Isaya 36:1-22
36 Mu mwaka wa 14 wa Mulopwe Hezekia, Senakediba mulopwe wa Ashidia+ wakanda kulwa bulwi na bibundi byonso bikomejibwe bya Yuda ne kukwata webikwata.+
2 Kupwa mulopwe wa Ashidia watuma Labashake*+ na kibumbo kikatampe kya divita, batamba ku Lakishi+ baenda ku Yelusalema kwa Mulopwe Hezekia. Baimana dya ku mukola wa kijiba kya kungala,+ udi mu dishinda dikatampe dya budimi bwa muntu ukendanga bisandi.+
3 Penepo Ediakimi+ mwanā Hilekia wadi utala ba mu njibo,* ne Shebana+ mulembi, ne Yoa mwanā Asafa musoneki, baiya kwadi.
4 Penepo Labashake webanena’mba: “Nemwisāshila, sapwilai Hezekia amba, ‘Mulopwe mukatampe, mulopwe wa Ashidia, wanena namino amba: “Le kikulupiji kyobe kimanine pa bika?+
5 Ubanena’mba, ‘Ngidi na bunwa ne na bukomo bwa kulwa divita,’ ino bino i binenwa bya bituputupu. Le i ani owikulupile kosomonwa kuntombokela ami?+
6 Tala! Ubekulupila bukwashi bwa dino dibungu difyotoke, ke Edipito kadi, ino shi muntu waeyalela’ko dibwanya kutwela mu dikasa dyandi dyeditubula. Mo mwikadile ne Felo mulopwe wa Edipito ku boba bonso bamukulupile.+
7 Kadi shi unombole amba, ‘Tukulupile mudi Yehova Leza wetu,’ mwene i aye obatalwidile mitenta ne bisōkelo kudi Hezekia,+ kanena Yuda ne Yelusalema amba, ‘Mufwaninwe kwivukwila ku meso a kino kisōkelo’?”’+
8 Shi ke pano, nakwisāshila, pikana na mfumwami mulopwe wa Ashidia:+ Nsa kukupa tubalwe 2 000 shi ubwanya kutana bantu babwane ba kukanda’po.
9 Le penepo ubwanya namani kujokeja nansha’tu mbikavu umo mutyetye bininge mu bengidi ba mfumwami, koku wikulupile Edipito pa mwanda wa makalo ne bantu bakandanga pa tubalwe?
10 Lelo ke na lupusapo lwa Yehova lonaiya kulwa nalo ino ntanda mwanda wa kwiyonakanya? Yehova mwine waunenene amba, ‘Kanda ulwe na ino ntanda wiyonakanye.’”
11 Ponkapo Ediakimi ne Shebana+ ne Yoa banena Labashake+ amba: “Tubakwisāshila, wisambe na bengidi bobe mu ludimi lwa Kialamia,*+ mwanda tubwanya kwivwana’lo; kokīsamba netu mu ludimi lwa Bayuda mu matwi a bantu badi pa lubumbu.”+
12 Ino Labashake webatentulula’mba: “Le mfumwami wantume kunena bino binenwa enka kudi mfumwenu ne komudi banwe kete? Mwene i ne kudi bana-balume bashikete pa lubumbu, boba basa kudya tuvwi twabo ne kutoma masu abo pamo nenu?”
13 Kupwa Labashake waimana kaela lubila na diwi ditunduke mu ludimi lwa Bayuda+ amba: “Ivwanai binenwa bya mulopwe mukatampe, mulopwe wa Ashidia.+
14 Mulopwe wanena namino amba, ‘Kemwakyongolwai na Hezekia, mwanda kabwanyapo kwimukūla.+
15 Kadi Hezekia kakemukulupija mudi Yehova+ na kunena’mba: “Na bubine Yehova usa kwitukūla, kadi kino kibundi kekisapo kupānwa mu kuboko kwa mulopwe wa Ashidia.”
16 Kemwakevwanai Hezekia, mwanda mulopwe wa Ashidia wanena namino amba: “Pwanai nami mwitūle,* nabya muntu ne muntu momudi ukadya ku muñanza wandi ne ku kikuyu kyandi ne kutoma mema a mu kyumbu kyandi,
17 enka ne byomfika nemuselele mu ntanda+ idi pamo bwa ntanda yenu, ntanda ya miseke ne vinyu mipya, ntanda ya mikate ne madimi a mañanza.
18 Hezekia kakemongola na kunena’mba, ‘Yehova usa kwitukūla.’ Lelo kudi baleza kampanda ba mizo bakūdile yabo ntanda mu kuboko kwa mulopwe wa Ashidia?+
19 Le baleza ba Hamata ne ba Alapade+ badi kwepi? Lelo baleza ba Sefavaime+ badi kwepi? Le bakūdile Samadia mu kuboko kwami?+
20 Le i leza’ka mu baleza bonso ba ano matanda wakūdile ntanda yabo mu kuboko kwami, amba Yehova nandi akūle Yelusalema mu kuboko kwami?”’”+
21 “Ino abo badi bobile’nka nyā, kebamulondolwelepo kishima nansha kimo, mwanda mulopwe wasoñenye bantu amba, “Kemufwaninwepo kumulondolola.”+
22 Ino Ediakimi mwanā Hilekia wadi utala ba mu njibo,* ne Shebana+ mulembi, ne Yoa mwanā Asafa musoneki baiya kudi Hezekia na bivwalwa bisane kebamulombola binenwa bya Labashake.
Kunshi kwa Dyani
^ Nansha’mba “mukata wa batuseya.”
^ Nansha’mba “njibo mikatakata.”
^ Nansha’mba “lwa bene Shidea.”
^ Kishima pa kishima i, “Mwieselei dyese pamo nami ne kutambila kondi.”
^ Nansha’mba “njibo mikatakata.”
