Kon Paano Ginabindikar ni Jesus ang Pagkamatarong sang Dios

“Ginhatag [si Cristo] sang Dios subong isa ka dulot sa pagpasag-uli paagi sa pagtuo sa iya dugo. Ini agod ipakita ang iya kaugalingon nga pagkamatarong.”—ROMA 3:25.

1, 2. (a) Ano ang ginatudlo sa aton sang Biblia tuhoy sa kahimtangan sang katawhan? (b) Ano nga mga pamangkot ang binagbinagon sa sini nga artikulo?

HALOS tanan nakahibalo sang kasaysayan sa Biblia tuhoy sa pagrebelde nga natabo sa hardin sang Eden. Nabatyagan naton tanan ang epekto sang sala ni Adan subong sang ginpaathag sa sining pinamulong: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Bisan pa ginatinguhaan naton nga himuon ang husto, nagakasala gihapon kita, amo nga kinahanglan naton ang kapatawaran sang Dios. Bisan ang apostol nga si Pablo nakasiling: “Ang maayo nga luyag ko wala ko ginahimo, apang ang malain nga indi ko luyag amo ang akon ginahimo. Kailo ako nga tawo!”—Roma 7:19, 24.

² Bangod kita tanan makasasala, makatarunganon lang nga mamangkot kita: Paano nangin posible nga si Jesus nga taga-Nazaret natawo nga wala sing sala, kag ngaa ginbawtismuhan sia? Paano ang pagkabuhi ni Jesus nagabindikar sa pagkamatarong ni Jehova? Labaw sa tanan, ano ang natuman sang kamatayon ni Jesus?

Ginhangkat ang Pagkamatarong sang Dios

3. Paano ginlimbungan ni Satanas si Eva?

³ Ginsikway sang aton unang ginikanan nga sanday Adan kag Eva ang pagkasoberano sang Dios kag ginpili nila nga gumalahom ang “orihinal nga man-ug, ang isa nga ginatawag Yawa kag Satanas.” (Bug. 12:9) Binagbinaga kon paano ini natabo. Ginhangkat ni Satanas ang pagkamatarong sang paggahom ni Jehova nga Dios. Ginhimo niya ini paagi sa pagpamangkot kay Eva: “Nagsiling bala ang Dios, ‘Dili kamo magkaon sang bisan ano nga kahoy sang katamnan’?” Ginsulit ni Eva ang maathag nga sugo sang Dios nga kon tandugon nila ang gindumilian nga kahoy, mapatay sila. Dayon, nagsiling si Satanas nga nagabinutig ang Dios. “Dili kamo mapatay nga totoo,” siling sang Yawa. Ginpapati niya si Eva nga ang Dios may ginadingot nga maayo nga butang, kag nga paagi sa pagkaon sina nga bunga, si Eva mangin kaangay sang Dios, nga may kahilwayan sa pagdesisyon kon ano ang maayo kag kon ano ang malain.—Gen. 3:1-5.

4. Paano ang katawhan napaidalom sa paggahom ni Satanas?

⁴ Ginpahangop ni Satanas nga mangin mas malipayon ang tawo kon mangin independiente sila sa Dios. Sa baylo nga sakdagon ang pagkamatarong sang soberanya sang Dios, namati si Adan sa iya asawa kag nagbuylog sa pagkaon sang gindumilian nga bunga. Bangod sini nadula ni Adan ang iya matarong nga tindog kay Jehova kag ginpaulipon kita sa lulan sang sala kag kamatayon. Sa amo man nga tion, ang katawhan napaidalom sa paggahom ni Satanas, ang “dios sining sistema sang mga butang.”—2 Cor. 4:4; Roma 7:14.

5. (a) Paano ginpamatud-an ni Jehova nga ginatuman niya kon ano ang iya ginasiling? (b) Ano nga paglaum ang ginhatag sang Dios sa mangin kaliwat nanday Adan kag Eva?

