Inkamapaabeba​—Sakey a Kualidad a Makapaliket ed Dios

SAY inkamapaabeba et bulos ed inkamapaatagey odino inkamapasirayew; kaabebaan na nonot. Aliwa itan a kakapuyan noagta sakey a kipapasen na nonot a makapaliket ed si Jehova.

Diad Hebreon Kasulatan, say “inkamapaabeba” so nanlapud lamot a salitan (ʽa·nahʹ) a kabaliksan toy “kapairap; kipaabeba; kalames.” Saray salitan nanlapud sayan lamot et nanduruman nipatalos ya “inkamapaabeba,” “inkaulimek,” “napapairap,” tan arum ni. Say duara nin Hebreon verb a manasaglawi ed “inkamapaabeba” et ka·naʽʹ (diad literal, isuko [na sakey]) tan sha·phelʹ (diad literal, magmaliw a mapaabeba odino manpaabeba). Diad Kristianon Griegon Kasulatan say salitan ta·pei·no·phro·syʹne et nipapatalos ya “inkamapaabeba” tan “kaabebaan na nonot.” Satan so nanlapud saray salitan ta·pei·noʹo, “ipaabeba,” tan phren, “so nonot.”

Nayarian na sakey a too a dampoten so kipapasen a mapaabeba diad pankatunongan to nipaakar ed relasyon to’d Dios tan ed kapara ton totoo, a singa nidatak ed Biblia, insan agamilen to iray prinsipyon naaralan. Say Hebreon salitan, hith·rap·pesʹ, a nipatalos ya “ipaabebam so inkasika,” et literal a mankabaliksan na, “iyabebam so inkasika.” Ibabalikas ton tuloy so kiwas a deneskribe na makabat a managsulat na Uliran: “Ana’ko, no magmaliw ka a panagmatalkan nipaakar ed kaabay mo, no . . . akalotan [ka] ed saray salita na sangim, . . . sinmabi ka ed lima na kaabay mo: onla ka, manpaabeba ka [iyabebam so inkasika], tan pakaskasi ka ed kaabay mo. . . . Ilaban mo so inkasika.” (Uliran 6:1-5) Diad arum a salita, ibantak moy inkamapaatagey mo, aksobim so lingom, ipetek iray pamaakaran, tan onkerew kay perdona. Insimbawa nen Jesus a manpaabeba so sakey a too ed arap na Dios a singa sakey ya ugaw tan, imbes a panggunaetan toy pagmaliw a prominenti, sikatoy manlingkor ed saray agagi to.​—Mateo 18:4; 23:12.

Walaan na baleg a kablian so inkamapaabeba ed imaton nen Jehova. Anggaman anggapoy antokaman ya obligasyon na Dios ed katooan, lapud agkanepegan a panangasi to et sikatoy mabulos a mangipanengneng na panangasi tan pabor ed saraman so mangipaabeba ed inkasikara ed arap to. Ipapanengneng na saratan ya ag-ira manmamatalek odino mangipapasirayew ed inkasikara noagta onsasaral ira ed sikato tan labay dan gawaen so linawa to. Unong ya inkuan na saray apuyanan a Kristianon managsulat a di Santiago tan Pedro: “Say Dios sumpaen to so atagey a linawa, bangbalet mangiter na grasya ed mauyamo.”​—Santiago 4:6; 1 Pedro 5:5.

Anggan ed saramay nanggawa na mauge-uges iran bengatla ed apalabas, no talagan ipaabeba day inkasikara ed arap nen Jehova tan kerewen da so panangasi to, dengelen tora. Lapud impangiyalibansa ed palson panagdayew ed dalin, sinagyat nen Arin Manases na Juda iray manaayam ed Juda tan ed Jerusalem ‘a manggawa na mauges a lalo nen say ginawa na saray nasyon a binagbag nen Jehova ed arap na saray anak na Israel.’ Ingen, kayarin sikatoy inabuloyan nen Jehova a kautiboen na ari na Asirya, si Manases so “nampaabeba na balbaleg ed arap na Dios na saray atateng to. Tan nampikasi ed sikato; et sikato so akerewan , tan dinengel to so kerew to, tan inyakar to lamet ed Jerusalem ed nanarian to. Diad saman si Manases naamtaan to a si Jehova sikato so [tuan] Dios.” Kanian naaralan nen Manases so inkamapaabeba.​—2 Awaran 33:9, 12, 13; ikompara so 1 Arari 21:27-29.

Angitarya na Dugan Panangigiya

Say sakey a manpaabeba ed inkasikato diad arap na Dios et nailaloan a nawalaan na panangigiya na Dios. Walaan si Esdras na ambelat a responsabilidad ya idaulo so masulok a 1,500 a lalaki, likud iray saserdote, say Netineo, bibii tan ugugaw ya ompawil ed Jerusalem a manlapud Babilonia. Niarum ni, tarok day baleg a kantidad na balitok tan pilak parad pamarakep ed templo diad Jerusalem. Kaukolan day salimbeng ed panbiahe ra, balet agnilabay nen Esdras so onkerew ed ari na Persia na saray sundalon mangulop ed sikara lapud ta satan so pakapatnagan na panagmatalek ed pakayari na  too. Likud ni, imbaga to la ed ari: “Say lima na Dios mi wala ed saray amin a mananap ed sikato, nipaakar ed maong.” Kanian inyabawag toy pan-ayunal, ta pian ipaabeba na totoo so inkasikara ed arap nen Jehova. Sikaray kinmerew ed Dios, tan sikatoy dinmengel tan sinalimbengan to ira manlapud kakabusol a manambang ed sikara diad dalan ta pian ontalona ira ed mapeligron biahe. (Esdras 8:1-14; 21-32) Apaboran a tuloy si propetan Daniel, nen nibantak ira ed Babilonia, diad impangibaki na Dios ed sakey ya anghel ed sikato a walaan na pasingawey, lapud impaabeba nen Daniel so inkasikato ed arap na Dios diad panaanap toy panangigiya tan pakatalos.​—Daniel 10:12.

