Ebanghelio ni Juan 18:1-40

  • Traidoren ni Judas ni Jesus (1-9)

  • Usaren ni Pedro ti espada (10, 11)

  • Naipan ni Jesus ken Anas (12-14)

  • Umuna a panaglibak ni Pedro (15-18)

  • Ni Jesus iti sango ni Anas (19-24)

  • Maikadua ken maikatlo a panaglibak ni Pedro (25-27)

  • Ni Jesus iti sango ni Pilato (28-40)

    • “Ti Pagariak ket saan a paset daytoy a lubong” (36)

18  Idi naibagan ni Jesus dagitoy, kaduana dagiti adalanna+ a napan iti maysa a hardin, iti ballasiw ti Tanap ti Kidron.*+  Ni Judas, a mangtraidor kenkuana, ammona met dayta a lugar, ta masansan a sadiay ti pagkikitaan ni Jesus ken dagiti adalanna.  Iti kasta, napan ni Judas iti hardin ket inkuyogna dagiti soldado ken dagiti guardia nga imbaon dagiti panguluen a papadi ken dagiti Fariseo. Nangitugotda kadagiti aluten, lampara, ken armas.+  Gapu ta ammo ni Jesus ti amin a mapasamak kenkuana, nagpasango ket kinunana: “Asino ti sapsapulenyo?”  Insungbatda: “Ni Jesus a Nazareno.”+ Kinunana kadakuada: “Siak dayta.” Kaduada met idi nga agtaktakder ni Judas, a mangtraidor kenkuana.+  Ngem idi imbaga ni Jesus, “Siak dayta,” nagsanudda ket natumbada.+  Isu nga insaludsodna manen: “Asino ti sapsapulenyo?” Insungbatda: “Ni Jesus a Nazareno.”  Kinuna ni Jesus: “Imbagak a siak dayta. No siak ti sapsapulenyo, bay-anyo a pumanaw dagitoy a lallaki.”  Daytoy ti kaitungpalan ti imbagana: “Awan ti uray maysa a napukaw kadagiti intedmo kaniak.”+ 10  Kalpasanna, inasut ni Simon Pedro ti espadana ket piningasna ti kannawan a lapayag+ ti adipen ti nangato a padi. Malco ti nagan ti adipen. 11  Ngem kinuna ni Jesus ken ni Pedro: “Isublim ti espada iti kalubanna.+ Saan aya a masapul nga uminumak iti kopa nga inted kaniak ti Ama?”+ 12  Dagiti soldado ken ti komander ti militar ken dagiti guardia nga imbaon dagiti Judio tiniliwda* ni Jesus ket ginalutanda dagiti imana. 13  Impanda nga umuna ken Anas, ta isu ti katugangan ni Caifas,+ a nangato a padi iti dayta a tawen.+ 14  Ni Caifas ti nangibaga kadagiti Judio a nasaysayaat a matay ti maysa a tao para iti adu a tattao.+ 15  Simmurot ken Jesus ni Simon Pedro ken ti sabali pay nga adalan.+ Am-ammo ti nangato a padi dayta nga adalan, ket nakikuyog ken Jesus a simrek iti paraangan ti nangato a padi. 16  Ngem nagbati ni Pedro iti ruar iti asideg ti ruangan.* Gapuna, rimmuar ti adalan nga am-ammo ti nangato a padi ket kinasaritana ti parabantay iti ruangan tapno pastrekenna ni Pedro. 17  Ti adipen a babai a parabantay iti ruangan kinunana ken Pedro: “Saan kadi a maysaka met kadagiti adalan daytoy a tao?” Insungbatna: “Saan.”+ 18  Agtaktakder idi dagiti adipen ken dagiti guardia iti aglawlaw ti dumardarang a beggang nga inaramidda, ta nalam-ek ken agin-inudoda. Kaduada met ni Pedro nga agtaktakder ken agin-inudo. 19  Nagsaludsod ti panguluen a padi ken Jesus maipapan kadagiti adalanna ken iti isursurona. 20  Insungbat ni Jesus: “Nangaskasabaak iti sanguanan dagiti tattao. Kanayon a nangisursuroak kadagiti sinagoga ken idiay templo,+ a paguummongan ti amin a Judio, ket awan ti inlimedko. 