⁵ Suno sa iya ginsiling, ginpadapat ni Jehova ang silot nga kamatayon kanday Adan kag Eva. (Gen. 3:16-19) Apang wala ina nagakahulugan nga  napaslawan ang katuyuan sang Dios. Bisan pa ginsilutan ni Jehova sanday Adan kag Eva, ginhatagan niya sing paglaum ang mangin mga kaliwat nila. Ginhimo niya ini paagi sa pagpahibalo sang iya katuyuan nga magabangon sia sang isa ka “binhi” nga pagadugmukon ni Satanas sa tikod. Apang magaayo ang pilas sa tikod sinang ginsaad nga Binhi kag ‘pagadugmukon niya ang ulo ni Satanas.’ (Gen. 3:15) Ginpaathag ini sang Biblia paagi sa pagsiling tuhoy kay Jesucristo: “Ginpadayag ang Anak sang Dios sa sini nga katuyuan, nga amo ang paglaglag sa mga binuhatan sang Yawa.” (1 Juan 3:8) Apang paano ang paggawi kag kamatayon ni Jesus nagbindikar sang pagkamatarong sang Dios?

Ang Kahulugan sang Bawtismo ni Jesus

6. Paano naton nahibaluan nga si Jesus wala nakapanubli sang sala ni Adan?

⁶ Subong isa ka hamtong nga tawo, si Jesus dapat mangin katumbas sang himpit anay nga si Adan. (Roma 5:14; 1 Cor. 15:45) Nagakahulugan ini nga dapat matawo si Jesus nga himpit. Paano ina mangin posible? Ang anghel nga si Gabriel nagpaathag sa iloy ni Jesus nga si Maria: “Ang balaan nga espiritu magaabot sa imo, kag ang gahom sang Labing Mataas magalikop sa imo. Bangod sina ang bata nga ibun-ag tawgon nga balaan, Anak sang Dios.” (Luc. 1:35) Sang bata pa si Jesus, mahimo nga ginsugiran sia ni Maria tuhoy sa ginsiling sang anghel. Gani isa ka bes, sang ginpangita sia nanday Maria kag Jose kag nakit-an sa templo sang Dios, namangkot si Jesus: “Wala bala kamo makahibalo nga dapat yara ako sa balay sang akon Amay?” (Luc. 2:49) Maathag nga sugod pa sang bata si Jesus nakahibalo na sia nga Anak sia sang Dios. Gani, importante gid sa iya ang pagbindikar sa pagkamatarong sang Dios.

7. Anong hamili nga mga butang ang ginpanag-iyahan ni Jesus?

⁷ Ginpakita ni Jesus ang iya hanuot nga interes sa espirituwal nga mga butang paagi sa pagtambong sing regular sa mga pagtilipon para sa pagsimba. Bangod himpit ang iya panghunahuna, pat-od gid nga nahangpan niya ang tanan niya nga nabatian kag nabasahan sa Hebreong Kasulatan. (Luc. 4:16) Indi lamang ina, may yara sia himpit tawhanon nga lawas nga sarang niya mahalad para sa katawhan. Sang ginbawtismuhan si Jesus, nangamuyo sia ayhan samtang ginahunahuna ang tagna sa Salmo 40:6-8.—Luc. 3:21; basaha ang Hebreo 10:5-10. *

8. Ngaa gintinguhaan ni Juan nga Manugbawtismo nga punggan si Jesus sa pagpabawtismo?

⁸ Sang primero, luyag kuntani punggan ni Juan nga Manugbawtismo si Jesus sa pagpabawtismo. Ngaa? Bangod ginbawtismuhan ni Juan ang mga  Judiyo subong simbulo sang ila paghinulsol tungod sa sala batok sa Kasuguan. Subong iya suod nga paryente, kilala ni Juan nga matarong si Jesus kag indi na kinahanglan maghinulsol. Apang, ginpasalig ni Jesus si Juan nga nagakaigo nga bawtismuhan Sia. “Sa sini nga paagi,” paathag ni Jesus, “nagakaigo para sa aton nga himuon ang tanan nga matarong.”—Mat. 3:15.