Lapud inkamapaabeba, nigiya so sakey a too diad dugan basbas tan mangitarok na kirayewan to, ta say Dios so mangipaatagey ed sakey tan mangipaabeba ed sananey. (Salmo 75:7) “Arapen na kabagbag say puso na too sikato so mapasang; et arapen na dayew onla so kauyamoan.” (Uliran 18:12; 22:4) Kanian, say sakey a manaanap na dayew panamegley na inkatangsit et onsaew, a singa ginawa nen Arin Uzias na Juda, a nagmaliw a mapasang tan sinumlang toy ganggan a sinamsam to iray kimey a parad saserdote labat: “Sanen sikato so mabiskeg, say puso to nipaatagey, ed ontan a nanggawa a sankabandayan, tan linmukso sumpa ed Jehova a Dios to; ta linmoob ed templo nen Jehova a nampasob na insenso ed tapew na altar na insenso.” Sanen sikatoy sinmanok ed saray saserdote lapud impangorihe ra ed sikato, sikatoy adapoan na kating. (2 Awaran 26:16-21) Lapud andian na inkamapaabeba si Uzias kanian sikatoy nisuawi, a sengegan na inkipaabeba to.

Nepeg a Bayuboan na Kristianos so Inkamapaabeba

Diad impanimbawa ed kaparan Kristianos a mangisulong na personalidad a “pinasimbalo nipaakar ed kakabatan a nipara ed talintao na Amalsa ed sikato,” inkuan nen apostol Pablo: “Mampales kayo la sirin, a singa saray pinili Dios, sasanto tan inararo, sakey a puso a maabagey, maong a linawa, kauyamoan, kadeenan, kasungdoan.” (Colosas 3:10, 12) Diad impanukoy to ed maabig ya ehemplo nen Kristo, binilin to ira: “Dia ed kaabebaan na kalakal balang sinansakey ibilang to so arum [iran lingkor na Dios] a magmaong nen say sikaton dili.” (Filipos 2:3) Sikato lamet so inmapelo: “Mankakasakey kayo ed kanonotan. Agyo ra nonoten so bengatla ya atagey, noag ingen mitukoy kayo ed saray bengatla ya abeba. Aleg a makabat kayo ed kanonotan yon dili.”​—Roma 12:16.

Mipadpara met so imbaga nen Pablo ed saray Kristiano ed syudad na Corinto: “Ta anggan bulos ak ed ami too, impaaripen ak ed amin, ta pian makatalo ak ni dakdakel. Tan dia ed saray Judio, nagmaliw ak a singa Judio, ta pian naalak so saray Judio; dia ed saray wala ed silong na ganggan, singa wala ed silong na ganggan, anggan andi ak a dili ed silong na ganggan ta pian naalak so saray wala ed silong na ganggan. Dia ed saray anggapo so ganggan, singa anggapo so ganggan, aliwa ya anggapo ak ed ganggan na Dios, noag dia ed silong na ganggan nen Kristo, pian naalak so saray anggapo so ganggan. Dia ed saray makapuy nagmaliw ak a makapuy, pian naalak so saray makapuy: nagmaliw ak ya ami’ ganagana ed amin day totoo, ta pian dia ed ami’ gawa nilaban ko so saray arum.” (1 Corinto 9:19-22) Mankaukolan na tuan inkamapaabeba so panggawa ed saya.

Pankimeyan so Kareenan

Mangiyalibansa na kareenan so inkamapaabeba. Agkolkolen na mapaabeban too so Kristianon agagi to ta pian nagamoran toy ipapasen ton personal iran “kanepegan.” Insingbat itan na apostol, anggaman bulos a nagawaan to so amin a bengatla, ginawa to labat iray bengatlan makapabiskeg, tan no say konsiensia na sakey ya agi et asigensigen lapud saray personal a kiwas to, itunda ton gawaen itan.​—Roma 14:19-21; 1 Corinto 8:9-13; 10:23-33.

Mankakaukolan met na inkamapaabeba so pamansiansia ed kareenan diad pangiyaplika ed simbawa nen Jesus a perdonaen iray arum ed saray kasalanan da ed sikatayo. (Mateo 6:12-15; 18:21, 22) Tan no naopendi na sakey so sananey, nasubok so inkamapaabeba to a tuloken so ganggan ya onla ed naopendin too tan aksobien to so lingo, ya onkerew na panamerdona. (Mateo 5:23, 24) Odino sano onasingger so naopendi ed sikato, say aro ya atekepan na inkamapaabeba labat so managdag ed sakey a mangaksobi ed lingo tan tampol ya onkiwas pian ipetek iray pamaakaran. (Mateo 18:15; Lucas 17:3; ikompara so Levitico 6:1-7.) Balet saray resultan itarok na inkamapaabeba diad pikakareenan ed indibidual tan ed organisasyon et palumbasan ton tuloy so liknaan a nipabpaabeba; ontan met, say mapaabeban kiwas to so lalon mamayubo tan mamabiskeg ed maabig a kualidad na inkamapaabeba na indibidual.