Ol Enjel—‘Ol Spirit We Oli Mekem Wok Blong God’

‘Ol enjel ya, oli spirit, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.’—HIB. 1:14.

1. ?From wanem ol toktok blong Matiu 18:10 mo Hibrus 1:14 i mekem yumi harem gud?

JISAS KRAES i givim woning long eniman we i mekem ol man blong hem oli foldaon long sin, i se: “Yufala i mas lukaot gud blong yufala i no tingting nating long wan long ol pikinini ya. Tru mi talem long yufala, ol enjel we oli stap lukaot long olgeta oli stap long heven, mo oli stap oltaem long fes blong Papa blong mi.” (Mat. 18:10) Aposol Pol i tokbaot ol gudfala enjel blong God se: ‘Ol enjel ya, oli spirit, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.’ (Hib. 1:14) Ol toktok ya oli mekem yumi harem gud from we yumi save we God i yusum ol enjel blong givhan long yumi ol man. ?Baebol i talem wanem long saed blong ol enjel? ?Ol enjel oli givhan long yumi olsem wanem? ?Yumi save lanem wanem long eksampol blong olgeta?

2, 3. ?Wanem sam wok we ol enjel oli stap mekem?

² I gat plante milian enjel long heven we oli holemstrong long God. Olgeta evriwan oli ‘strong mo oli gat paoa. Oltaem oli stap obei long ol tok blong Hae God.’ (Sam 103:20; ridim Revelesen 5:11.) Ol spirit pikinini blong God oli gat prapa tingting blong olgeta mo oli laekem ol defdefren samting. Oli soemaot ol fasin blong God, mo oli fri blong jusum wanem we oli wantem mekem. Ol enjel oli no wok olbaot be oli wok folem oda. Oli mekem ol impoten wok long ogenaesesen blong God, we Mikael nao (nem blong Jisas long heven) i stap olsem jif blong ol enjel. (Dan. 10:13; Jud 9) Mikael i “stamba blong olgeta samting we God i mekem.” Mo hem i “Tok blong God,” we i min se hem i Nambawan Man blong Talemaot Tok blong God. Jeova i yusum hem blong wokem olgeta narafala samting.—Kol. 1:15-17; Jon 1:1-3.

³ Aninit long jif blong ol enjel, i gat ol seraf we oli talemaot tabu fasin blong Jeova mo oli givhan long ol man blong Jeova blong stap klin long wosip blong olgeta. Mo tu i gat ol jerubim we oli wok blong leftemap hae rul blong God. (Jen. 3:24; Aes. 6:1-3, 6, 7) Ol narafala enjel we oli karem tok blong God i go long ol man, oli mekem ol defdefren wok folem samting we God i wantem.—Hib. 12:22, 23.

4. ?Taem God i mekem wol ya, ol enjel oli harem olsem wanem? ?Sipos Adam mo Iv i bin yusum presen we God i givim long fasin we i stret, wanem blesing bambae i kasem ol man?

⁴ Taem God i “mekem wol ya,” ol enjel oli glad tumas, mo long semtaem we oli stap gohed long ol  wok we God i givim long olgeta, oli glad blong luk olsem wanem God i stap mekem wol ya i kam wan naesfala ples blong man i save laef long hem. (Job 38:4, 7) Jeova i mekem ol man long fasin we oli “daon lelebet long ol enjel.” Be nating se i olsem, hem i mekem olgeta blong oli save “tekem fasin” blong hem tu. Taswe, ol man oli naf blong soemaot ol nambawan fasin blong Man ya we i Wokem Olgeta. (Hib. 2:7, NW; Jen. 1:26) God i givim wan presen long Adam mo Iv, hemia se tufala i fri blong jus. Sipos tufala i bin yusum presen ya long fasin we i stret, tufala i save harem gud long laef wetem ol pikinini blong tufala long paradaes, mo oli save joen long bigfala famle blong Jeova we i stap long heven mo wol.

5, 6. ?Olsem wanem fasin rebel i stat long heven? ?God i mekem wanem taem samting ya i hapen?

