kura mi i pone ku mi por mira.
31 Tur hende sa ku Dios no ta skucha orashon di hende ku ta hasi maldat.*+ Dios ta skucha hende ku ta respet’é* i ku ta hasi su boluntat.+
32 Nunka niun hende no a yega di tende ku un hende a kura un persona ku a nase siegu.
33 Si no ta Dios a manda e hòmber akí, lo e no por a hasi e kosnan akí.”+
34 E lidernan hudiu a bis’é: “For di ora bo a nase, bo ta yen di piká. Awor, abo ke bin siña nos?” Anto nan a kore kuné for di snoa!*+
35 Hesus a tende ku nan a kore ku e hòmber for di snoa. Ora Hesus a top’é, Hesus a puntr’é: “Bo tin fe den e Yu di hende?”
36 E hòmber a kontestá: “Ken e ta, Señor? Bisa mi ta ken pa mi por pone fe den dje.”
37 Hesus a bis’é: “Bo a yega di mir’é. Ta e ta papiando ku bo aworakí.”
38 E hòmber a bis’é: “Señor, lo mi pone fe den dje.” Anto el a bùig ku su kara te na suela dilanti di Hesus.
39 Hesus a bisa: “Mi a bini na mundu pa Dios por husga mundu: Hende siegu lo mira,+ i hende ku por mira lo bira siegu.”+
40 Ora e fariseonan ku tabata presente a tende loke Hesus a bisa, nan a puntr’é: “Akaso bo ta pensa ku nos tambe ta siegu?”
41 Hesus a bisa nan: “Si boso tabata siegu, boso lo a haña pordon pa boso pikánan. Pero komo ku boso ta bisa ku boso ta mira, boso lo keda sin haña pordon pa boso pikánan.”+
