കഥ 115
ഭൂമിയിൽ പുതിയ ഒരു പറുദീസ
ഉയരമുള്ള ആ മരങ്ങളും മനോഹരമായ പൂക്കളും വലിയ മലകളുമൊക്ക നോക്കൂ. എന്തു ഭംഗിയാണല്ലേ എല്ലാം കാണാൻ? ഒരു മാൻ ആ കൊച്ചു കുട്ടിയുടെ കൈയിൽനിന്നു തീറ്റ വാങ്ങി തിന്നുന്നതു കണ്ടോ. അവിടെ പുൽത്തകിടിയിലുള്ള സിംഹങ്ങളെയും കുതിരകളെയും നോക്കൂ. നമ്മുടെ വീട് ഇങ്ങനെയൊരു സ്ഥലത്താണെങ്കിൽ എത്ര രസമായിരിക്കും അല്ലേ?
നമ്മൾ ഭൂമിയിലെ പറുദീസയിൽ എന്നേക്കും ജീവിക്കണമെന്നാണ് ദൈവം ആഗ്രഹിക്കുന്നത്. ഇന്ന് ആളുകൾക്ക് അനുഭവിക്കേണ്ടിവരുന്ന വേദനകളോ കഷ്ടപ്പാടുകളോ നമുക്ക് ഉണ്ടാകാൻ അവൻ ആഗ്രഹിക്കുന്നില്ല. വരാൻ പോകുന്ന പുതിയ പറുദീസയിൽ ജീവിക്കുന്നവർക്കുള്ള ബൈബിളിന്റെ വാഗ്ദാനം ഇതാണ്: ‘ദൈവം അവരോടൊപ്പം ഉണ്ടായിരിക്കും. മരണമോ കരച്ചിലോ വേദനയോ ഇനി ഉണ്ടായിരിക്കില്ല. പഴയ കാര്യങ്ങൾ നീങ്ങിപ്പോയിരിക്കുന്നു.’
ഈ അത്ഭുതകരമായ മാറ്റങ്ങൾ സംഭവിക്കുന്നു എന്ന് യേശു ഉറപ്പുവരുത്തും. അത് എപ്പോഴായിരിക്കും? ഭൂമിയിൽനിന്ന് ദുഷ്ടതയെയും ദുഷ്ടമനുഷ്യരെയും തുടച്ചുനീക്കിയതിനു ശേഷം. ഓർക്കുക, യേശു ഭൂമിയിൽ ആയിരുന്നപ്പോൾ എല്ലാത്തരം രോഗികളെയും സുഖപ്പെടുത്തി, മരിച്ചവരെ ഉയിർപ്പിക്കുക പോലും ചെയ്തു. ദൈവരാജ്യത്തിന്റെ രാജാവാകുമ്പോൾ മുഴു ഭൂമിയിലും താൻ എന്താണു ചെയ്യാൻ പോകുന്നതെന്ന് നമുക്കു കാണിച്ചുതരാനാണ് അവൻ അങ്ങനെ ചെയ്തത്.
ഭൂമിയിലെ പുതിയ പറുദീസയിൽ ആയിരിക്കുന്നത് എത്ര സന്തോഷകരമായിരിക്കും എന്ന് ഓർത്തുനോക്കൂ! യേശു താൻ തിരഞ്ഞെടുക്കുന്ന ചിലരോടൊത്ത് സ്വർഗത്തിൽനിന്നു ഭരിക്കും. ആ രാജാക്കന്മാർ ഭൂമിയിലുള്ള എല്ലാവരുടെയും കാര്യങ്ങൾ നന്നായി ശ്രദ്ധിക്കുകയും എല്ലാവരും സന്തുഷ്ടരാണെന്ന് ഉറപ്പുവരുത്തുകയും ചെയ്യും. പുതിയ പറുദീസയിലെ നിത്യജീവൻ ദൈവം നമുക്കു തരണമെങ്കിൽ നമ്മൾ എന്തു ചെയ്യേണ്ടതുണ്ടെന്ന് നമുക്കു നോക്കാം.