Magdiretso sa kaundan

Magdiretso sa listahan sang kaundan

Ngaa Dapat Kita Mag-abot sa Eksakto nga Oras?

Ngaa Dapat Kita Mag-abot sa Eksakto nga Oras?

 Ngaa Dapat Kita Mag-abot sa Eksakto nga Oras?

ANG pag-abot sing temprano ukon sa eksakto nga oras indi pirme mahapos. Madamo sang kabangdanan nga mahimo makapaatrasar sa aton, pareho sang malawig nga pagbiyahe, trapik, kag kasakuon. Apang, ang pag-abot sa eksakto nga oras importante gid. Halimbawa sa mga ulubrahan, ang mga empleyado nga nagaabot sa eksakto nga oras amo ang ginakabig nga masaligan kag mapisan. Sa pihak nga bahin, kon ang empleyado pirme ulihi, maapektuhan sini ang trabaho sang iya mga kaupdanan kag ang kalidad sang ila produkto ukon serbisyo. Ang estudyante nga pirme leyt masami nga indi makaabot sa iya klase kag maapektuhan sini ang iya pagtuon. Ang pag-abot nga leyt sa imo appointment sa doktor ukon dentista makaapektar man sa kalidad sang serbisyo nga imo mabaton.

May mga lugar nga indi tanto ka importante sa mga tawo ang pag-abot sa husto nga oras. Kon nagapuyo kita sa sini nga lugar, mahimo nga mangin batasan man naton nga mag-abot sing leyt. Kon amo, importante gid nga tinguhaan naton nga mag-abot sa eksakto nga oras. Samtang ginaapresyar naton ang mga benepisyo sini, mabuligan kita nga tinguhaan pirme nga mag-abot sing temprano. Ano ang pila ka rason kon ngaa dapat kita mag-abot sa eksakto nga oras? Paano naton maatubang ang mga hangkat sa pag-abot sing temprano? Ano nga mga benepisyo ang aton matigayon kon mag-abot kita sa eksakto nga oras?

Si Jehova—Ang Dios nga Wala Gid Nagapalantang

Ang panguna nga rason kon ngaa luyag naton mag-abot sa eksakto nga oras bangod luyag naton  ilugon ang Dios nga aton ginasimba. (Efe. 5:1) Si Jehova amo ang pinakamaayo nga halimbawa sa pagsunod sa eksakto nga oras. Wala gid sia nagapalantang. Ginasunod niya sing maayo ang iya iskedyul sa pagtuman sang iya katuyuan. Halimbawa, sang gintuyo ni Jehova nga laglagon ang malaut nga kalibutan paagi sa Anaw, nagsugo sia kay Noe: “Maghimo ka sang arka nga ginagamit ang matagok nga kahoy.” Samtang nagahilapit na ang tion sang kalaglagan, ginsilingan ni Jehova si Noe nga magsulod sa arka kag ginpahibalo sia: “Pito ka adlaw na lamang kag paulanon ko sa duta sa sulod sang 40 ka adlaw kag 40 ka gab-i; kag papason ko sa kadaygan sang duta ang tanan nga buhi nga tinuga nga ginhimo ko.” Suno sa eksakto nga tion nga iya ginsiling, “pagligad sang pito ka adlaw nag-abot ang tubig sang anaw sa duta.” (Gen. 6:14; 7:4, 10, NW) Handurawa kon ano ang natabo kay Noe kag sa iya pamilya kon wala sila dayon nagsulod sa arka. Kaangay sang Dios nga ila ginasimba, wala sila nagpalantang.

Mga 450 ka tuig ang nagligad pagkatapos sang Anaw, ginsilingan ni Jehova ang patriarka nga si Abraham nga makaangkon sila sang anak nga pagahalinan sang ginsaad nga Binhi. (Gen. 17:15-17) Nagsiling ang Dios nga ipanganak si Isaac sa “napat-ud  nga tion sa tuig nga masonod.” Natuman bala ina? Ang Kasulatan nagasugid sa aton: “Si Sara nagpanamkon, kag nag-anak kay Abraham sing lalaki sa iya katigulangon sa tion nga napamolong sa iya sang Dios.”—Gen. 17:21; 21:2.

Madamo kita sang mabasa nga halimbawa sa Biblia nga ang Dios wala nagapalantang. (Jer. 25:11-13; Dan. 4:20-25; 9:25) Ang Biblia nagasiling nga padayon naton nga hulaton ang nagapakari nga adlaw sang paghukom ni Jehova. Bisan pa sa pagtamod sang mga tawo daw ‘nagapalantang’ ini, makasalig kita nga “indi ini magpalantang.”—Hab. 2:3.

Ang Pag-abot sa Husto nga Oras—Importante sa Pagsimba

Ang tanan nga Israelinhon nga lalaki dapat gid magtambong kag mag-abot sa eksakto nga tion sa lugar nga pagahiwatan sang “gintalana nga mga kapiestahan ni Jehova.” (Lev. 23:2, 4, NW) Ang Dios may gintalana man nga tion kon san-o himuon ang paghalad sang nanuhaytuhay nga mga dulot. (Ex. 29:38, 39; Lev. 23:37, 38) Indi bala nga ginapakita sini nga luyag gid sang Dios nga sundon sang iya mga alagad ang eksakto nga iskedyul sang ila pagsimba?

Sang unang siglo, sang ginhatagan sang instruksion ni apostol Pablo ang mga taga-Corinto kon paano dumalahan ang Cristianong mga miting, ginlaygayan niya sila: “Himuon ang tanan nga butang sing disente kag suno sa kahimusan.” (1 Cor. 14:40) Importante gid nga ang Cristianong mga pagtilipon para sa pagsimba magsugod sa eksakto nga oras. Ang pagtamod ni Jehova tuhoy sa tion wala nagbag-o. (Mal. 3:6) Kon amo, ano ang sarang naton mahimo agod makaabot kita sing temprano sa aton Cristianong mga pagtilipon?