9. Ano ang ginasimbulo sang bawtismo ni Jesus?

⁹ Subong himpit nga tawo kaangay ni Adan, mahimo nakahinakop si Jesus nga puede sia mangin amay sang isa ka himpit nga kaliwatan. Apang, wala gid ina ginhandum ni Jesus bangod nakahibalo sia nga indi ina ang kabubut-on ni Jehova para sa iya. Ginpadala sia sang Dios sa duta agod tumanon ang iya papel subong ang ginsaad nga Binhi, ukon Mesias. Nalakip sa sini ang paghalad ni Jesus sang iya himpit tawhanon nga kabuhi. (Basaha ang Isaias 53:5, 6, 12.) Huo, ang kahulugan sang bawtismo ni Jesus indi pareho sang aton bawtismo. Wala ini nagakahulugan sang pagdedikar kay Jehova bangod bahin na sia sang pungsod sang Israel nga nadedikar na sa Dios. Sa baylo, nagasimbulo ini sang pagpresentar niya sang iya kaugalingon sa paghimo sang kabubut-on sang Dios subong sang gintagna sa Kasulatan nga pagahimuon sang Mesias.

10. Ano ang kabubut-on sang Dios para sa Mesias, kag ano ang ginbatyag ni Jesus sa sini nga mga salabton?

¹⁰ Nalakip sa kabubut-on ni Jehova para kay Jesus amo ang pagbantala sang maayong balita sang Ginharian sang Dios, paghimo sang mga disipulo, kag paghanda sa ila para sa paghimo-disipulo nga hilikuton. Nalakip man sa pagpresentar ni Jesus sang iya kaugalingon amo ang iya kahanda sa pagbatas sa mga paghingabot kag sa masakit nga kamatayon agod sakdagon ang matarong nga soberanya ni Jehova nga Dios. Bangod ginahigugma gid ni Jesus ang iya langitnon nga Amay, nalipay sia sa paghimo sang kabubut-on sang Dios kag sa pagpresentar sang iya lawas subong isa ka halad. (Juan 14:31) Nalipay man sia bangod nahibaluan niya nga ang balor sang iya himpit nga kabuhi sarang makagawad sa aton gikan sa pagkaulipon sa sala kag kamatayon. Nahamuot bala ang Dios sang ginpresentar ni Jesus ang iya kaugalingon sa pag-abaga sining daku nga mga salabton? Pat-od gid!

11. Paano ginpakita ni Jehova nga ginbaton niya si Jesus subong ang ginsaad nga Mesias, ukon Cristo?

¹¹ Mabasa sa apat ka Ebanghelyo ang pagpabutyag ni Jehova nga Dios sang iya kahamuot kay Jesus sang nagtakas sia sa Suba Jordan. “Nakita ko ang espiritu nga nagkunsad kaangay sa salampati gikan sa langit,” siling ni Juan nga Manugbawtismo, “kag nagpabilin ini [kay Jesus] . . . Kag nakita ko ini, kag nagapanaksi ako nga sia amo ang Anak sang Dios.” (Juan 1:32-34) Dugang pa, nagsiling man si Jehova sa sina nga tion: “Ini ang akon Anak, ang hinigugma, nga ginakahamut-an ko.”—Mat. 3:17; Mar. 1:11; Luc. 3:22.

Matutom Tubtob sa Kamatayon

12. Ano ang ginhimo ni Jesus sa sulod sang tatlo ka tuig kag tunga sa tapos sang iya bawtismo?

¹² Sa sulod sang tatlo ka tuig kag tunga, ginhinguyang ni Jesus ang iya tion sa pagtudlo sa katawhan tuhoy sa iya Amay kag sa pagkamatarong sang soberanya sang Dios. Ginkapoy sia sa paglatas sa bug-os nga Ginsaad nga Duta, apang wala sia mag-untat sa pagpanaksi sing maid-id tuhoy sa kamatuoran. (Juan 4:6, 34; 18:37) Gintudluan ni Jesus ang mga tawo tuhoy sa Ginharian sang Dios. Gin-ayo niya ang mga balatianon, ginpakaon ang gutom nga kadam-an, kag ginbanhaw pa gani ang mga patay. Paagi sa sini, ginpakita niya kon ano ang pagahimuon sang Ginharian para sa katawhan.—Mat. 11:4, 5.

