Isaya 64:1-12
64 Shi wasanine’tu madiulu, watūka,Amba ngulu itenkane pa mwanda obe,
2 Pamo bwa mudilo usōka kitumpa,Ne mudilo usabija mema,Longa dijina dyobe dyayukene ku bakinkwa nobe,Kadi longa mizo yazakele ku meso obe!
3 Powalongele bintu bilenga nzuba byoketwasomwenwepo kukulupila,+Watūkile, ngulu nayo yatenkana ku meso obe.+
4 Tamba kala i kutupu nansha umo waivwene, nansha kuta kutwi,Kadi i kutupu diso dyamwene Leza poso’nka abe,Ulongela bintu boba bamukungila.*+
5 Ubetana na boba balonga byoloke na nsangaji,+Boba bakuvuluka ne kulonda mashinda obe.
Tala! Wafītyilwe mutyima, batwe papo tulonga nyeke bubi,+Twebulongele kitatyi kilampe.
Le pano tukapanda?
6 Kadi batwe bonso tubaikala pamo bwa muntu wa disubi,Bilongwa byetu byonso bya boloke nabyo bidi pamo bwa kisandi kya ku mweji.+
Batwe bonso tukafumba pamo bwa dyani,Kadi bilubo byetu biketusela pamo bwa kivula.
7 I kutupu muntu nansha umo wita dyobe dijina,Muntu nansha umo ulanguka amba akukwate,Mwanda ubetufi mpala yobe,+Ubetulengeja tushinike* mwanda wa* kilubo kyetu.
8 Ino pano a Yehova, abe wi Tata wetu.+
Batwe twi dilongo, abe wi Umbumbi wetu;*+Batwe bonso twi mingilo ya makasa obe.
9 A Yehova, kokafītwa mutyima bininge,+Kadi kokavuluka kilubo kyetu nyeke.
Tubakwisāshila, witutale mwanda batwe bonso twi bantu bobe.
10 Bibundi byobe bijila bibaalamuka ke mu ntanda mutuputupu.
Ziona waalamuka ke mu ntanda mutuputupu.
Yelusalema ke mu ntanda mudi zolē.+
11 Njibo* yetu ya buujila ne ntumbo,*Mwadi mukutendela bakulutuba betu,Ibasōkwa mudilo,+Kadi bintu byonso byotwadi tusenswe bibasalwa.
12 Pa mwanda wa kino’ki, a Yehova, le ukeshisa?
Le ukekala’nka talala ne kwituleka tumweshibwe malwa bya mwiko?+
Kunshi kwa Dyani
^ Nansha’mba “bamwilaija na kitūkijetyima.”
^ Kishima pa kishima i, “tusunguluke.”
^ Kishima pa kishima i, “ku kuboko kwa.”
^ Nansha’mba “Mwine wetulongele.”
^ Nansha’mba “Tempelo.”
^ Nansha’mba “buya.”