⁵ Ating ol gudfala enjel oli sek mo harem nogud tumas taem oli luk we samfala long famle blong God long heven oli rebel agens long God. Wan long ol enjel i no moa glad blong presem Jeova, hem i wantem we ol narafala oli wosipim hem. Hem i agensem fasin blong Jeova blong rul mo i leftemap hem wan blong i rul agens long Jeova. Olsem nao enjel ya i kam Setan (we i minim “Man blong Agens”). Taem Setan i talem faswan giaman tok, hem i pulum faswan man mo woman, blong tufala i joen wetem hem blong agensem God ya we i lavem olgeta mo i Wokem olgeta.—Jen. 3:4, 5; Jon 8:44.

⁶ Jeova i kwik blong talemaot jajmen blong Setan taem hem i talem faswan profet tok blong Baebol se: “Bambae mi mi mekem we yu mo woman ya, yutufala i enemi blong yutufala, mo sid blong yu mo sid blong hem bambae tufala i enemi blong tufala. Hem bambae i smasem hed blong yu, mo yu bambae yu givim kil long bak blong leg blong hem daon.” (Jen. 3:15, NW) Bambae Setan mo “woman” blong God tufala i stap olsem enemi blong tufala. Tru ya, Jeova i tingbaot ol gudfala enjel we oli mekemap ogenaesesen blong hem long heven olsem waef blong hem we hem i lavem tumas, mo hem i Hasban blong waef ya we i fasgud long hem. Ol smosmol save blong profet tok ya oli wan tabu “samting we i haed,” we sloslo i kam klia. Nating se i olsem, profet tok ya i wan promes we ol man oli save putum tingting blong olgeta i stap strong long hem. God i promes se wan long ol enjel we i stap long ogenaesesen blong hem long heven bambae i spolem olgeta we oli rebel agens long Hem, mo bambae Hem i yusum enjel ya blong karem “olgeta samting long heven mo long wol” oli kam joen wanples.—Efes. 1:8-10.

7. ?Long taem blong Noa, sam enjel oli mekem wanem? ?Mo Jeova i mekem wanem long olgeta?

⁷ Long taem blong Noa, sam enjel oli livim “prapa ples blong olgeta” mo oli jenisim bodi blong olgeta i kam man, blong oli kasem ol samting long wol we tingting blong olgeta nomo i wantem. (Jud 6; Jen. 6:1-4) Jeova i sakem ol enjel ya oli go long tudak, mo olsem nao oli joen wetem Setan. Olgeta ya oli ol “rabis spirit” we oli ol nogud enemi blong ol man blong God.—Efes. 6:11-13, NW; 2 Pita 2:4, NW.

?Ol Enjel Oli Givhan Long Yumi Olsem Wanem?

8, 9. ?Long ol yia we oli pas, olsem wanem Jeova i yusum ol enjel blong givhan long ol man?

⁸ Sam long olgeta we ol enjel oli givhan long olgeta, hemia Ebraham, Jekob, Moses, Josua, Aesea, Daniel, Jisas, Pita, Jon, mo Pol. Ol gudfala enjel oli mekem ol jajmen blong God oli kamtru, mo oli karem ol profet tok i kam long ol man mo oli talemaot ol save we ol man oli mas folem, olsem Loa blong Moses. (2 King 19:35; Dan. 10:5, 11, 14; Wok 7:53; Rev. 1:1) Ating tede ol enjel oli no moa nid blong karem ol tok blong God i kam long ol man, from we naoia yumi gat Tok blong God fulwan. (2 Tim. 3:16, 17) Be nating se yumi no save luk ol enjel, oli bisi tumas blong mekem wok we God i wantem mo blong givhan long ol man blong hem.

⁹ Baebol i talem long yumi se: “Oltaem enjel blong [God] i stap lukaot gud long olgeta we oli ona long hem, mo i stap tekemaot olgeta long trabol.” (Sam 34:7; 91:11) From toktok we Setan i talem, se ol man blong God bambae oli no stap tru long Hem, Jeova i letem Setan i traem yumi long ol defdefren rod. (Luk 21:16-19) Be God i save wanem traem we ol man blong hem bambae oli naf blong winim blong stap tru long hem. Hem i save se ol man blong hem oli naf blong stanap strong gogo kasem wanem mak. (Ridim 1 Korin 10:13.) Ol enjel oli rere oltaem blong mekem eni samting we i laenap wetem wanem we God i wantem. Oli sevem Sadrak, Mesak, Abednego, Daniel, mo Pita. Be oli no blokem ol enemi we oli kilim Steven mo Jemes i ded. (Dan. 3:17, 18, 28; 6:22; Wok 7:59, 60; 12:1-3,  7, 11) Olgeta ya oli stap long ol defren ples, long ol defren taem, mo tu oli kasem ol defdefren traem. Long sem fasin, sam brata blong yumi long ol rabis kalabus long taem blong Nasi, Jemani, oli ded. Be Jeova i halpem bighaf blong olgeta blong oli stap laef.

