Isaya 1:1-31
1 Kimonwa kyamwene Isaya*+ mwanā Amoze kitala Yuda ne Yelusalema mu mafuku a Uzia,+ Yotama,+ Ahaza+ ne Hezekia,+ balopwe ba Yuda+ kya amba:
2 A madiulu tejai, a ntanda+ nobe ivwana,Mwanda Yehova wesambe amba:
“Bana bonalelele ne kutamija,+Ino pano abantombokela.+
3 Ñombe uyukile biyampe mwine umupotele,Mpunda nandi uyukile kidīlo kya mfumwandi;Ino Isalela kandyukilepo,*+Bantu bami kebeendejangapo na ñeni.”
4 Malwa obe, muzo wa bubi,+Bantu balēmenenwe na bubi,Bana ba bantu babi, bana boneke!
Abaleka Yehova;+Abapunika Mwine Ujila wa Isalela;Abamwela nyuma.
5 Le usa kukupilwa pepi monka byotombokela’ko?+
Mutwe onso ubelanga,Kadi mutyima onso udi na misongo.+
6 Tamba ku kinyantyilo kutūla ne ku mutwe, i kutupu pakomo.
Kudi bilonda ne bivimvilwa ne bilonda bitutumuke—Kebyundapilwepo* nansha kukutwa nansha kunekenibwa na māni.+
7 Ntanda yenu ibasalwa.
Bibundi byenu bibasōkwa mudilo.
Beni basasamunanga ntanda yenu mu meso enu.+
Idi pamo bwa mu ntanda mutuputupu mufulamikwe na beni.+
8 Mwanā Ziona mwana-mukaji i mushibwe pamo bwa mwa kufyama* mu budimi bwa mañanza,Pamo bwa kōbo mu budimi bwa bibimbi,Pamo bwa kibundi kitēkelwe kasāla.+
9 Shi Yehova wa bibumbo ketushilepo batyetye bōmi,Twadi ba kwikala mwāikadile Sodoma,Kadi twadi ba kwifwana Ngomola.+
10 A balopwe ba kasusu* ba Sodoma,+ ivwanai kinenwa kya Yehova.
A bantu ba Ngomola,+ tai mutyima ku bijila* bya Leza wetu.
11 “Le bitapwa byenu+ bivulevule bidi na kamweno’ka kondi?” i Yehova unena.
“Byamulambu byenu bisōkwe bya mikōko milume+ ne bya māni a banyema banune bibantonda,+“Kadi nkiloelelwepo mashi+ a bañombe bana+ ne a twana twa mikōko ne a bambuji.+
12 Pomwiya kumweka ku meso ami,+Le i ani wimulomba kino’ki,Kutyampa bipango byami?+
13 Kemwakiyai monka na byamulambu bya miseke bya bituputupu.
Ensense yenu i kya munyanji kondi.+
Makweji katenta,+ masabato,+ ne bitango byomuteakanya+—Nkibwanyapo kwitabija bya maleñanya+ pamo ne bitango byenu bikola.
14 Nashikwe* makweji katenta enu ne masobo enu.
Bibandēmena;Nakōka kwibisela.
15 Kadi kitatyi kyomubāla makasa enu,Ami nemufyanga meso ami.+
Nansha shi mulombele milombelo mingi,+Nkiivwanangapo;+Maboko enu i mayule mashi.+
16 Oyai, mwitōkejei;+Talulai bilongwa byenu bibi ku meso ami;Lekai kulonga bibi.+
17 Mwifundei kulonga biyampe, kimbai boloke,+Ololai yewa umwesha ba malwa,Lwilai mwana wampikwa shandi,*
Kadi nenenai mukaji wa kishala.”+
18 “Pano iyai, tusendulule myanda,” i Yehova unena.+
“Nansha shi bubi bwenu budi pamo bwa bityila pyā,Bukatōkejibwa pamo bwa mashika mekwate;+Nansha shi butyila pamo bwa kisandi kityididila pyū,Bukekala pamo bwa myoya.
19 Shi muswile ne kwivwana,Mukadya bintu biyampe bya ntanda.+
20 Ino shi mupele ne kutomboka,Mukasasamunwa na kipete,+Mwanda kyakanwa kya Yehova kibesambe’kyo.”
21 Yō kibundi kya kikōkeji+ kibaalamuka ke ndumba!+
Kyadi kiyule boloke;+Bululame bwadi bwikalanga’mo,+Ino pano ke bantapañani.+
22 Ndalama yobe ibaalamuka ke bityani,+Kadi mālwa* obe i masābulwe na mema.
23 Bamfumu bobe badi na mitwe myūmu kadi bapwene na bangivi.+
Abo bonso basenswe kutyibwa milomo ne kulondalonda byabuntu.+
Kebabingijangapo bana bampikwa bashabo,*Kadi mambo a mukaji wa kishala keafikangapo kobadi.+
24 O mwanda Mfumu wa bine, Yehova wa bibumbo,Mwine Nkomokomo wa Isalela, wanena’mba:
“Ee! Nsa kutalula bakinkwa nami,Kadi nsa kulubwila balwana nami kinongo.+
25 Nsa kwalamuna kuboko kwami podi,Nsa kusungulula bityani byobe pamo bwa na kifulaKadi nsa kutalula bya disubi byobe byonso.+
26 Nkajokeja batyibi bobe mobadi bekadile dibajinjiNe badingidi bobe mobadi bekadile ku ngalwilo.+
Kupwa uketwa bu Kibundi kya Boloke, Kibundi kya Kikōkeji.+
27 Ziona ukakūlwa na boloke,+Bantu bandi bajoka nabo, na bululame.
28 Bantomboki ne babipya-mambo bakatyumunwa pamo,+Boba baleka Yehova nabo bakafundulwa’ko.+
29 Mwanda bakafwa bumvu pa mwanda wa mityi mikomokomo yomwadi mwabila,+Kadi mukazobejibwa pa mwanda wa madimi* omwatongele.+
30 Ke-pantu mukekalanga pamo bwa mutyi mukata wa mani mōmu,+Ne pamo bwa budimi bwampikwa mema.
31 Muntu mukomo ukekala ke kisafu,*Mwingilo wandi nao ke lusase;Abyo byonso bibidi bikatēma pamo mu lubimbi,
Kwampikwa nansha umo wa kubula’byo.”
Kunshi kwa Dyani
^ Ko kushintulula’mba “Lupandilo lwa Yehova.”
^ Nansha’mba “kayukilepo mfumwandi.”
^ Kishima pa kishima i, “Kebifininwepo.”
^ Nansha’mba “kitanda.”
^ Nansha’mba “baledi.”
^ Nansha’mba “bulombodi.”
^ Nansha’mba “Muya wami ubashikwe.”
^ Nansha’mba “mwanā nshiye.”
^ Nansha’mba “mālwa a ñano.”
^ Nansha’mba “bana ba nshiye.”
^ Mobimwekela i mityi ne madimi bikwatañene na butōtyi bwa bilezaleza.
^ Nyushi idi bwa monji yakanga bukidibukidi.
