Ebanghelio ni Juan 9:1-41

  • Paimbagen ni Jesus ti lalaki a nayanak a bulsek (1-12)

  • Pinagsaludsodan dagiti Fariseo ti napaimbag a lalaki (13-34)

  • Bulsek dagiti Fariseo (35-41)

9  Bayat a magmagna ni Jesus, nakitana ti maysa a lalaki a nayanak a bulsek.  Insaludsod dagiti adalanna: “Rabbi,+ asino ti nakabasol ta nayanak a bulsek daytoy a lalaki, isu wenno dagiti nagannakna?”  Insungbat ni Jesus: “Saan a nagbasol daytoy a lalaki wenno dagiti nagannakna, ngem babaen ti kasta a kasasaadna, maipakita dagiti aramid ti Dios.+  Masapul nga aramidentayo ti pagayatan Daydiay nangibaon kaniak bayat nga aldaw pay;+ ta um-umayen ti rabii ket awanton ti tao a makapagtrabaho.  Bayat nga addaak ditoy lubong, siak ti silaw ti lubong.”+  Idi naibaganan dagitoy, timmupra iti daga ken nangaramid iti pitak ket impulagidna kadagiti mata ti lalaki.+  Kinuna ni Jesus: “Inka agdiram-os idiay pagdigusan ti Siloam” (a naipatarus kas “Naibaon”). Napan nagdiram-os ket idi nagsubli, makakitan.+  Kalpasanna, kinuna dagiti kaarrubana ken dagiti dati a makakitkita kenkuana nga agpalpalimos: “Saan kadi a daytoy daydiay agpalpalimos?”  Kinuna ti dadduma: “Wen, isu.” Adda met dagiti nagkuna: “Saan, karuprupana laeng.” Ngem imbaga ti lalaki: “Siak daydiay.” 10  Insaludsodda kenkuana: “Apay ngarud a makakitakan?” 11  Insungbatna: “Nangaramid iti pitak ti lalaki a maawagan Jesus sa impulagidna kadagiti matak ket kinunana, ‘Inka agdiram-os idiay Siloam.’+ Isu a napanak nagdiram-os ket makakitaakon.” 12  Gapuna, insaludsodda kenkuana: “Ayan dayta a lalaki?” Insungbatna: “Diak ammo.” 13  Impanda kadagiti Fariseo ti lalaki a dati a bulsek. 14  Nairana a Sabbath+ idi nangaramid ni Jesus iti pitak ken linuktanna dagiti mata ti lalaki.+ 15  Insaludsod met dagiti Fariseo no kasano a nakakita ti lalaki. Insungbatna kadakuada: “Adda nangipulagid iti pitak kadagiti matak, nagdiram-osak, ket nakakitaakon.” 16  Kinuna ti dadduma a Fariseo: “Saan nga imbaon ti Dios daytoy a tao, ta saanna a tungtungpalen ti Sabbath.”+ Adda met dagiti nagkuna: “Kasano koma a makaaramid iti kasta a milagro ti tao a managbasol?”+ Gapuna, nagduduma ti kapanunotanda.+ 17  Insaludsodda manen iti dati a bulsek: “Ania ti makunam maipapan kenkuana, gapu ta linuktanna dagiti matam?” Insungbat ti lalaki: “Maysa a propeta.” 18  Ngem saan a namati dagiti Judio a bulsek idi ti lalaki ngem makakitan, isu nga inayabanda dagiti nagannakna. 19  Dinamagda: “Daytoy kadi ti anakyo nga ibagbagayo a nayanak a bulsek? Apay ngarud a makakitan?” 20  Insungbat dagiti nagannakna: “Wen, ammomi a daytoy ti anakmi ken nayanak a bulsek. 21  Ngem saanmi nga ammo no kasano a makakitan, wenno no asino ti nanglukat kadagiti matana. Isu ti pagsaludsodanyo ta nataengan metten. Ammona dayta.” 22  Kasta ti imbaga dagiti nagannakna ta mabutengda idi kadagiti panguluen a Judio.+ Nagtutulagan ngamin dagiti Judio a mailaksid iti sinagoga+ ti asinoman a mangbigbig ken Jesus kas Kristo. 23  Isu nga imbaga dagiti nagannakna: “Nataenganen. Isu ti pagsaludsodanyo.” 24  Inayabanda manen ti lalaki a dati a bulsek ket kinunada: “Idaydayawmo ti Dios babaen ti panangibagam iti pudno; ammomi a managbasol dayta a tao.” 25  Kinuna ti lalaki: “No managbasol, saanko nga ammo. Ti ammok ket bulsekak idi ngem makakitaakon.” 26  Insaludsodda: “Ania ti inaramidna kenka? Kasanona a linuktan dagita matam?” 27  Insungbatna: “Imbagak la ngaruden, ngem saandak met a dengdenggen. Apay a kayatyo nga ulitek manen? Kayatyo kadi met ti agbalin nga adalanna?” 28  Gapuna, pinagsasawanda ket kinunada: “Adalannaka dayta a tao, ngem adalannakami ni Moises. 29  Ammomi a nagsao ti Dios ken ni Moises, ngem saanmi nga ammo ti naggapuan dayta a tao.” 30  Kinuna ti lalaki: “Nakaskasdaaw man ta saanyo nga ammo ti naggapuanna, idinto ta linuktanna dagiti matak. 31  Ammotayo a saan a denggen ti Dios dagiti managbasol,+ ngem denggenna ti asinoman nga agbuteng kenkuana ken mangaramid iti pagayatanna.+ 32  Awan pay a pulos ti nadamdamagtayo a nanglukat kadagiti mata ti maysa a nayanak a bulsek. 33  No saan nga imbaon ti Dios daytoy a tao, awan koma a pulos ti maaramidanna.”+ 34  Insungbatda kenkuana: “Nayanakka nga adu ti basolna, sa ita, isuronakami ketdin?” Kalpasanna, pinapanawda!+ 35  Nadamag ni Jesus ti napasamak, ket kinunana idi nakitana ti lalaki: “Mamatika kadi iti Anak ti tao?” 36  Insungbatna: “Apo, ibagam no asino tapno mamatiak kenkuana.” 37  Kinuna ni Jesus: “Nakitamon. Kinapudnona, isu ti makisarsarita kenka.” 38  Imbaga ti lalaki: “Mamatiak, Apo.” Ket nagruknoy kenkuana. 39  Kinuna ni Jesus: “Immayak ditoy lubong tapno maukom dagiti tattao. Iti kasta, makakita dagiti saan a makakita+ ket dagiti makakita, agbalinda a bulsek.”+ 40  Nangngeg dayta ti dadduma a Fariseo, ket insaludsodda: “Ibagbagam kadi a bulsekkami met?” 41  Insungbat ni Jesus: “No bulsekkayo, awan koma ti basolyo. Ngem gapu ta kunayo, ‘Makakitakami,’ saan a mapakawan ti basolyo.”+

Footnotes