10. ?God i save yusum ol enjel blong givhan long yumi, be wanem narafala rod bakegen we hem i save yusum blong halpem yumi?

¹⁰ Baebol i no tijim tingting ya se evri man long wol i gat wan enjel blong hem we i stap protektem hem. Nogat. Yumi bilif strong se taem yumi prea, “sipos yumi askem samting long [God] we i stret long tingting blong hem, hem bambae i harem prea blong yumi.” (1 Jon 5:14) I tru we Jeova i save sanem wan enjel blong givhan long yumi, be hem i save yusum sam narafala rod tu blong halpem yumi. Hem i save pulum sam Kristin brata sista blong givhan long yumi mo leftemap tingting blong yumi. Samtaem i gat sam traem we oli olsem “nil blong aranis” we i stikim yumi, olsem se wan ‘man blong karem tok blong Setan, i stap kilim yumi oltaem.’ Blong givhan long yumi blong stanap strong taem yumi kasem ol traem olsem, God i save givim waes mo strong tingting we yumi nidim.—2 Kor. 12:7-10; 1 Tes. 5:14.

Folem Fasin Blong Jisas

11. ?Olsem wanem God i yusum ol enjel blong halpem Jisas? ?Wanem samting we Jisas i soemaot taem hem i stap tru long God?

¹¹ Tingbaot olsem wanem Jeova i yusum ol enjel long laef blong Jisas. Oli talemaot we Jisas i bon, mo we hem i laef bakegen, mo oli givhan long Jisas taem hem i stap long wol. Ol enjel oli naf blong blokem ol man blong oli no arestem Jisas mo kilim hem i ded long fasin we i nogud olgeta. Be oli no mekem olsem. Defren olgeta, God i sanem wan enjel blong mekem tingting blong Jisas i strong. (Mat. 28:5, 6; Luk 2:8-11; 22:43) Folem stamba tingting blong Jeova, Jisas i ded blong givim laef blong hem olsem wan sakrefaes mo blong pruvum se man we i stret gud olgeta hem i save stap tru long God nating se hem i kasem bigbigfala traem. Biaen Jeova i mekem Jisas i laef bakegen olsem wan spirit man long heven. Hem i givim “olgeta paoa” long Jisas mo i putum ol enjel oli stap daon aninit long hem. (Mat. 28:18; Wok 2:32; 1 Pita 3:22) Long rod ya, Jisas i soemaot we hem nao i impoten man ya blong “sid” blong “woman” blong God.—Jen. 3:15, NW; Gal. 3:16.

12. ?Olsem wanem yumi save folem eksampol blong Jisas we hem i gat stret tingting?

¹² Jisas i save se i no stret blong traem Jeova, taswe hem i no ting se ol enjel bambae oli sevem hem taem hem i mekem samting we i putum laef blong hem long denja. (Ridim Matiu 4:5-7) I gud yumi folem fasin blong Jisas mo yumi “holem stret tingting long evri samting,” yumi no mekem samting we i putum laef blong yumi long denja, be tu yumi no fraet taem man i agensem yumi.—Taet. 2:12, NW.

?Yumi Save Lanem Wanem Long Ol Gudfala Enjel?

13. ?Yumi lanem wanem long eksampol blong ol gudfala enjel we 2 Pita 2:9-11 i tokbaot?

¹³ Taem aposol Pita i tok blong stretem ol man we oli stap “tok nogud” long ol tabu man blong Jeova, hem i pulum olgeta blong tingbaot nambawan eksampol blong ol gudfala enjel. Nating se oli gat bigfala paoa, ol enjel oli soem tingting daon. Oli no tok nogud long ol man blong jajem olgeta, from we “oli gat respek long Jeova.” (Ridim 2 Pita 2: 9-11, NW *) Yumi tu yumi no mas jajem man long fasin we i no stret, yumi mas gat respek long ol brata we oli lukaot long kongregesen, mo yumi letem Jeova i stretem ol trabol from we hem nao i Jaj we i Hae Olgeta.—Rom 12:18, 19; Hib. 13:17.

