Ditiro Tsa Baaposetoloi 26:1-32

  • Paulo o iphemela fa pele ga ga Ageripa (1-11)

  • Paulo o tlhalosa gore o sokologile jang (12-23)

  • Tsela e Feseto le Ageripa ba arabang ka yone (24-32)

26  Ageripa+ o ne a raya Paulo a re: “O letleletswe go ipuelela.” Foo Paulo o ne a otlolola seatla mme a simolola go iphemela a re:  “Ke ikutlwa ke itumetse, Kgosi Ageripa, ka gonne mo letsatsing leno ke letleletswe go iphemela fa pele ga gago ka ntlha ya dilo tsotlhe tse Bajuda+ ba ntatofatsang ka tsone,  segolobogolo ka gonne o setswerere mo ditlwaelong tsotlhe tsa Bajuda le mo dikganetsanong tsa bone. Ka jalo, ke kopa gore o ntheetse ka bopelotelele.  “Eleruri, tsela e ke neng ke tshela ka yone le batho* ba gaetsho le kwa Jerusalema, go tswa bosheng go ya pele e itsiwe sentle ke Bajuda botlhe+  ba pele ba neng ba tlwaelane le nna, fa e le gore ba ka rata go ntsha bosupi jwa seno, gore ke ne ke le Mofarasai,+ ke tshela go dumalana le dithuto tse di gagametseng tsa kobamelo ya rona.+  Le fa go ntse jalo, jaanong ke sekisiwa ka gonne ke dumela mo tsholofetsong e Modimo a neng a e naya borraaronamogolo;+  eno ke yone tsholofetso e ditso tsa rona tse 12 di solofetseng go e bona e diragadiwa fa ba ntse ba direla Modimo tirelo e e boitshepo ka tlhagafalo bosigo le motshegare. Bajuda ba ntatofatsa ka gonne ke dumela tsholofetso eno,+ wena Kgosi.  “Ke ka ntlha yang fa lo sa kgone* go dumela gore Modimo o tsosa baswi?  Tota nna, ke ne ke tlhatswegile pelo gore ke tshwanetse go dira ditiro di le dintsi go ganetsa leina la ga Jesu wa Monasaretha. 10  Seo ke sone se ke neng ka se dira kwa Jerusalema, e bile ke ne ka tswalela barutwa ba le bantsi mo dikgolegelong,+ ka gonne baperesiti ba bagolo ba ne ba nneile taolo ya gore ke dire jalo;+ mme fa ba ne ba tshwanetse go bolawa, ke ne ke dumalana le seo. 11  Ke ne ke leka go ba pateletsa gore ba itatole tumelo ya bone ka go ba otlhaya gantsi mo disinagogeng tsotlhe; e bile e re ka ke ne ke tuka bogale ka ntlha ya bone, ke ne ka ya bokgakaleng jwa go ba bogisa le kwa metseng e mengwe. 12  “Mo lekgetlong lengwe fa ke ne ke ya kwa Damaseko ka gonne baperesiti ba bagolo ba ne ba nthomile go ya go dira se se tshwanang teng, 13  mme ke le mo tseleng ka sethoboloko wena Kgosi, ke ne ka bona lesedi le le tsabakelang thata go feta letsatsi le tswa kwa legodimong le bo le phatsima go ntikologa le go dikologa ba ba tsamayang le nna.+ 14  Mme e rile rotlhe re sena go wela fa fatshe, ke ne ka utlwa lentswe le bua le nna ka puo ya Sehebera le re: ‘Saulo, Saulo, o mpogisetsang? O a ikgobatsa ka go lwa le nna.’* 15  Mme ke ne ka re: ‘O mang Morena?’ Mme Morena o ne a nthaya a re: ‘Ke nna Jesu, yo o mmogisang. 16  Le fa go ntse jalo, tsoga mme o eme ka dinao. Leno ke lone lebaka la go bo ke iponaditse mo go wena, gore ke go tlhophe gore o nne motlhanka le mosupi wa dilo tse o di boneng ka ga me le dilo tse ke tla dirang gore o di bone.