Isaya 28:1-29
28 Malwa akyo kilukwa* kya kwimwekeja* kya bankolwankolwa ba Efelaimi+Ne maluba mafumbe a buya bwakyo bwa ntumbo,Adi ku mutwe wa musanza wa bumeni wa boba batādilwe na vinyu!
2 Talai! Yehova udi na muntu mukomo kadi nkanka.
Pamo bwa mvula wa mabwe wa kivula ne mikungulo, kimpumpu kya luvula kya kyonakanya,Pamo bwa mvula wa mikungulo ne kivula ulobeja na mema makomokomo,Ukekyela panshi na bukomo.
3 Bilukwa bya kwimwekeja* bya bankolwankolwa ba EfelaimiBikatyampwa na mayo.+
4 Kadi diluba difumbe dya buya bwakyo bwa ntumbo,Didi ku mutwe wa musanza wa bumeni,Dikekala pamo bwa kikuyu kibajinji kya kumeso kwa kitatyi kya ku dikumbi.
Shi muntu wekimone, wikiminanga pokikidi’tu mu kuboko kwandi.
5 Mu dyodya difuku Yehova wa bibumbo ukekala ke kilukwa kya ntumbo ne nkata muyampe wa bimuna ku bashele’ko ba bantu bandi.+
6 Kadi ukekala ke mushipiditu wa boloke kudi yewa ushikete mu butyibi, ne nsulo ya bukomokomo ku boba bapangila kulampe bantu bebatamba ku kibelo.+
7 Kadi bano nabo abasāsuka pa mwanda wa vinyu;Bitomibwa byabo bikolwañana bibalundukijanga.
Kitobo ne mupolofeto abasāsuka pa mwanda wa bitomibwa bikolwañana;Vinyu ibavutakanyanga,Kadi balundukanga bitomibwa bikolwañana;Kimonwa kyabo kibebasāsukija,Kadi bakukalanga mu butyibi.+
8 Meza abo i mayule bilashe bya busala—I kutupu pokebidi.
9 Le i ani wakapa buyuki,Kadi i ani wakashintulwila musapu?
Le i boba bakilekaleka mabele,Boba bakitalulwa ku mabele?
10 Mwanda i “mbila kupwa mbila, mbila kupwa mbila,Lukamba na lukamba, lukamba na lukamba,*+Kuno bityetye, kokwa bityetye.”
11 Penepo kupityila ku boba banena* na kikukumina ne ludimi lungi, ukesamba na bano bantu.+
12 Webalombwele amba: “Kino’ki i kifuko kya kukōkolokwa. Yewa mupungile akōkolokwe; kino’ki i kifuko kya kutūja,” ino abo bapela kwivwana.+
13 Penepo kobadi kinenwa kya Yehova kikekala namino amba:
“Mbila kupwa mbila, mbila kupwa mbila,Lukamba na lukamba, lukamba na lukamba,*+Kuno bityetye, kokwa bityetye,”Amba kitatyi kyobenda,Bakakukala ne kupona kyādi
Ne kwityumuna ne kupya mu dikinga ne kukwatwa.+
14 O mwanda ivwanai kinenwa kya Yehova, banwe ba kwianya,Banwe balopwe ba bano bantu mu Yelusalema,
15 Mwanda banwe munenanga’mba:
“Tubasamba kipwano na Lufu,+Kadi tubeivwanika* na Kibundu.*
Kitatyi kipita milungu ya mema matomboke,Keikafikapo kotudi,Mwanda tubatūla bubela bu mwetu mwa kunyemenaKadi tubafyama mu bubela.+
16 O mwanda Mfumu Mwinē Lupusa Lonso Yehova wanena namino amba:
“Naala dibwe ditompwe bu kyalwilo mu Ziona,+Dibwe dilēme dya difinko+ dya kyalwilo kya binebine.+
I kutupu muntu ulombola lwitabijo ukazakala.+
17 Kadi nkalonga boloke ke lukamba lwa kupima nalo+Bululame nabo ke kingidilwa kya kōlola nakyo.*+
Mvula wa mabwe ukakomba mwa kunyemena mwa bubela,Kadi mema akalobeja kifuko kya kufyama’mo.