14. ?Yumi lanem wanem long eksampol blong ol enjel blong soem tingting daon long wok blong olgeta?

¹⁴ Ol enjel blong Jeova oli givim gudfala eksampol long yumi from we oli soem tingting daon long wok we oli mekem. Samfala oli no wantem talemaot nem blong olgeta long ol man. (Jen. 32:29; Jaj. 13:17, 18) Nating se i gat plante milian enjel long heven, Baebol i talemaot nem blong tu nomo, hemia Mikael mo Gabriel. Ating samting ya i blong givhan long yumi blong yumi no ona long ol enjel long fasin we i no stret. (Luk 1:26; Rev. 12:7) Taem aposol Jon i bodaon blong wosip long wan enjel, enjel ya i tok blong blokem hem, i se: “No, yu no mekem olsem. Yumitufala i man blong wok nomo, wetem ol brata blong yu.” (Rev. 22:8, 9) Wosip blong yumi mo ol prea blong yumi oli mas go long God nomo.—Ridim Matiu 4:8-10.

15. ?Olsem wanem ol enjel oli givim eksampol long yumi long saed blong tingting daon?

¹⁵ Ol enjel oli givim eksampol long yumi long saed blong longfala tingting. Nating se oli wantem tumas blong save ol tabu tok haed blong God, oli no save olgeta tok ya evriwan. Baebol i talem se: “Ol samting ya, ol enjel tu oli wantem save.” (1 Pita 1:12) ?Ale oli mekem wanem? Oli gat longfala tingting mo oli wet long taem we God i luk se i stret blong mekem “waes blong [hem] we i gat plante naranarafala rod blong hem,” i kam klia “tru long kongregesen.”—Efes. 3:10, 11, NW.

16. ?Olsem wanem fasin blong yumi i gat paoa long ol enjel?

¹⁶ Ol Kristin we oli kasem ol traem oli ‘stanap long fes blong olgeta enjel, blong ol enjel oli save luk ol trabol blong olgeta.’ (1 Kor. 4:9) Ol enjel oli harem gud tumas blong luk ol samting we yumi mekem blong stap tru long God mo oli glad tumas taem wan man nogud i tanem tingting blong hem from sin blong hem. (Luk 15:10) Ol enjel oli luk ol gudfala fasin we ol Kristin woman oli soemaot  blong ona long God. Baebol i tokbaot se ol ‘woman oli mas kavremap hed blong olgeta blong soemaot long ol enjel, we olgeta oli stap long han blong man blong olgeta.’ (1 Kor. 11:3, 10) Yes, ol enjel oli glad blong luk we ol Kristin woman mo ol narafala man blong God oli folem tiokratik oda mo rul we God i stanemap long saed blong olgeta we oli hed. Fasin blong ol man blong God blong obei long saed ya i pulum ol pikinini blong God long heven blong tingbaot fasin obei we olgeta tu oli mas gat.

Ol Enjel Oli Joen Long Wok Blong Prij

17, 18. ?From wanem yumi save talem se ol enjel oli stap givhan long yumi long wok blong prij?

¹⁷ Long “dei ya blong Masta,” ol enjel oli givhan blong mekem sam bigbigfala samting oli kamtru. Sam long ol samting ya hemia taem Kingdom blong God i stanap long 1914 mo “Mikael wetem ol enjel blong hem” oli sakemaot Setan mo ol rabis enjel blong hem oli aot long heven. (Rev. 1:10; 11:15; 12:5-9) Aposol Jon i luk wan “enjel we i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol.” Hem i talem se: “Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.” (Rev. 14:6, 7) Taswe, nating se ol man oli agensem strong ol man blong Jeova, oli save sua we ol enjel oli stap givhan long olgeta taem oli talemaot gud nius blong Kingdom we i stap rul finis.—Rev. 12:13, 17.

¹⁸ Long taem bifo, wan enjel i toktok long Filip mo i lidim hem blong i mitim man Itiopia. Tede ol enjel oli no toktok wetem yumi olsem blong lidim yumi blong faenem ol man we hat blong olgeta i stret. (Wok 8:26-29) Be plante stori blong wok blong prij long taem blong yumi oli soem se nating we yumi no save luk ol enjel, oli givhan long yumi long wok blong talemaot Kingdom mo oli lidim yumi blong faenem olgeta we oli “stret blong kasem laef blong olwe.” * (Wok 13:48, NW) !Tru ya, i impoten tumas we yumi joen oltaem long wok blong prij! Olsem nao Jeova i save yusum yumi blong faenem olgeta we oli wantem “mekem wosip long Papa blong yumi long spirit mo trutok.”—Jon 4:23, 24, NW.

