Isaya 3:1-26
3 Mwanda tala! Mfumu wa bine, Yehova wa bibumbo,Usa kutalula mu Yelusalema ne mu Yuda bukwashi bwa miswelo yonso ne byakudya bya miswelo yonso,Bukwashi bonso bwa mikate ne mema,+
2 Muntu mukomokomo ne wa bulwi,Mutyibi ne mupolofeto,+ mbuki ne mukulumpe,
3 Mukata wa 50,+ muntu mulēmekibwe, ne mudingidi,Muntu wa maleñanya wa bwino ne nkinda wa bwino.+
4 Nkatūla banuke ke bamfumu babo,Kadi yewa utelententa* ukabikala pobadi.
5 Bantu bakemwesha malwa,Muntu umo na mukwabo.+
Mwana mutyetye ukatamba’dyo mutame,Kadi yewa mulēmekibwe bityetye ukapunika yewa mulēmekibwe.+
6 Muntu ne muntu ukakwata mwanabo mu njibo ya shandi, kamunena’mba:
“Udi na kikanzo kya pangala, ikala mukatampe wetu.
Endeja uno mulwi mufulamikwe wa masala.”
7 Ino aye ukapela mu dyodya difuku amba:
“Nkisapo kwikala obe muntu wa kukuta bilonda;*Nkidipo na byakudya nansha bivwalwa mu njibo yami.
Kemwakantūlai bu mukata wa bantu.”
8 Mwanda Yelusalema wakukala,Kadi Yuda wapone,Mwanda balubilanga Yehova mu binenwa ne mu bilongwa;Beendejanga na kipuni ku meso andi a ntumbo.*+
9 Mumwekelo wa mapala abo wibaponejanga,Kadi basapulanga bubi bwabo pamo bwa Sodoma;+Kebafyanga’bopo.
Malwa abo,* mwanda beletelanga kyamalwa abo bene!
10 Lombolai boloke amba bikebekadila biyampe;Bakapalwa mpalo pa mwanda wa byobalonga.*+
11 Muntu mubi malwa andi!
Kyamalwa kikamuponena,Mwanda byobya bilongele kuboko kwandi bakamulonga’byo!
12 Ino bantu bami, bendeji babo ba mingilo i babi,Kadi bana-bakaji bebabikele.
A bantu bami, bendeji benu bemulumbakanyanga,Kadi bavutakanyanga tushinda twenu.+
13 Yehova waimana mwanda wa kutopeka;Wimene mwanda wa kutyibila bantu mambo.
14 Yehova ukatwela mu butyibi na bakulumpe ne bamfumu ba bantu bandi.
“Mubasōka budimi bwa mañanza,Kadi byobya byomwibile balanda bidi mu mobo enu.+
15 Le mubasomonwa namani kuvingakanya bantu bamiNe kusonsakanya mapala a balanda mu busala?”+ i Mfumu Mwinē Lupusa Lonso, Yehova wa bibumbo unena.
16 Yehova wanena’mba: “Bana ba Ziona bana-bakaji byobezunzula,Benda batulwile mitwe yabo mūlu,*Basakañana na meso abo, benda befyela,Bavumija bityebitye nzenze yabo ya mu tumpo,*
17 Kadi Yehova ukabeleka mutwe wa bana ba Ziona bana-bakaji na bitāto,Kadi Yehova ukashiya mpala yabo pululu.+
18 Mu dyodya difuku, Yehova ukatalula buya bwa nzenze yabo ya ku maulu,Tubāla twa ku mutwe ne bya kwidyangula nabyo+ bidi bwa kweji katenta,
19 Nzenze ya ku matwi,* ne nzenze ya ku maboko, ne bilēnda,
20 Bya kupūta ku mutwe, tumiyololo twa mu tumpo,* ne bisandi bya mu kyadi,*Bya kubīka’mo mananshi* ne bijīmba,*
21 Mpete ya ku minwe ne nzenze ya ku myulu,
22 Makanzo a binkumenkume, mitwelo ya pangala mikatakata, bikanzo bya pangala, ne tufuko twa lupeto,
23 Biyo+ bya ku makasa ne bivwalwa bya bukonge,*Bivwalwa bya ku mutwe ne bilēnda.
24 Pa kyaba kya māni a balasome,+ kukekala bubole;Pa kyaba kya mukaba, kukekala monji;Pa kyaba kya bisela biyampe bya nywene, kukekala dibala;+Pa kyaba kya kivwalwa kya katūtu, kukekala kivwalwa kya sāka;+Ne kiyukeno kya lonso pa kyaba kya buya.
25 Bana-balume bobe bakapona ku kipete,Ne bana-balume bobe bakomokomo nabo mu bulwi.+
26 Bibelo byandi bikadila madilo ne kwikala na njia,+Kadi aye ukashikata pa nshi misalwe.”+
Kunshi kwa Dyani
^ Nansha’mba “walamukaalamuka.”
^ Nansha’mba “wa kukubelula.”
^ Kishima pa kishima i, “mu meso a ntumbo yandi.”
^ Nansha’mba “a muya wabo.”
^ Kishima pa kishima i, “Bakadya bipa bya bilongwa byabo.”
^ Nansha’mba “mu tukukunyu.”
^ Kishima pa kishima i, “batamwine nshingo (mudibu).”
^ Nansha’mba “Bya kwidyangula nabyo.”
^ Nansha’mba “biboyo bya banyonga bivuma bya kwidyangula nabyo.”
^ Kishima pa kishima i, “mobo a muya.”
^ Nansha’mba “nkuka.”
^ Nansha’mba “mu tukukunyu.”
^ Nansha’mba “bivwalwa munshi.”