13. Ano ang gintudlo ni Jesus tuhoy sa pangamuyo?

¹³ Wala si Jesus nagbaton sing kadungganan sa iya pagpanudlo kag mga pagpang-ayo, kundi nagpahamtang sia sing maayo nga halimbawa sa pagpatungod sang pagdayaw kay Jehova. (Juan 5:19; 11:41-44) Gintudlo man ni Jesus kon ano ang pinakaimportante nga butang nga ipangamuyo naton. Dapat naton ilakip sa aton pangamuyo ang ‘pagpakabalaan’ sa ngalan ni Jehova. Kag ipangamuyo man naton nga ang matarong nga soberanya sang Dios amo  ang magabulos sa malaut nga paggahom ni Satanas agod matuman ang Iya “kabubut-on sa duta, subong sang sa langit.” (Mat. 6:9, 10) Ginpalig-on man kita ni Jesus nga manghikot nahisuno sa sina nga pangamuyo paagi sa ‘pagpangita anay sang ginharian kag pagkamatarong sang Dios.’—Mat. 6:33.

14. Bisan pa himpit si Jesus, ngaa kinahanglan niya manikasog agod matuman ang iya papel sa katuyuan sang Dios?

¹⁴ Samtang nagahilapit ang iya kamatayon, labi nga nabatyagan ni Jesus ang kabug-at sang iya salabton. Nahibaluan niya nga ang katuyuan kag kadungganan sang iya Amay nasandig sa iya pagpabilin nga matutom tubtob sa kamatayon. Lima ka adlaw antes sang iya kamatayon, nangamuyo si Jesus: “Karon nalisang ang akon kalag, kag ano ang isiling ko? Amay, luwasa ako sa sini nga tion.” Sa tapos ginpabutyag ining tawhanon nga balatyagon, ginliton ni Jesus ang iya igtalupangod sa mas importante nga butang kag nangamuyo: “Apang, amo sini kon ngaa nagdangat ako sa sini nga tion. Amay, himayaa ang imo ngalan.” Sa gilayon si Jehova nagsiling: “Ginhimaya ko na ini kag himayaon ko ini liwat.” (Juan 12:27, 28) Huo, handa si Jesus nga batason ining pinakamabudlay nga pagtilaw sa integridad nga mahimo maatubang sang isa ka tawo. Apang pat-od gid nga nagbakod ang determinasyon ni Jesus nga mangin madinalag-on sa pagpadaku kag pagbindikar sa pagkasoberano ni Jehova sang nabatian niya ang ginsiling sang iya langitnon nga Amay. Kag nagmadinalag-on sia!

Kon Ano ang Natuman sang Kamatayon ni Jesus

15. Antes sia napatay, ngaa nagsiling si Jesus: “Natuman na”?

¹⁵ Samtang yara si Jesus sa usok sang pag-antos kag nagahimumugto, nagsiling sia: “Natuman na!” (Juan 19:30) Sa bulig sang Dios madamo gid sang nahimo si Jesus sa sulod sang tatlo ka tuig kag tunga kutob sang nabawtismuhan sia tubtob sa iya kamatayon! Sang napatay si Jesus, naglinog sing mabaskog, kag ang Romano nga opisyal sang hangaway nga naglansang sa iya napahulag sa pagsiling: “Pat-od gid nga ini Anak sang Dios.” (Mat. 27:54) Mahimo nga nakita sang opisyal kon paano ginyaguta si Jesus bangod nangangkon sia nga Anak sang Dios. Walay sapayan sang tanan niya nga gin-antos, ginhuptan ni Jesus ang iya integridad kag ginpamatud-an nga butigon si Satanas. Ang tanan nga nagasakdag sa pagkasoberano sang Dios ginhangkat ni Satanas paagi sa pagsiling: “Ang tanan nga iya sang tawo ihatag niya tungud sa iya kabuhi.” (Job 2:4) Paagi sa iya katutom, ginpakita ni Jesus nga sanday Adan kag Eva sarang makapabilin nga matutom sa mas mahapos nga pagtilaw nga ila gin-atubang. Labaw sa tanan, ang kabuhi kag kamatayon ni Jesus nagsakdag kag nagbindikar sa pagkamatarong sang soberanya ni Jehova. (Basaha ang Hulubaton 27:11.) May iban pa bala nga nahimo ang kamatayon ni Jesus? Huo, may yara pa!