19, 20. ?Olsem wanem ol enjel oli joen long ol samting we oli hapen klosap long “en blong wol” ya?

¹⁹ Jisas i tokbaot se long taem blong yumi we i klosap “long en blong wol” ya, bambae ol enjel oli ‘seraot ol man, ol man nogud long wansaed, mo ol gudfala man long wansaed.’ (Mat. 13:37-43, 49) Ol enjel oli givhan blong hivimap ol laswan blong ol tabu Kristin mo putum mak long fes blong olgeta blong oli kasem laef. (Ridim Matiu 24:31; Rev. 7:1-3) Mo tu, ol enjel oli stap wetem Jisas taem hem i “seraot ol sipsip blong hem long ol nani.”—Mat. 25:31-33, 46.

²⁰ “Long taem ya we Jisas, Masta blong yumi, bambae i aot long heven, i kamtru long yumi, wetem ol strong enjel blong hem,” olgeta we ‘oli no save ona long God, mo oli no save obei long gud nius blong Jisas, Masta blong yumi’ bambae oli lus. (2 Tes. 1:6-10) Taem Jon i luk samting ya long wan vison, hem i talem se Jisas mo ol enjel we oli olsem ol soldia blong heven, oli stap ron long ol waet hos blong oli go mekem bigfala faet long fasin we i stret.—Rev. 19:11-14.

21. ?Enjel ya we i gat “ki blong lokem bigfala hol ya we i godaon we i godaon olgeta, mo i stap holem wan bigfala jen,” bambae i mekem wanem long Setan mo ol rabis enjel blong hem?

²¹ Biaen Jon i luk “wan enjel we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen.” Enjel ya hemia Mikael we i jif blong ol enjel. Hem bambae i fasem Devel Setan mo i sakem hem mo ol enjel blong hem long bigfala hol ya we i godaon olgeta. Long en blong Wan Taosen Yia Rul blong  Kraes, taem we ol man oli kam stret gud olgeta finis, bambae Setan mo ol rabis enjel blong hem oli fri blong smoltaem. Ale bambae hem i traem ol man laswan. Biaen Setan mo olgeta we oli rebel agens long God bambae oli lus. (Rev. 20:1-3, 7-10; 1 Jon 3:8) Bambae fasin rebel agens long God i finis olgeta.

22. ?Olsem wanem ol wok we ol enjel oli mekem i joen wetem ol samting we bambae i hapen i no longtaem? ?I gud yumi harem olsem wanem from wok we ol enjel oli mekem?

²² Yes, taem ya we bambae yumi fri long rabis wol blong Setan i klosap nomo. Wok we ol enjel bambae oli mekem long en blong wol ya, i impoten tumas. Bambae oli leftemap hae rul blong Jeova mo bambae oli mekem stamba tingting blong God long saed blong wol mo ol man, i kamtru fulwan. Tru ya, ol gudfala enjel oli ol ‘spirit we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.’ Taswe, i gud yumi tangkiu long Jeova God from fasin blong hem blong yusum ol enjel blong givhan long yumi blong mekem wok blong hem mo blong kasem laef we i no save finis.

[Ol futnot]

?Bambae Yu Yu Ansa Olsem Wanem?

• ?Wanem ol defdefren wok we ol enjel oli mekem?

• ?Long taem blong Noa, sam enjel oli mekem wanem?

• ?Long ol yia we oli pas, olsem wanem Jeova i yusum ol enjel blong givhan long ol man?

• ?Long taem blong yumi, wanem ol wok we ol enjel oli mekem?

[Kwestin]

[Tok blong pija long pej 23]

Ol enjel oli glad blong mekem samting we God i wantem

[Tok blong pija long pej 25]

Olsem long taem blong Daniel, ol enjel oli rere oltaem blong mekem eni samting we i laenap wetem wanem we God i wantem

[Tok blong pija long pej 26]

!Yumi no fraet, from we ol enjel oli stap givhan long yumi long wok blong talemaot Kingdom!

[Credit Line]

Globe: NASA photo