Isaya 29:1-24
29 “Adiele* malwa andi, Adiele, kibundi kwadi kutūla Davida nkambi!+
Endelelai mwaka ne mwaka;Endelelai kusoba masobo enu+ a pa mwaka pa mwaka.
2 Ino nkaleta tusua padi Adiele,+Kukekala madilo ne miyoa,+Kondi ukekala pamo bwa kyoto kya kisōkelo kya Leza.+
3 Nkakutūdila nkambi ku mitamba yonso,Kadi nkakutēkela kasāla na lupango lwa bimityiNe kukushimikila bingidilwa bya kasāla.+
4 Ukatūkijibwa panshi;Ukesambila pa nshi,Kadi byokesamba bikajikwa na luvumbi.
Diwi dyobe dikatambila pa nshi+Pamo bwa diwi dya muntu ubuka na bibanda,Kadi binenwa byobe bikevwanikilwa mu luvumbi.
5 Kibumbo kya balwana* nobe kikekala pamo bwa bukula bupēla,+Kibumbo kya bantu ba kasusu pamo bwa mfumba ipepuka.+
Kadi kikalongeka na mu kukopa kwa diso, mu kitulumukila.+
6 Yehova wa bibumbo ukakuta mutyimaNa mikungulo ne kutenkana kwa ntanda ne lunwa lukatampe,Na luvula lwa kimpumpu ne luvula lwa malwa ne mimbi ya mudilo uloteja.”+
7 Penepo kibumbo kya mizo yonso ilwa na Adiele+ divita—Bonso balwa nandi divita,Biteba bya kumutēkela nabyo kasāla,Ne boba bamuletela tusua—Bakekala pamo bwa kilotwa, kimonwa kya bufuku.
8 Bine, kikekala pamo bwa muntu wa nzala ulota udya,Ino ubūka na nzala,*Ne pamo bwa muntu wa kyumwa ulota utoma,Ino ubūka mukōke kadi na kyumwa.*
Mo mukekadila kibumbo kya mizo yonsoIlwa na Lūlu lwa Ziona divita.+
9 Kwatwai moyo ne kutendela;+Mwisabei meso mwikale bampofu.+
I bakolwe, ino ke vinyupo;Balundukanga, ino ke bitomibwapo bikolwañana.
10 Mwanda Yehova wemupungulwila mushipiditu wa tulo tukatampe,+Wapūta meso enu, bapolofeto,+Kadi wapūta mitwe yenu, bamoni ba bimonwa.+
11 Kimonwa kyonso kibemwikadila pamo bwa binenwa bya mukanda mulamike.+ Shi abape’o muntu ubwanya kutanga’mba: “Nakwisāshila, tanga’o na diwi ditunduke,” aye ukanena’mba: “Nkibwanyapo, mwanda i mulamike.”
12 Kadi shi mukanda’wa abape’o muntu kabwanyapo kutanga’mba: “Nakwisāshila, tanga’o,” aye ukanena’mba: “Nkibwanyapo kutanga.”
13 Yehova wanena’mba: “Bano bantu bamfwenanga na kyakanwa kyabo+Kadi bandēmekanga na milomo yabo bitupu,Ino mutyima wabo udi kulampe nami;Kadi kuntyina kwabo kwimanine pa bijila bya bantu byobafundijibwe.+
14 O mwanda, Ami ye ukalonga monka bintu bya kutendelwa kudi bano bantu,+Bya kutendelwa pa bya kutendelwa;Kadi tunangu twa bantu babo ba tunangu tukoneka,Ne ñeni ya bantu babo badyumuke nayo ikafibwa.”+
15 Malwa a boba batūkila munshi bininge mwanda wa kufya Yehova mpango* yabo.+
Bilongwa byabo bilongelwanga mu fukutu,Kebanena’mba: “Le i ani witumwene?
Le i ani uyukile myanda yetu?”+
16 Bine, munyengakanyanga bintu!*
Le umbumbi ukamonwa muswelo umo na dilongo?+
Le kyokya kilongelwe kikanena yewa wikilongele’mba:
“Kanongelepo”?+
Kadi kyokya kipungilwe kinene yewa wikipungile amba:
“Kadipo na ñeni”?+
17 Mu kitatyi kityetye’tu, Lebanona ukalamunwa ke kitongo,+Kadi kitongo kikamonwa’nka bwa ditó.+
18 Mu dyodya difuku boba bajike matwi bakevwana binenwa bya mukanda,Kadi meso a bampofu akamona+ mu mfindi ne mu fukutu.
19 Betyepeje bakasepelela bininge mudi Yehova,Kadi balanda ba mu bantu bakasangala mudi Mwine Ujila wa Isalela.+
20 Mwanda yewa ususulañana kakekala’kopo monka,Yewa wianya ukafika ku mfulo yandi,Kadi boba bonso batele mityima’nka ku kulonga bibi bakonakanibwa,+
21 Boba bapija bakwabo mambo na binenwa bya bubela,Boba bata makinga yewa unenena bantu* pa kibelo kya kibundi,+Ne boba bapela kubingija moloke na binenwa bya bitupu.+
22 O mwanda Yehova, mwine wakūdile Abalahama,+ wanena njibo ya Yakoba namino amba:
“Yakoba kakafwijibwapo monka bumvu,Kadi mpala yandi keikatōkolokapo monka.*+
23 Mwanda kitatyi kyamona bandi bana,Mingilo ya makasa ami, mu bukata mwandi,+Bakapandula dijina dyami;Bine, bakapandula Mwine Ujila wa Yakoba,Kadi bakevwana Leza wa Isalela nzuba.+
24 Boba boneke mu mushipiditu bakekala na ñeni,Kadi boba batompola baketabija bulombodi.”
Kunshi kwa Dyani
^ Pakwabo kishintulula’mba “Kyoto kya Kisōkelo kya Leza,” mobimwekela kifunkila pa Yelusalema.
^ Kishima pa kishima i, “beni.”
^ Nansha’mba “kadi muya wandi kwikuta mpika.”
^ Nansha’mba “kadi muya wandi mūmu tē.”
^ Nansha’mba “madingi.”
^ Nansha’mba “Bine, mwi bapupakane!”
^ Kishima pa kishima i, “yewa udingila.”
^ Ko kunena’mba, mwanda wa bumvu ne kutyumukwa mutyima.