Kon Paano Malandas ang mga Sablag sa Pag-abot sing Temprano

Nasapwan sang pila nga daku ang mabulig sang abanse nga pagplano. (Hulu. 21:5) Halimbawa kon may kadtuan kita kag kinahanglan naton mag-abot sa gintalana nga tion, maalamon bala nga bantaon naton nga mag-abot sa hustuhan lang nga tion? Indi bala mas maayo kon maghatag kita sang ekstra nga tion para sa mga “wala ginapaabot nga hitabo”? (Man. 9:11, NW) “Ang makabulig sa isa nga makaabot sa eksakto nga tion amo ang paghibalo kon ano kalayo kag pila ka oras ang biyahe pakadto sa iya kaladtuan,” siling ni José, isa ka pamatan-on nga temprano nagaabot. *

Para sa pila, kinahanglan nga maghalin sila sing mas temprano sa trabaho agod indi sila maleyt sa Cristianong mga miting. Amo sini ang ginhimo sang isa ka Saksi nga taga-Etiopia sang nahibaluan niya nga maatrasar sia sing 45 minutos sa miting kada duha ka semana bangod sa pagbag-obag-o sang iskedyul sang iya obra. Naghimo sia sing kahimusan nga may mabulos sa iya sing mas temprano sa mga gab-i nga may miting. Bilang bayad, ini nga Saksi nagpasugot nga magatrabaho sang ekstra nga pito ka oras sa iskedyul sang iya kaupod.

Kon may magagmay kita nga kabataan, isa gid ka hangkat ang pag-abot sing temprano sa mga miting. Ang iloy amo ang ilabi na nga may responsibilidad sa paghanda sa kabataan, apang sarang man makabulig ang iban nga katapo sang pamilya. Si Esperanza nga taga-Mexico, nagasolo nga iloy nga may walo ka kabataan nga nagaedad karon sing 5 tubtob 23 anyos. Ginsugid ni Esperanza kon paano nahimo sang iya pamilya nga mag-abot sing temprano: “Ginabuligan ako sang akon kamagulangan nga bata sa pagpreparar sa iya mga manghod. Bangod sini, may tion ako nga tapuson ang mga ulubrahon sa balay kag makapreparar agod makahalin kami sing temprano para sa miting.” Ini nga pamilya may ginpat-od nga tion nga dapat maghalin sa ila balay kag ang kada isa nagakooperar gid nga masunod ini.

Pagbenepisyo sa Pag-abot sing Temprano sa mga Miting

Ang pagpamalandong sa mga benepisyo nga matigayon naton sa pag-abot sing temprano sa Cristianong mga miting makabulig sa aton nga himuon ang aton bug-os nga masarangan nga makaabot sing temprano. Si Sandra, isa ka pamatan-on nga babayi nga pirme nagaabot sing temprano sa mga miting, nagkomento: “Nanamian gid ako magkadto sing temprano para may tion ako nga makamusta ang mga utod, maistorya  sila kag makilala sing dugang pa.” Kon temprano kita mag-abot sa Kingdom Hall, may tion kita sa pagpamati sa makapalig-on nga mga eksperiensia sang aton matutom nga kauturan. Ang aton presensia kag makapalig-on nga pagpakigsugilanon ‘makapahulag sa ila sa gugma kag sa maayong mga buhat.’—Heb. 10:24, 25.

Ang nagabukas nga ambahanon sa Cristianong mga miting importante nga bahin sang aton pagsimba. (Sal. 149:1) Ang aton mga ambahanon nagadayaw kay Jehova, nagapahanumdom sa aton sang mga kinaiya nga dapat naton palambuon, kag nagapalig-on sa aton nga makigbahin sing malipayon sa pagministeryo. Kag kamusta naman ang nagabukas nga pangamuyo? Sang dumaan nga mga tion, gintawag ni Jehova ang templo subong ang iya “balay sang pangamuyo.” (Isa. 56:7) Sa karon, nagatipon man kita sa aton mga miting agod mangamuyo sa Dios. Ang nagabukas nga pangamuyo wala lamang nagapangabay sang panuytoy ni Jehova kag sang balaan nga espiritu kundi nagahanda man ini sang aton hunahuna kag tagipusuon sa pagbaton sang mga impormasyon nga pagabinagbinagon. Gani, dapat nga panikasugan gid naton nga mag-abot sa mga miting antes ang nagabukas nga ambahanon kag pangamuyo.

Si Helen nga 23 anyos, nagsugid kon ngaa temprano sia nagaabot sa mga miting: “Para sa akon, pamatuod ini nga ginahigugma ko si Jehova kay sia ang nag-aman sang tanan nga impormasyon nga ginapresentar sa mga miting, lakip na ang mga ambahanon kag pangamuyo.” Pareho man bala sina ang aton pagtamod? Dapat gid. Gani, panikasugan naton nga mapalambo ang kinabatasan nga mag-abot sa eksakto nga oras sa tanan naton nga hilikuton, ilabi na kon may kaangtanan sa aton pagsimba sa matuod nga Dios.

[Nota]

^ par. 12 Gin-islan ang mga ngalan.

[Retrato sa pahina 26]

Maghanda sing abanse

[Retrato sa pahina 26]

Maghatag sing ekstra nga tion para sa “wala ginapaabot nga hitabo”

[Mga Retrato sa pahina 26]

Aguma ang mga benepisyo sa pag-abot sing temprano sa mga miting