Ditiro Tsa Baaposetoloi 14:1-28

  • Barutwa ba a oketsega kwa Ikonio e bile ba a ganediwa (1-7)

  • Barenabase le Paulo ba tshwantshiwa le medimo kwa Lisetera (8-18)

  • Paulo o a tshela le fa a sena go kgobotlediwa ka maje (19, 20)

  • Ba nonotsha diphuthego (21-23)

  • Ba boela kwa Antioka kwa Siria (24-28)

14  Jaanong fa ba le kwa Ikonio ba ne ba tsena mo sinagogeng ya Bajuda mme ba ne ba bua ka tsela e e neng ya dira gore Bajuda le Bagerika ba le bantsi thata ba nne badumedi.  Mme Bajuda ba ba ileng ba se ka ba nna badumedi ba ne ba fudua batho ba ditšhaba tse dingwe ba bo ba ba tlhotlheletsa ka tsela e e phoso gore ba tlhasele bakaulengwe.+  Ka jalo, Paulo le Barenabase ba ne ba fetsa nako e telele koo, mme Jehofa* o ne a ba naya maatla a gore ba bue ba le pelokgale. O ne a ba dirisa go dira ditshupo le dikgakgamatso e le go bontsha gore molaetsa o ba neng ba o rera o ne o le boammaaruri, e leng molaetsa o o ka ga bopelonomi jwa gagwe jo bogolo.*+  Le fa go ntse jalo, batho ba motse oo ba ne ba kgaogana; bangwe ba ne ba ema le Bajuda mme ba bangwe ba ema le baaposetoloi.  Batho ba ditšhaba tse dingwe le Bajuda le babusi ba bone ba ne ba ikemiseditse go ba tlhabisa ditlhong le go ba kgobotletsa ka maje,+  le fa go ntse jalo, ba ne ba itsisiwe ka seo, mme ba ne ba tshabela kwa metseng ya Likaonia, Lisetera le Derebe, le kwa metsaneng e e mo tikologong.+  Fa ba le koo, ba ne ba tswelela ba rera dikgang tse di molemo.  Jaanong kwa Lisetera go ne go na le monna mongwe a ntse fa fatshe, a golafetse dinao. O ne a tsholwa a golafetse e bile o ne a ise a ko a tsamaye.  Monna yono o ne a reeditse Paulo fa a ntse a bua. Fa Paulo a ntse a mo lebile ka kelotlhoko mme a lemoga gore o na le tumelo mo go se a neng a se bua le gore o dumela gore a ka kgona go fodisiwa,+ 10  o ne a bua ka lentswe le le kwa godimo a re: “Ema ka dinao.” Ka jalo, monna yoo o ne a ema ka bonako a bo a simolola go tsamaya.+ 11  Fa batho ba bona se Paulo a se dirileng, ba ne ba goa ka puo ya Selikaonia ba re: “Jaanong medimo e fetogile batho e bile e fologetse mo go rona!”+ 12  Mme ba ne ba simolola go bitsa Barenabase ba re Seuse, mme Paulo ene ba mmitsa Heremese, ka gonne ke ene a neng a bua thata. 13  Mme moperesiti wa ga Seuse, yo tempele ya gagwe e neng e le kwa kgorong ya motse, o ne a tlisa dipoo le dikgare tsa malômô* kwa dikgorong, a ikaeletse go ntsha ditlhabelo a na le batho bao. 14  Le fa go ntse jalo, fa moaposetoloi Barenabase le moaposetoloi Paulo ba utlwa ka seo, ba ne ba gagola diaparo tsa bone mme ba tabogela mo gare ga batho bao ba bo ba goa ba re: 15  “Bagaetsho, ke ka ntlha yang fa lo dira dilo tseno? Le rona re batho ba ba nang le makoa fela jaaka lona.+ Mme re lo bolelela dikgang tse di molemo, gore lo tlogele go obamela dilo tse di se nang mosola mme lo obamele Modimo yo o tshelang, yo o dirileng legodimo le lefatshe le lewatle le dilo tsotlhe tse di mo go tsone.+ 16  Mo dikokomaneng tse di fetileng o ne a letla ditšhaba tsotlhe gore di dire jaaka di batla,+ 17  le fa gone a ile a itshupa gore ke mang+ ka go dira dilo tse di molemo, a lo nesetsa dipula go tswa kwa legodimong e bile a lo naya dipaka tsa thobo e ntsi,+ gore lo nne le dijo tse lo ka di jang gore lo kgotsofale le gore lo itumele.”+ 18  Mme le fa gone ba ile ba bua dilo tseno, ba ile ba kgona go thibela batho bao gore ba se ka ba ba ntshetsa setlhabelo, le fa go ne go se motlhofo go dira jalo. 19  Mme Bajuda ba ne ba goroga ba tswa kwa Antioka le kwa Ikonio ba bo ba tlhotlheletsa batho+ gore ba tlhasele Paulo, mme ba ne ba mo kgobotletsa ka maje ba bo ba mo gogela kwa ntle ga motse ba ithaya ba re o sule.+ 20  Le fa go ntse jalo, fa barutwa ba mo kokoanela, o ne a ema a bo a boela mo motseng. Mo letsatsing le le latelang o ne a tsamaya le Barenabase ba ya kwa Derebe.+ 21  Fa ba sena go bolelela batho ba motse oo dikgang tse di molemo le go dira barutwa ba le bantsi thata, ba ne ba boela kwa Lisetera, kwa Ikonio le kwa Antioka. 22  Fa ba le koo ba ne ba nonotsha barutwa,+ ba ba kgothaletsa gore ba tswelele ba nonofile mo tumelong ba re: “Re tshwanetse go tsena mo Bogosing Jwa Modimo ka dipitlagano di le dintsi.”+ 23  Mo godimo ga moo, ba ne ba tlhoma bagolwane mo phuthegong nngwe le nngwe,+ ba rapela e bile ba itima dijo,+ mme ba ne ba ba neela Jehofa* gore a ba tlhokomele, yo jaanong ba neng ba dumela mo go ene. 24  Go tswa foo, ba ne ba ralala Pisidia ba bo ba ya kwa Pamfilia,+ 25  mme fa ba sena go itsise lefoko la Modimo kwa Perega, ba ne ba ya kwa Atalia. 26  Ba ne ba tswa koo ka mokoro ba ya kwa Antioka, kwa bakaulengwe ba neng ba ile ba ba neela Modimo gone gore a ba bontshe bopelonomi jo bogolo ka ntlha ya tiro e gone jaanong ba e weditseng.+ 27  Fa ba sena go goroga le go phutha phuthego, ba ne ba ba bolelela dilo di le dintsi tse Modimo a ileng a di dira a ba dirisa, le gore o ne a buletse batho ba ditšhaba tse dingwe tsela ya gore ba dumele mo go ene.*+ 28  Ka jalo, ba ne ba nna nako e telele le barutwa koo.

Dintlha Tse di Kwa Tlase

Kgotsa “dithunya.”
Seger., “kgoro ya tumelo.”