മുഖ്യലേഖനം | അപ്രതീക്ഷിതസംഭവങ്ങൾ ആഞ്ഞടിക്കുമ്പോൾ. . .
ദുരന്തം ആഞ്ഞടിക്കുമ്പോൾ
ഇന്ന് അല്ലെങ്കിൽ നാളെ, മിക്കവാറും എല്ലാവരുംതന്നെ ഏതെങ്കിലും തരത്തിലുള്ള ദുരന്തത്തിന് ഇരകളായേക്കാം. തങ്ങൾക്ക് ഒരു കുഴപ്പവും വരില്ലെന്നു വിചാരിക്കുന്നവർക്കും അത് സംഭവിച്ചേക്കാം.
ബൈബിൾ പറയുന്നു:
“വേഗതയുള്ളവർ ഓട്ടത്തിലും വീരന്മാർ യുദ്ധത്തിലും നേടുന്നില്ല; ജ്ഞാനികൾക്കു ആഹാരവും വിവേകികൾക്കു സമ്പത്തും സാമർത്ഥ്യമുള്ളവർക്കു പ്രീതിയും ലഭിക്കുന്നില്ല; അവർക്കൊക്കെയും കാലവും ഗതിയും (“മുൻകൂട്ടിക്കാണാൻ കഴിയാത്ത സംഭവങ്ങൾ,” NW) അത്രേ ലഭിക്കുന്നത്.”—സഭാപ്രസംഗി 9:11.
അതുകൊണ്ട്, നിങ്ങൾക്ക് ഒരു ദുരന്തം നേരിടേണ്ടിവരുമോ എന്നതല്ല, പിന്നെയോ ഒരു ദുരന്തം നേരിട്ടാൽ അതിനോട് നിങ്ങൾ എങ്ങനെ പ്രതികരിക്കും എന്നതാണ് ഇപ്പോൾ ഉയർന്നുവരുന്ന ചോദ്യം. ഉദാഹരണത്തിന്:
നിങ്ങളുടെ വസ്തുവകകളെല്ലാം ഒരു പ്രകൃതിദുരന്തത്തിൽ നഷ്ടപ്പെടുന്നെങ്കിലോ?
നിങ്ങൾക്ക് ഒരു മാരകരോഗമുണ്ടെന്ന് അറിയുന്നെങ്കിലോ?
നിങ്ങളുടെ പ്രിയപ്പെട്ട ഒരാൾ മരിക്കുന്നെങ്കിലോ?
ഒരു ദുരന്തം ആഞ്ഞടിക്കുമ്പോൾ അതിനോടു പൊരുത്തപ്പെടാൻ ബൈബിൾ നിങ്ങളെ സഹായിക്കുമെന്ന് ഈ മാസികയുടെ പ്രസാധകരായ യഹോവയുടെ സാക്ഷികൾക്ക് ഉറപ്പുണ്ട്. കൂടാതെ ശോഭനമായ ഒരു ഭാവിക്കുള്ള അടിസ്ഥാനവും ബൈബിൾ നൽകുന്നു. (റോമർ 15:4) ബൈബിൾ എങ്ങനെ സഹായിക്കുന്നെന്നു വ്യക്തമാക്കുന്ന മൂന്ന് അനുഭവങ്ങൾ തുടർന്നു വായിക്കുക. (g14-E 07)