+ 17  Mme ke tla go golola mo bathong bano le mo ditšhabeng tse dingwe tse ke go romang kwa go tsone+ 18  gore o bule matlho a bone,+ o ba ntshe mo lefifing+ o ba ise mo leseding+ o bo o ba ntshe mo taolong ya ga Satane+ o ba ise kwa Modimong. Ka ntlha ya seo, Modimo o tla itshwarela maleo a bone.+ O tla ba duela a bo a ba dira boitshepo fela jaaka a dirile ka batho ba bangwe ba ba ikanyegang.’ 19  “Ka jalo, Kgosi Ageripa, ga ke a ka ka itlhokomolosa ponatshegelo eo e e tswang kwa legodimong, 20  mme ke ne ka ya kwa go ba ba kwa Damaseko+ pele, mme go tswa foo ka ya kwa go ba ba kwa Jerusalema,+ le mo nageng yotlhe ya Judea, le kwa ditšhabeng tse dingwe, ke ba isetsa molaetsa wa gore ba ikwatlhaye mme ba sokologele mo Modimong ka go dira ditiro tse di bontshang gore ba a ikwatlhaya.+ 21  Ke gone ka moo Bajuda ba neng ba ntshwara mo tempeleng ba bo ba leka go mpolaya.+ 22  Le fa go ntse jalo, e re ka ke bone thuso e e tswang kwa Modimong, go tla go fitlha mo letsatsing leno ke sa ntse ke tsweletse ke rerela ba bannye le ba bagolo, ke bua fela se mekwalo ya baporofeti le mekwalo ya ga Moshe e buang gore se ne se tlile go direga:+ 23  gore Keresete o ne a tlile go boga+ le gore e re ka e le wa ntlha go tsosiwa mo baswing,+ o ne a tlile go rerela batho bano le ba ditšhaba tse dingwe le go ba naya lesedi.”+ 24  Jaanong fa Paulo a ntse a bua dilo tseno a iphemela, Feseto o ne a bua ka lentswe le le kwa godimo a re: “O a tsenwa, Paulo! Go bala thata go a go tsentsha!” 25  Mme Paulo o ne a re: “Ga ke tsenwe Motlotlegi Feseto, mme se ke se buang se boammaaruri e bile ke itekanetse sentle mo mogopolong. 26  Tota e bile, kgosi eno e ke buang le yone ke phuthologile e itse dilo tseno sentle; ke itse sentle gore ga go na sepe sa dilo tseno se a sa se lemogang, ka gonne ga go na sepe sa tsone se se neng sa direlwa mo sephiring.+ 27  Wena Kgosi Ageripa, a o dumela mekwalo ya baporofeti? Ke a itse gore o a dumela.” 28  Mme Ageripa o ne a raya Paulo a re: “O itse go bua tota mo e leng gore go ise go ye kae, o ka ntlhotlheletsa gore ke nne Mokeresete.” 29  Foo Paulo o ne a re: “E ka tswa e le mo nakong e khutshwane kgotsa mo nakong e telele, ke rapela Modimo gore e se ka ya nna wena fela, mme e kete le botlhe ba ba ntheeditseng gompieno ba ka nna Bakeresete jaaka nna, mme gone ba sa golegwa jaaka nna jaana.” 30  Foo kgosi e ne ya ema mme molaodi le Berenise le banna ba ba neng ba na le bone, le bone ba ne ba ema. 31  Mme fa ba tswa, ba ne ba raana ba re: “Monna yono ga a dire sepe se se ka dirang gore a bolawe kgotsa a tsenngwe mo kgolegelong.”+ 32  Go tswa foo, Ageripa o ne a raya Feseto a re: “Monna yono a ka bo a golotswe fa a ne a sa ikuela kwa go Kaesara.”+

Dintlha Tse di Kwa Tlase

Kgotsa “setšhaba.”
Kgotsa “lo atlhola gore ga go kgonege.”
Seger., “Go nna o ragakaka ditlhabo go tla go gobatsa.”