Isaya 22:1-25
22 Musapu utala Musanza wa Kimonwa:*+
Le udi na mwanda’ka mwine okandila abe ense pa misaka?
2 Wadi muyulwe kavutakanya,Kibundi kitukuma, kibundi kisepelela.
Bantu bobe batapwe kebatapilwepo na kipete,Nansha kufwa mu bulwi.+
3 Balopwe bobe ba kasusu i banyeme pamo.+
Baselelwe bu bakutwa ne kwingidija mata a miketo mpika.
Bonso batenwe baselelwe bu bakutwa,+Nansha byobanyemene kulampe.
4 O mwanda nanenene amba: “Kemwakantalai,Kadi nsa kudila bya bulanda.+
Kemwakansengai’nka kunsengaMwanda wa bonakani bwa mwana mwana-mukaji wa* bantu bami.+
5 Mwanda i difuku dya kavutakanya ne kunekenibwa ne luzakalo,+Ditamba kudi Mfumu Mwinē Lupusa Lonso, Yehova wa bibumbo,Mu Musanza wa Kimonwa.
Kudi kutūtwa kwa lubumbu+Ne kudila ku lūlu.
6 Elama+ wasela luvunguNe makalo endejibwa na bantu ne tubalwe,*Kadi Kila+ wapūtula* ngabo.
7 Misanza* yobe milumbuluke kutabukaIkayula makalo a bulwi,Kadi tubalwe* tukemana pa kibelo,
8 Kya kukinga* kya Yuda kikatalulwa.
“Mu dyodya difuku ukatala ku byabulwi bya Njibo ya Ditó,+
9 kadi mukamona bipunzu bivule bya Kibundi kya Davida.+ Kadi mukakongakanya mema a kijiba kya munshi.+
10 Mukabala mobo a Yelusalema, kadi mukapomona mobo mwanda wa kuningisha lubumbu.
11 Kadi mukalonga kyoilo pa bukata bwa mumbu ibidi kya mema a kijiba kya kala, ino kemukatalepo kudi wakyo Mulongi Mukatakata, kadi kemukamonepo Yewa wekipungile tamba kala.
12 Mu dyodya difuku Mfumu Mwinē Lupusa Lonso, Yehova wa bibumbo,Uketa kudila ne madilo,+Kutenda mitwe ne kuvwala masāka.
13 Ino yō, kudi masobo ne nsangaji,Kwipaya bañombe ne kutapa mikōko,Kudya mwita ne kutoma vinyu.+
‘Tudyei tutome mwanda kesha tusa kufwa.’”+
14 Penepo Yehova wesokwela mu matwi ami amba: “‘Kino kilubo kekikemupūtyilwapo enka ne byomufwa,’+ i Mfumu Mwinē Lupusa Lonso, Yehova wa bibumbo unena.”
15 Mfumu Mwinē Lupusa Lonso, Yehova wa bibumbo wanena namino amba: “Katwele mudi uno kalama, mudi Shebana,+ mwine utala njibo,* unene amba,
16 ‘Le usaka bika kuno, le kudi muntu osaka kuno, amba wikolele kibundu kuno?’ Aye wikolelanga kibundu mu mutenta; wisōngelanga kifuko kya kukōkolokwa* mu kidibwe.
17 ‘Tala! Yehova ukakubasa panshi, a mwana-mulume, ne kukushipila na bukomo.
18 Bine ukakuvunga mbū ne kukunyunga pamo bwa bulundu ku ntanda mikata. Ukafwila kwine’kwa, kadi ko kukekala ne makalo obe a ntumbo, bumvu bwa njibo ya mfumobe.
19 Kadi nkakubikula pa kitenta kyobe ne kukutalula pa mwingilo obe.
20 “‘Mu dyodya difuku nketa mwingidi wami Ediakimi+ mwanā Hilekia,
21 nkamuvwika munkukumba obe ne kumukuta mbū lukuka lobe,+ kadi nkamupa lupusa lobe* mu kuboko kwandi. Aye ukekalanga shandya bekadi ba Yelusalema ne njibo ya Yuda.
22 Kadi nkatūla lufungulo lwa njibo ya Davida+ pa kipuji kyandi. Ukashitula, kekukekalapo nansha umo wa kushita; kadi ukashita, kekukekalapo nansha umo wa kushitula.
23 Nkamupopa pamo bwa kipopo mu kifuko kya myaka na myaka, nandi ukekala ke lupona lwa ntumbo ku njibo ya shandi.
24 Kadi bakamukobeka ntumbo* yonso ya njibo ya shandi, bana ne lutundu,* bipungwa byonso bityebitye, bipungwa bidi bwa ngeso, ne milondo yonso mikatampe.
25 “‘Mu dyodya difuku,’ i Yehova wa bibumbo unena, ‘kipopo kyapopelwe pa kifuko kya myaka na myaka kikatukunwa,+ kadi kikaketwa ne kupona, kadi kiselwa kyadi kikobekelwe’ko kikapona ne koneka, mwanda Yehova aye mwine wesambe’kyo.’”
Kunshi kwa Dyani
^ Mobimwekela kifunkila pa Yelusalema.
^ Muneneno wa kusāsula wa kutela kintu bu muntu, ulombola padi lusa nansha lusalusa.
^ Nansha’mba “bakandanga pa tubalwe.”
^ Nansha’mba “walongolola.”
^ Nansha’mba “Malungu a misanza.”
^ Nansha’mba “bakandanga pa tubalwe.”
^ Nansha’mba “bulami.”
^ Nansha’mba “njibo mikatakata.”
^ Kishima pa kishima i, “kīkalo.”
^ Nansha’mba “bulopwe bobe.”
^ Kishima pa kishima i, “bulēmi.”
^ Nansha’mba “mutombo.”