16, 17. (a) Ngaa nangin posible para sa mga saksi ni Jehova antes sang panahon sang mga Cristiano nga matigayon ang matarong nga kaangtanan sa Dios? (b) Paano ginpadyaan ni Jehova ang katutom sang iya Anak, kag ano ang padayon nga ginahimo ni Ginuong Jesucristo?

¹⁶ Madamo nga alagad ni Jehova ang nagkabuhi antes pa magkari si Jesus sa duta. May yara sila matarong nga kaangtanan sa Dios kag may paglaum nga pagkabanhaw. (Isa. 25:8; Dan. 12:13) Apang ano ang legal nga basihan sang aton balaan nga Dios nga si Jehova nga pakamaayuhon ang makasasala nga mga tawo sa sinang dalayawon nga paagi? Ang Biblia nagasiling: “Ginhatag [si Jesucristo] sang Dios subong isa ka dulot sa pagpasag-uli paagi sa pagtuo sa iya dugo. Ini agod ipakita ang iya kaugalingon nga pagkamatarong, bangod ginapatawad niya ang mga sala nga nahimo sang nagligad, sa tion nga ang Dios nagapaumod; agod ipakita ang iya kaugalingon nga pagkamatarong sa sini nga panag-on, agod mangin matarong  sia bisan sa pagpahayag nga matarong sa tawo nga may pagtuo kay Jesus.”—Roma 3:25, 26. *

¹⁷ Sa tapos mabanhaw si Jesus, ginhatagan sia ni Jehova sing posisyon nga mas mataas pa sa iya posisyon antes sia magkari sa duta. Naagom ni Jesus ang di-mamalatyon nga kabuhi subong mahimayaon nga espiritu nga tinuga. (Heb. 1:3) Subong Mataas nga Saserdote kag Hari, padayon nga ginabuligan ni Ginuong Jesucristo ang iya mga sumulunod sa pagbindikar sa pagkamatarong sang Dios. Kag daku gid ang aton pagpasalamat nga si Jehova, ang aton langitnon nga Amay, amo ang Manugpadya sang tanan nga nagahimo sini kag sa mga mainunungon nga nagaalagad sa iya bilang pag-ilog sa iya Anak!—Basaha ang Salmo 34:3; Hebreo 11:6.

18. Ano ang pagabinagbinagon sa masunod nga artikulo?

¹⁸ Naagom sang matutom nga mga tawo sugod pa kay Abel ang suod nga kaangtanan kay Jehova bangod nagpakita sila sing pagtuo kag pagsalig sa ginsaad nga Binhi. Nahibaluan ni Jehova nga magapabilin nga matutom ang iya Anak kag nga ang iya kamatayon magaaman sang himpit nga kabayaran sang “sala sang kalibutan!” (Juan 1:29) Ang mga tawo nga nagakabuhi karon makabenepisyo man sa kamatayon ni Jesus. (Roma 3:26) Gani, ano nga mga pagpakamaayo ang mahatag sang gawad ni Cristo sa imo? Amo ina ang pagabinagbinagon sa masunod nga artikulo.

[Mga Nota]

Ano ang Imo Sabat?

• Paano ginhangkat ang pagkamatarong sang Dios?

• Ano ang ginasimbulo sang bawtismo ni Jesus?

• Ano ang natuman sang kamatayon ni Jesus?

[Mga Pamangkot sa Pagtinuon]

[Retrato sa pahina 9]

Nahibaluan mo bala kon ano ang ginasimbulo sang bawtismo ni Jesus?