21  Apay a pagsaludsodannak? Dagiti nakangngeg kadagiti pannursurok ti pagsaludsodam. Ammoda ti imbagak.” 22  Idi naibaganan dagitoy, maysa kadagiti guardia a nakatakder iti asideg ti nangtungpa ken Jesus+ ket kinunana: “Apay a kasta ti panagsungsungbatmo iti panguluen a padi?” 23  Insungbat ni Jesus: “No adda dakes nga imbagak, paneknekam dayta;* ngem no pudno ti imbagak, apay a tungpaennak?” 24  Iti kasta, imbilin ni Anas a maipan ni Jesus a nakagalut ken ni Caifas a nangato a padi.+ 25  Nakatakder idi ni Simon Pedro ken agin-inudo, ket kinunada kenkuana: “Saan kadi a maysaka met kadagiti adalanna?” Naglibak ket kinunana: “Saan.”+ 26  Imbaga ti maysa kadagiti adipen ti nangato a padi, a kabagian ti lalaki a piningasan ni Pedro:+ “Saan aya a sika daydiay nakitak a kaduana idiay hardin?” 27  Ngem naglibak manen ni Pedro, ket dagus a nagtaraok ti maysa a kawitan.+ 28  Parbangonen idi naipanaw ni Jesus iti balay ni Caifas sa naipan iti pagtaengan ti gobernador.+ Ngem saan a simrek dagiti Judio iti pagtaengan ti gobernador, tapno saanda a maibilang a narugit+ ken mabalinda ti mangan iti pangrabii ti Paskua. 29  Rimmuar ngarud ni Pilato ket kinunana: “Ania ti pangakusaranyo iti daytoy a tao?” 30  Insungbatda kenkuana: “No saan a dakes* daytoy a tao, saanmi koman nga ipan kenka.” 31  Gapuna, kinuna ni Pilato: “Alaenyo ket dakayo ti mangukom kenkuana sigun iti lintegyo.”+ Insungbat dagiti Judio: “Saan a maipalubos a patayenmi ti asinoman.”+ 32  Napasamak daytoy tapno matungpal ti imbaga ni Jesus a wagas ti ipapatayna.+ 33  Simrek manen ni Pilato iti pagtaengan ti gobernador ket inayabanna ni Jesus sa kinunana: “Sika kadi ti Ari dagiti Judio?”+ 34  Insungbat ni Jesus: “Kapanunotam kadi ti insaludsodmo, wenno adda nangibaga kenka iti maipapan kaniak?” 35  Kinuna ni Pilato: “Ammom a saanak a Judio. Indarumdaka kaniak dagiti kailiam ken dagiti panguluen a papadi. Ania aya ti inaramidmo?” 36  Insungbat ni Jesus:+ “Ti Pagariak ket saan a paset daytoy a lubong.+ No ti Pagariak ket paset daytoy a lubong, nakilaban koma dagiti pasurotko tapno saanak a mayawat kadagiti Judio.+ Ngem saan a ditoy lubong ti ayan ti Pagariak.” 37  Gapuna, insaludsod ni Pilato: “No kasta, maysaka nga ari?” Insungbat ni Jesus: “Sika a mismo ti nangibaga a maysaak nga ari.+ Nayanakak ken immayak ditoy lubong gapu iti daytoy, tapno saksiak ti kinapudno.+ Dumngeg iti timekko ti asinoman a mangtungtungpal iti kinapudno.” 38  Kinuna ni Pilato: “Ania a kinapudno?” Idi naibaganan daytoy, rimmuar manen ket kinunana kadagiti Judio: “Awan ti makitak a basolna.+ 39  Adda kaugalianyo a mangwayawayaak iti maysa a tao bayat ti Paskua.+ Kayatyo kadi a wayawayaak ti Ari dagiti Judio?” 40  Impukkawda manen: “Saan, ni Barabas ti kayatmi!” Maysa idi a mannanakaw ni Barabas.+

Footnotes

Wenno “napegges nga ayus ti Kidron iti tiempo ti lam-ek.”
Wenno “inarestoda.”
Wenno “pagserkan.”
Wenno “agtestigoka.”
Wenno “kriminal.”