18 Kipwano kyenu na Lufu kikatyibika,Kadi kwiivwanika kwenu na Kibundu* kekukemanapo.+
Kitatyi kikapita milungu ya mema matomboke,Ikakuvingakanya.
19 Kitatyi kyonso kyoipita,Ikakupitula;+Mwanda ikapita lubanga ne lubanga,Dyuba ne bufuku.
Enka luzakalo lo lukebevwanija kine kyaivwenwe.*
20 Mwanda butanda i bwipi bininge pa kwiolola’po,Kadi kya kwipūta kisuke nakyo i kityetye bininge pa kwivunga’mo.
21 Mwanda Yehova ukemana pamo’nka bwa ku Lūlu lwa Pelazimi;Ukaloba’nka bwa mu musanza* udi kubwipi na Ngibeone,+Amba alonge kilongwa kyandi—kilongwa kyandi kyeni—Kadi amba avuye mwingilo wandi—mwingilo wandi ungiungi.+
22 Pano kemwakikalai na kipuni,+Kutyina’mba bijimba byenu byakaningila’ko,Mwanda naivwana kudi Mfumu Mwinē Lupusa Lonso, Yehova wa bibumbo,Amba i musumininwe kukubija ntanda yonso.*+
23 Tebekai matwi mwivwane diwi dyami;Tai mityima mwivwane byonesamba.
24 Lelo kidimye udimanga’nka kudima difuku dyonso dituntulu kukuna nkunwa mpika?
Le ukolanga ne kutyimpula nshi yandi kyaba kyonso?+
25 Aye pa kupwa kudiñamanya’yo,Mwene ukusanga kumine ifīta ne kukuna kumine,Mwene ukunanga ñano, luku ne mebele a buluba pa bifuko byabyoNe nkunki+ ku mikalo konso?
26 Mwanda Aye umufundijanga* dishinda dyoloke;Leza wandi umufundijanga.+
27 Mwanda kumine ifīta keipūlwangapo na kipungwa kya kupūla nakyo,+Kadi ditonto dya dikalo kedipityijibwangapo pa kumine.
Ino kumine ifīta ipūlwanga na lusonde,Kumine nayo na mukombo.
28 Le muntu upelanga miseke mwanda wa mikate?
Aa, kapūlanga’yopo kyaba kyonso,+Kadi shi wapityija’po lutonto lwa dikalo dyandi ne tubalwe twandi,Keipelangapo.+
29 Kino nakyo kitambanga kudi Yehova wa bibumbo,Wa madingi* a kutendelwaNe wa bilongwa bikatakata.*+
Kunshi kwa Dyani
^ Mobimwekela kifunkila pa Samadia, mwipata.
^ Nansha’mba “kwizunzula; mitatulo.”
^ Nansha’mba “kwizunzula; mitatulo.”
^ Nansha’mba “Lukamba lwa kupima nalo pa lukamba lwa kupima nalo, lukamba lwa kupima nalo pa lukamba lwa kupima nalo.”
^ Kishima pa kishima i, “mulomo.”
^ Nansha’mba “Lukamba lwa kupima nalo pa lukamba lwa kupima nalo, lukamba lwa kupima nalo pa lukamba lwa kupima nalo.”
^ Bibwanika padi i, “tubamone kimonwa.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “lukamba lwa kūbaka nalo.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Bibwanika padi i, “Pobakevwana, bakazakala.”
^ Nansha’mba “dilungu dya musanza.”
^ Nansha’mba “pano panshi ponso.”
^ Nansha’mba “umulemununanga; umupanga mfuto.”
^ Nansha’mba “kitungo.”
^ Nansha’mba “Wa tunangu twa kamweno tukatakata.”
