Ebanghelio ni Juan 21:1-25

  • Agparang ni Jesus kadagiti adalanna (1-14)

  • Patalgedan ni Pedro ti ayatna ken Jesus (15-19)

    • “Pakanem dagiti babassit a karnerok” (17)

  • Ti mapasamak iti adalan nga ipatpateg ni Jesus (20-23)

  • Konklusion (24, 25)

21  Nagparang manen ni Jesus kadagiti adalanna, iti Baybay ti Tiberias. Kastoy ti napasamak:  Adda sadiay da Simon Pedro, Tomas (a naawagan iti Singin),+ Natanael+ a taga-Cana iti Galilea, dagiti annak ni Zebedeo,+ ken ti dua pay nga adalan.  Kinuna ni Simon Pedro kadakuada: “Innak agkalap.” Insungbatda: “Sumurotkami.” Nagluganda iti bangka ngem agpatnag nga awan ti nakalapda.+  Ngem idi aglawagen, nagtakder ni Jesus iti igid ti baybay, ngem saan a nailasin dagiti adalan.+  Kinuna ngarud ni Jesus: “Gagayyem, adda kadi aniaman* a kanenyo?” Insungbatda: “Awan!”  Kinunana kadakuada: “Iwayatyo ti iket iti makannawan ti bangka ket adda maalayo.” Inwayatda dayta ket adu ti nakalapda nga uray la saandan a kabaelan a guyoden.+  Ti adalan nga ipatpateg ni Jesus+ kinunana ken Pedro: “Isu dayta ti Apo!” Idi nangngeg dayta ni Simon Pedro, insuotna* ti badona ta nakaussob idi ket timmapuak iti baybay.  Ngem simmaruno ti dadduma nga adalan a nabati iti bassit a bangka bayat a guyguyodenda ti iket a napno iti ikan, ta agarup 90 a metro* laeng ti kaadayoda iti takdang.  Idi nakatakdangdan, nakitada sadiay ti dumardarang a beggang ken dagiti matuntuno nga ikan ken adda met tinapay. 10  Kinuna ni Jesus: “Ikkandak iti sumagmamano nga ikan a kaal-alayo.” 11  Gapuna, napan ni Simon Pedro iti bangka ket insang-atna ti iket a napno iti dadakkel nga ikan, 153 amin. Nupay adu dayta, saan a napigis ti iket. 12  Kinuna ni Jesus: “Umaykayo mamigaten.” Awan kadagiti adalan ti nakaitured a mangisaludsod: “Asinoka?” ta ammoda nga isu ti Apo. 13  Nangala ni Jesus iti tinapay ket intedna kadakuada. Kasta met laeng ti inaramidna iti ikan. 14  Daytoy ti maikatlo+ a panagparang ni Jesus kadagiti adalan kalpasan ti panagungarna. 15  Idi nakapangandan, insaludsod ni Jesus ken ni Simon Pedro: “Simon nga anak ni Juan, ay-ayatennak kadi nga ad-adda ngem kadagitoy?” Insungbatna: “Wen, Apo, ammom nga ay-ayatenka.” Kinuna ni Jesus: “Pakanem dagiti urbon a karnerok.”+ 16  Insaludsodna manen: “Simon nga anak ni Juan, ay-ayatennak kadi?” Insungbatna: “Wen, Apo, ammom nga ay-ayatenka.” Kinuna ni Jesus: “Ipastoram dagiti babassit a karnerok.”+ 17  Insaludsodna iti maikatlo a daras: “Simon nga anak ni Juan, ay-ayatennak kadi?” Nagliday ni Pedro gapu ta namitlo a naisaludsod kenkuana: “Ay-ayatennak kadi?” Isu a kinunana: “Apo, ammom ti amin a banag; ammom nga ay-ayatenka.” Kinuna ni Jesus: “Pakanem dagiti babassit a karnerok.+ 18  Pudno unay kunak kenka, idi ubingka pay, kabaelam ti agbado a bukbukodmo ken makapanka iti sadinoman a kayatmo. Ngem inton lumakayka, iyunnatmo ta imam ket sabali ti mangbado kenka ken ipannaka iti saanmo a kayat a papanan.” 19  Imbagana daytoy tapno ipakitana no kasanonto a ti ipapatay ni Pedro ket pakaidayawan ti Dios. Kalpasanna, kinunana: “Itultuloymo ti sumurot kaniak.”+ 20  Timmaliaw ni Pedro ket nakitana a sumursurot ti adalan nga ipatpateg ni Jesus.+ Daytoy daydiay nagsadag ken Jesus ken nangisaludsod: “Apo, asino ti ibagbagam a mangtraidor kenka?” 21  Isu nga idi nakita ni Pedro daytoy nga adalan, insaludsodna ken Jesus: “Apo, anianto met ti mapasamak kenkuana?” 22  Insungbat ni Jesus: “No pagayatak nga agtultuloy nga agbiag agingga iti iyaayko, apay a pakaseknam? Itultuloymo ti sumurot kaniak.” 23  Gapuna, nagdinamag kadagiti pasurot ni Jesus a saan a matay dayta nga adalan. Ngem saan a kasta ti kayat a sawen ni Jesus, no di ket kinunana: “No pagayatak nga agtultuloy nga agbiag agingga iti iyaayko, apay a pakaseknam?” 24  Daytoy nga adalan+ ti nangpaneknek ken nangisurat kadagitoy a banag, ket ammotayo a pudno dagiti imbagana. 25  Kinapudnona, adu pay ti inaramid ni Jesus, a no maisurat ti amin a detalyena, pagarupek a saan a malaon ti lubong dagiti lukot a pakaisuratanna.+

Footnotes

Wenno “adda kadi ikan.”
Wenno “imbarikesna.”
Lit., “agarup 200 a kasiko.” Kitaem ti App. B14.