Ebanghelio ni Juan 14:1-31

  • Ni Jesus, ti kakaisuna a dalan nga agturong iti Ama (1-14)

    • ‘Siak ti dalan, ti kinapudno, ken ti biag’ (6)

  • Ikari ni Jesus ti nasantuan nga espiritu (15-31)

    • ‘Natantan-ok ti Ama ngem siak’ (28)

14  “Saankayo a mariribukan.+ Ipakitayo ti pammatiyo iti Dios;+ ipakitayo met ti pammatiyo kaniak.  Adu ti pagyanan idiay balay ni Amak. Ta no awan, saanko koma nga ibaga daytoy kadakayo. Ita, mapanko isagana ti pagyananyo.+  No mapanak mangisagana iti pagyananyo, agsubliakto tapno ikuyogkayo iti pagtaengak, tapno no sadino ti ayanko, addakayo met sadiay.+  Ket no sadino ti papanak, ammoyo ti dalan.”  Kinuna ni Tomas:+ “Apo, saanmi nga ammo ti papanam. Kasano ngarud nga ammomi ti dalan?”  Insungbat ni Jesus: “Siak ti dalan+ ken ti kinapudno+ ken ti biag.+ Awan ti makapan iti Ama no saan a magna kaniak.+  No am-ammodak, am-ammoyo metten ti Amak; manipud ita, am-ammoyon ken nakitayon ti Ama.”+  Kinuna ni Felipe: “Apo, ipakitam kadakami ti Ama, ket mapnekkamin.”  Imbaga ni Jesus: “Nabayagen nga agkakaduatayo, Felipe, ngem saannak pay kadi nga am-ammo? Ti nakakita kaniak nakitana metten ti Ama.+ Apay pay laeng nga ibagam, ‘Ipakitam kadakami ti Ama’? 10  Saanmo kadi a patien a naikaykaysaak iti Ama ken naikaykaysa met kaniak ti Ama?+ Saan a ti bukodko a kapanunotan ti ibagbagak kadakayo+ no di ket ti impaaramid ken imbaga ti Ama a naikaykaysa kaniak. 11  Mamatikayo a naikaykaysaak iti Ama ken naikaykaysa kaniak ti Ama; no saan, mamatikayo gapu kadagiti aramidko.+ 12  Pudno unay kunak kadakayo, ti mangipakita iti pammati kaniak, aramidennanto met ti ar-aramidek; ket dakdakkelto pay ngem kadagitoy ti aramidenna,+ ta mapanak iti Ama.+ 13  Aramidekto met ti aniaman a kiddawenyo iti naganko, tapno maipadayag ti Ama babaen ti Anak.+ 14  No adda kiddawenyo iti naganko, aramidekto. 15  “No ay-ayatendak, tungpalenyo dagiti bilinko.+ 16  Kiddawek iti Ama nga ikkannakayo iti sabali pay a katulongan* nga agtalinaed kadakayo iti agnanayon,+ 17  ti espiritu ti kinapudno,+ a saan a mabalin nga awaten ti lubong, ta saanna a makita wenno am-ammo dayta.+ Ngem am-ammoyo dayta, ta agtalinaed kadakayo ken adda kadakayo. 18  Saankayto a baybay-an nga agladladingit.* Agsubliakto kadakayo.+ 19  Iti din agbayag, saannakton a makita ti lubong, ngem makitadakto,+ ta sibibiagak ket agbiagkayto. 20  Iti dayta nga aldaw, maammuanyonto a naikaykaysaak iti Amak ken naikaykaysakayo kaniak ket naikaykaysaak kadakayo.+ 21  Ti umawat ken agtungpal kadagiti bilinko, ay-ayatennak. Ti mangay-ayat kaniak ayatento ti Amak, ken ayatekto met ken iyam-ammok a naimbag ti bagik kenkuana.” 22  Kinuna ni Judas+ (saan a ni Judas Iscariote): “Apo, dakami laeng kadi ti kayatmo a pangyam-ammuan iti bagim, ket saanen a kadagiti tattao iti lubong?” 23  Insungbat ni Jesus: “Ti mangayat kaniak tungpalenna ti saok,+ ket ayatento ti Amak. Mapankamto kenkuana ket makipagnaedkamto kenkuana.+ 24  Ti saan a mangayat kaniak saanna a tungpalen dagiti saok. Saan a naggapu kaniak ti ibagbagak, no di ket iti Ama a nangibaon kaniak.+ 25  “Ibagak daytoy bayat nga addaak pay kadakayo. 26  Ngem ti katulongan, ti nasantuan nga espiritu, nga ibaonto ti Ama iti naganko, isuronanto kadakayo ti amin a banag ken ipalagipna ti amin nga imbagak kadakayo.+ 27  Ibatik kadakayo ti talna nga itedko+ ngem saan a kas iti talna nga ited ti lubong. Saankayo a mariribukan wenno agbuteng. 28  Nangngegyo nga imbagak kadakayo, ‘Pumanawak ngem agsubliakto.’ No talaga nga ay-ayatendak, agragsakkayo ta mapanak iti Ama, gapu ta ti Ama ket natantan-ok ngem siak.+ 29  Gapuna, ibagak daytoy sakbay a mapasamak tapno mamatikayo inton mapasamak.+ 30  Saanakon a makapagbayag pay a makisao kadakayo, ta um-umayen ti agturay iti lubong,+ ngem saannak a makontrol.*+ 31  Tapno maammuan ti lubong nga ay-ayatek ti Ama, tungtungpalek ti imbilin kaniak ti Ama.+ Intayon, pumanawtayo ditoy.

Footnotes

Wenno “mangliwliwa.”
Wenno “kas ulila.”
Wenno “maiturayan.”